ادخل واعط رأيك بالامتحانات والأسئلة واحك تفاصيل عن امتحاناتك

كلنا اما خلصنا أو رح نخلص امتحان قريباً
وأكيد كل واحد فينا عندي كتيييييييييير أشياء ليحكيها عن الامتحان
متل كم المواد اللي كان عندو
كيف قدّر صعوبة المنهاج, الأسئلة , توزيع العلامات, أو حتى كيف جاوب عليها
وهل بتحس حالك كنت موفق بهالامتحان أو لأ
ظبطت معك شي ضربة حظ أو صار العكس يعني درست كتير بس على شي فاضي
شو ما بيخطر ببالكن عن الامتحان والمواقف اللي مريتو فيها
وبعد هالجريدة كلها والشرح والتفصيل بالمختصر المفيد فش خلقك من الامتحان

و الله ليكي

انا لسا عندي مادة و قدمت 10 لحد الان

و نشالله بشيل منهن اللي بيخولني لاترفع

اما بالنسبة للاسئلة فصراحة هي اول مرة بحياتي بحس اني عم اكتب منيح بجوز لاني دارس و الاسئلة ما قدرت ميز الصعب من السهل لاني ما تركت شي الا و كتبتو

و اما ضربة الحظ فيا بتصدقو او ما بتصدقو

عندي مادة ما ني دارسها فيها شي 16 محاضرة قمت حفظت من كل المادة 4 اسئلة و رحت كتبتهن بالامتحان و اذا بالسؤال الاول يطلع صح و انا ما بعرف انو هادا الجواب النظامي بس ما كملت لانو السؤال عليه اقل من 50 يعني ما ظبطت

بعدين في شي كتير زعجني

و هو تأخر المراقبين بفتح بعض القاعات يعني في مادة ضلينا ناطرين ربع ساعة لحتى شرفو المراقبين ولك شو هالمهزلة

يعين فوق ما الواحد بيكون سهران للصبح و جايي و مو شايف قدامو كمان لسا بيجو بينكدو عالواحد و الله عيب

مشكورة حنان عالموضوع الجميل

أولا كل الشكر حنان عالموضوع .
أنا الحمدلله قدمت منيح بهالفصل يعني أحسن من أول فصل ، بس خايف من الظلم..... ظلم التصحيح اللي عانيت منو بمادة الشعر بالفصل الأول والأسئلة بشكل عام سهلة نسبيا بس في بعض المنكدات. والمراقبة مقرفة لأبعد حد: بس يطلع أول واحد بيبلشو فيك قوم من هون وروح لهنيك وأكتر من مرة، وإذا خلصت قوم سلم ورقتك وطلاع"تصورو سلم وضل قاعد!"، و بتطلع قبل الوقت بربع ساعة ومابيرضو يعطوك ورقة الأسئلة، ولك بدي أعرف هالمسخرة لشو ؟على أساس طالب جامعة ما حفظ الأسئلة بعد ماحلها، مومعقول هالغباء.
بالنهاية الله يصبرنا على بلوانا وانشاالله يارب كل واحد اشتغل بياخد نصيبو لأن الله مابضيع تعب حدا.

هلق أنا ولا مرة صراحة حسيت بظلم حقيقي وفعلي بالنسبة للإمتحان والعلامات
يعني ممكن تكون علامتي أقل من ما متوقع بس ما لدرجة اني أرسب بالمادة
وامتحانات هالفصل انشالله منيحة واذا في لأ , فأكيد عالتكميلية .
بس عندي تعليق ع مواد متل النقد 3 & 4 وتاريخ الأدب , يعني بحس انو مواد ناشفة وجافة والدكاترة ما بيبذلوا أي مجهود لجعل هالمواد أسلس وأسهل وأبسط بالعكس .
يعني بالنقد لازم تكتب كل شي بتعرفه ويا دوب تنجح .
وبعدين عنا مواد هامة عم تمر مرور الكرام متل اللسانيات مثلاً ما عم تنعطى ع أصولها وهي مادة فهم وتطبيق , يعني بس تقدمها بتنسى كل شي الو علاقة باللفظ واللسان والحلق وما بعرف شو ؟؟؟؟؟
باختصار أسلوب وطرق تدريس المواد شي بهدلة , وما ريحة الا علينا لأنو لما بتوصلوا للرابعة وبتحسوا حالكن قربتوا تتخرجوا بتحسوا بالخوف لأنو في أشياء كتير ما بتعرفوها وانت المفروض قريباً متخرجين وفطاحل وعباقرة .
مشكووووووووورة حنان

لك اااااخ الواحد شو بدو يحكي ليحكي ...

يعني ...انا كنت كل يوم فحص فيق من ال5 الصبح واحيانا قبل .. و بدرس لوقت المادة ..الله وكيلكون ما برفع راسي و بروح الفحص مو شايفة قدامي ..بالاخير من كتر حظي ما حلو ..ما بيجي ولا سؤال من اللي درستون يعني شطبوا عالحظ ..
بعدين كل الاسئلة اجا فيها شي ضربة (عالاقل بالنسبة الي ) يعني بالمختصر مشان ما طول ..انا بدي 3 مواد بس لأترفع ..و يمكن ما اترفع لأنو ما ضامنة الا مادة وحدة ..لا و فوق منها بينخاف من شي صدمة و شي ظلم ..بس يالله الله يستر و ما النا غير نتكل على الله ..و الله يصبرنا و ينجحنا ..
و مشكورة حنان ..عطيتينا فرصة نفش خلقنا

دقيقة هاد غير المراقبين ..هدول لحالون حكاية تانية ..و لك في مراقب راقبنا 3 مرات ..الله وكيلكون شكلو متل الوحش ..و مرة عمل شغلة قدامي قرفني عمري و حياتي ..تصورو انو قدامي و هو عالدرج تبع المدرج ..بصق .. يعني و الله العظيم شي مقرف ..هاد عدا انو وقف فوق راسي و بلش يشخر ..و بيضل يطلع و ينزل ركض عالدرج ...لحد ما مرة وقع ..اي والله وقع ..كلنا صرنا نضحك عليه ..بس المراقبين خافوا عليه ..( بيني و بينكون انا خفت عالدرج )
بس خلص طولت عليكون ..

والله بالعكس رورو ضحكتينا ع هادا المراقب اللي وقع

الله لا يقيمو شو دب ... هيك بيعمل معك لكن !!!

وانشالله بتترفعي وبتشيلي كل موادك يا رب

ميرسي اسماعيل .. و انشالله انت كمان بتتخرج هالفصل و ما بتحتاج للتكميلية ..

انشالله رورو والله يسمع مني ومنك يا رب

هالموضوع لازم ياخد جائزة الكتابة الحرة
ههههه
يعني بدنا نحدث ولا حرج
والله كل شي حكيتوه مزبوط وما تركتولي شي ضيفو
هي الحالة عنا وما بتوقع تتغير عن قريب
بس ضحكتيني رورو والله هههههه
وانا كمان بدي 3 مواد لأترفع بس ما ضامن شي
هالفرع ماحدا بيقدر يضمن فيه شي
تحياتي

شكراً نضالو, دوفان, اسماعيل, رورو وسومر على مشاركتكم بالموضوع اللي كتير فرحتني وخصوصاً انو هيدا أول موضوع إلي بالمنتدى

وان شاء الله يكون فعلاً عجبكن
وبعتذر اني اتأخرت بالرد عليكن بس مشاغل الحياة
على كل حال يا رب تترفعوا كلكن وما تحملو ولا مادة

هلّأ صار وقتي أنا لفش خلقي لأني طالعة اليوم رح طق من مادّة الانشاء
أول شي كان السؤال الأول كتير صعب (بالنسبة لإلي) ويمكن ما آخد ولا علامة منو وإذا كان فيو شي صح فهو الجزئين الأول والتاني بس التالت والأهم اللي كان لازم نكتب موضوع فيه فما عملتو
أما المقالة فكتبتها بس الله يستر لأنو هي أول مرة بكتب مقالة بالامتحان (بعد حلقة البحث طبعاً)
واتذكرت بعد ما طلعت اني ما كتبت اني قدمت حلقة بحث
بقا شو رأيكن بالتخبيص اللي خبصتوا اليوم

الله يستر ياحنان ...بس لاتفقدي الأمل لأن مابتعرفي شلون بصححو هدول.

اي بسيطة بسيطة حنان ههههه
انا اول مرة بحياتي بكتب مقالة كانت بالامتحان
ههههههه
والله ونجحوني فيها سبحان الله بلكي انا موهوب

شكراً دوفان وسومر على مروركم الجميل
صلي على النبي يا سومر هلأ بتحسد حالك على موهبتك
وعلى كل حال اللي طلع بإيدي أنا ساويته