قنبلة المواضيع: ارحموا "ابن الحرام"

هلق المعنى الأول الخاص للكلمة هو " ابن الزنا " , أما المعنى الثاني العام فهو " الشخص السيئ عموماً صاحب الأعمال المشينة والحقيرة ". وبما انو في أشخاص كتير حقيرين وأعمالهن دنيئة , بس بالأصل مانن أبناء زنا , يعني بمعنى آخر منقول فلان ابن حرام بأفعاله بس, فهل فكرتوا شي مرة انو ابن الزنا مثلاً ما يكون ابن حرام بالمعنى العام السابق, يعني هو أصلاً ثمرة علاقة غير شرعية , بس هو انسان عادي متلو متلنا يعني مانو انسان سيء أو حقير؟؟؟ هل فكرتوا فيها ولا برأيكم هادا شي مستحيل ؟؟؟
صراحة لا مستحيل ولا شي !!! والقصة بلشت كالتالي:

من شهرين أو أكتر شوي, حضرت برنامج خاص عن دار " زيد " للأيتام بالشام, عالفضائية السورية.
وكان البرنامج معمول بحرفية عالية (لأول مرة طبعاً) يعني كان عبارة عن كاميرا ومكرفون فقط بدون مذيع(ة) مع الأولاد اللي كانوا تلقائيين لدرجة ما بتحس انو واقفين قدام كاميرا. واحد منن كان شب عمره 16 سنة, بلش يحكي عن حياته وتجربته بالدار, وكيف لقوه على باب أحد المساجد وجابوه عالدار, يعني كتير كان متصالح مع حاله, وصدقوني اذا بتشوفوه ما بتتخيلوا انو هادا ممكن يكون ابن زنا أو انو تربية ميتم, يعني كتير وعيان و أكبر من عمره وبيحكي بتفاؤل عن مستقبله بطريقة غريبة و غير مصطنعة !! وهي المأساة الحقيقية؟؟؟
هون بجوز تقولوا عني مجنون, بس انا رحت وسألت أحد الشيوخ وقلتلو: سيدنا هلق ابن الزنا بيخلق طبيعي ولا بكون في شي سيء وشيطاني بالجينات تبعه وبالتالي أكيد لازم يطلع ابن حرام وحقير ؟
فقلي: طبعاً لأ , بيخلق متلو متل كل الناس يعني عالفطرة السليمة, وبعدين بيتغير حسب تربيته ونشأته.
سألتو مرة تانية : طيب إذا هالولد كبر وكان من أجمل وأحسن الناس خلقاً و علماً , هل بيتقبله المجتمع واذا شي يوم راح ليخطب وهو بهالمواصفات الرائعة , فيه بنت بتقبل يكون زوجها وتكمل معو حياتها ؟؟؟ وحتى ان وجدت هالبنت , هل أهلها بيقبلوا وبوافقوا ؟؟؟
هون حطنا الجمّال !!! هادا هو السؤال الصعب اللي الكل ما بيعرف أو ما بيقدر يجاوب عليه واللي ما لقيتله إلا جواب واحد.
انو ابن الزنا اللي بتصرلوا فرصة يتربى تربية ممتازة ويكون قمة بالأخلاق , يعني ما بيطلع ابن حرام مصفي متل ما منقول , بس يوصل لمرحلة خروجه من الميتم بعمر ال 18 رح ينصدم و رح يتعرض لظلم ما بعده ظلم , لأنو المجتمع رح يرفضه لو مهما كانت أخلاقه كويسة !!! ليش ؟ الجواب حقيقةً ما لأنه ابن زنا !!
الجواب الحقيقي لأنو نحنا ناس منافقين وندّعي بأننا متديّنون , و ندّعي بأننا نؤمن بأنه (( لا تزرُ وازرةٌ وزر أخرى )) بس وقت الجد , نحنا ما بس منحاسب هادا الشب ع غلطة أهله اللي ما ارتكبها ولا الو ذنب فيها , نحنا صراحة منحكم عليه بالإعدام , وهون منكون عم نساهم بطريقة غير مباشرة بتحويله من " ابن الزنا " الآدمي إلى " ابن حرام " الحقير . وبعدها منسأل الحق على مين؟؟
الحقيقة ما بنكر إنو مقاربة الموضوع صعبة كتير ما شوي, والمجتمع ما بيرحم , بس الله عم يشوف وعم يراقب وهو أهم من المجتمع . والحقيقة انو الموضوع بدو رجولة وبدو موقف ؟؟؟
بالمناسبة أنا كتبت عن الموضوع من قلبي لأنو صراحة بعرف شب هالسنة صف حادي عشر وقصته كتير قريبة عاللي كتبته وهو طالب شريعة و حافظ للقرآن و أخلاقه غير شكل ... بس شو الفائدة ؟؟؟
صراحة بخاف عليه وبسأل كيف و وين رح يكون مستقبله !!!

الموضوع حساس جدا ... بعض فئات المجتمع "الغالبية" بتنظر للأمر من باب أنو مستحيل تكون تربيتو صح لأنو عاش بالشارع أغلب حياتو وماتلقى عناية الأهل وماعندو نسب ولا حسب......، وفئات أخرى بتنظر للموضوع من باب الشفقة بس كمان مستحيل تتقبلو كزوج أو صديق أو حتى أنسان عادي ......،أنا بعتبر أنو هاد قدروا وحقو بياخدو بالآخرة من أبويه غير الشرعيين ولازم نسعى أنو ندمجو بالمجتمع ونحارب هالنظرة الحقيرة تجاه هالنوع من الناس اللي ذنبهن أنو إجو على دنيا صعبة متل هي، والله ما بينسى حدا.
وأنا بدي أشكرك اسماعيل لأن موضوع جدا حساس ولازم يتناقش.

متميز كالمعتاد بطرحك
كل الشكر إسماعيل
نظرة المجتمع للبنت او الشب اللي اجو بهالطريقه نظره مجرده من الإنسانيه
ومابعتقد في دين سماوي بحمل اطفال ما الن زنب بجيتن ع الدنيا خطأ تنين كانو بكامل قواهم العقليه بس غلطو
المجتمع قاسي بحكمه عليهم والأقسى التنين اللي قدرو يرموه بلا ما تكون عندهم ذرة احساس او مسؤلية تجاه هالبرائه اللي
كسروها وحكمو عليها بنظرة الاستحقار من اغلبية المجتمع
مابعرف شو بيفيد النسب او الجاه ازا ما سئلنا عن نفس الشخص
وماعرفنا شو الشخص اللي بنتعامل معه
مع احترامي الشديد بس للأسف في كتير اصحاب نسب وحسب ومن العائلات المعروفه ومنن ولاد حرام بالمعنى الشخص السيئ عموماً صاحب الأعمال المشينة والحقيرة
شو فاده نسبه ازا كان شخصه مامنيح
بنظري لازم تضاعف الجهود لنمحي هالفكره من عقول العالم ولنوصل المعنى الحقيقي لأهمية الشخص والمبادئ الاساسية لنظرتنا للشخص شو ما كان وضعه
بكــرر شكري

يعني بصراحة إسماعيل
ما بعرف لأيا حد أنو واحد بهيك ظروف رح تكون شخصيتو كويسة
يعني معقول الله يبعت واحد مؤمن ويكون ابن زنا ؟
ما بتصور أنو الموضوع مرتبط بس بنفاقنا ..وإنما هوي لعنة من الله عالشخص
وهادا رفيقك إلا ما يكون في جانب مخفي ..بس أكيد جانب رهيب أنتى ما كنت بتتصور وجوده.
***
بجوز كون غلطان
بس رح ضل فكر بالموضوع بضوء الإسلام لحتى وصل لحل منطقي
وآسف إذا كان رأيي قاسي

أول شي بدي أشكر كل شخص علق عالموضوع وأعطى رأيه بصراحة
تاني شي أنا صحيح قلت انو الموضوع قنبلة بس ما كان بدي ياه يروح لمحل تاني وتنفجر القنبلة بغير مكانها الصحيح

أبو خالد : بحترم رأيك بخصوص اللعنة , مع اني ما بتفق معك فيها لأنو مافي قانون ولا دليل علمي أو غير علمي بقول بصحة هالافتراض و هالشي
ملاحظة:
أنا بدي اعتذر من أبو خالد أولا لأني حذفت جزء من ردك اللي ما كان قاسي وبس كان جارح لناس كتير وانت بتعرف هالشي وكان فيك ببساطة تعلق عالموضوع متل ما بدك بدون ما تروح ع مكان تاني
وكمان من سوسن اللي حذفت ردها على كلام أبو خالد
يعني ما حدا يزعل أنا حذفت الرأيين المتناقضين لسبب واحد اني ما بقبل وعلى الأقل بموضوع من كتابتي انو يتم سب أو لعن أي شخص ممكن يكون رمز أو قيمة لو مهما كانت صغيرة عند أي طائفة من الطوائف جميعاً
بحترم رأي الكل بس نحنا هون ما لحتى نسب حدا وإلا ما منخلص وكل واحد ممكن يرد بطريقة جارحة أكتر من التاني

موضوع كتير حساس
بالمناسبة طلعت حلقة عنو كتير كتير قريب عالموضوع بمسلسل اهل الغرام او يمكن سيرة الحب
نسيت والله
بكون عبد المنعم عمايري هو اللي ما معروف نسبو
الصراحة كتير القصة فيها معاناة
بالنسبة لأنو الله يمكن لعنو انا ضد هالشي تماما
لأنو هاد اسمو تعميم على جميع الحالات الصحية و الإعاقات و الخلل الجيني بالمجتمعات
هدول معقول كلن الله لعنن
مستحيل
لكن ليش النبي عليه الصلاة و السلام اوصانا بالأيتام و المشردين و الفقراء
هدول الأيتام ما قال النبي(ص)انو اللي مات ابوهن وامهن وبس
هاد رأيي هالناس متلنا باستثناء مصيبة فوق راسن
الله يرفق بالجميع

مشكوووور سومر
برأيي رأيك منطقي

مرحبا
اول شي شكرا اسماعيل على طرح موضوع بهالاهمية والحساسية ... الحقيقة انك ناقشتو بكتير من الموضوعية و الواقعية ..لحد اني ما عاد اعرف شو بدي رد ..يعني انت قلت كل اللي بينقال ...

بس اكيد بالنسبة لانو هي لعنة من عند الله ..ابدا انا ماني مع هالفكرة ..بل برفضها رفض قاطع ..لأنو الله ما خلق حدا ليعذبوا او ليهينوا ...

هلق نحن بطبيعتنا مجتمع ازدواجي ومنافق .. منحكي شي بس بالحقيقة منضمر شي تاني خالص .. كل العالم بتنظر على هالشخص " اللي برفض تسميته ابن حرام , نظرا لانو ابن حرام بتعني انسان سيء " انو يا حرام والكل بيشفق عليه و الكل بيقول يا حرام .. لا والكل معجب باجتهادو و اخلاقو الحميدة ..بس بنفس الوقت كل ما دق الكوز بالجرة ...منشوف هالعالم رجعت لخلفيتها و عقليتها المتخلفين .. و بيهمسو بين بعض " هاد ابن الحرام " ... وين راح حكيون عن الرحمة و العدالة ؟؟؟
الحقيقة هاد نحن واقعنا و مجتمعنا ...مجتمع ما شاطر غير بالحكي ... لازم كل واحد يبدا من نفسو ليحصل التغيير ...او خليني قول التطوير..تطوير نفوسنا و عقولنا نحو الانسانية ...
و تعليق اخير بالنسبة لأنو هل هو ابن حسب و نسب ... ام هل هو ابن عائلة جيدة او محترمة ؟؟؟
انا برايي كل هاد ما مهم " لشخص متل حالتو طبعا " لأنو اساسا مانو ربيان مع هالعيلة .. بالتالي مانو متطبع بطباعهون ولا اخد من اخلاقهون و لا خاضع لتربيتهون " سواء كانت سيئة ام جيدة " ...هلق متل ما منعرف لما بيتقدم اي شب لخطبة اي بنت بيسالوا عنو ليعرفوا كيف ربيان كيف اخلاقوا كيف سمعتوا من خلال سمعة عيلتو و اخلاقهون ... بس هون شو الفرق ؟؟؟ هون المهم اخلاقوا هو ... سمعتوا هو ... ظروفو هو ..مو اي حدا تاني .. فبرايي ما في مشكلة كونوه " لقيط " لأنو بالنهاية الذنب مو ذنبوا ...
و اسفة اذا طولت عليكون .. بس حبيت احكي رايي من دون اختصار هالمرة ..

ملاحظة : انا هالحكي اللي حكيتو كان على ضوء انو هذا الانسان جيد ...و ليس سيئ ..و الا كان الحكم عليه متلو متل اي انسان سيء تاني ان كان لقيطا ام لا ....

موضوع رائع اسماعيل و مشكور

بالنسبة لابن الزنا انا صراحة ما بنظرلو اي نظرة استخفاف و انقاص قيمة لانو بجوز يكون افهم من كل الناس و اذكى من الناس و احلى من كل الناس و مزوق قد كل الناس


و ابدا ابدا هي ما نها لعنة من عند الله و انا مسؤول عن كلامي امام رب العالمين

لانو اذا بدنا نعتبرها لعنة فلازم كل واحد فينا يعتبر حالو ملعون على اي شي سيء عم بيصير بحياتو

و خلينا ننظر شوي لدول اوروبا رح نلاقي انو تلت ارباعهم اولاد علاقات غير شرعية و عم نشوفهم كيف عم يأبدعو و يشتغلو بحياتهم و يكونو مفيدين متل اي شخص عادي

لهيك بعتقد الامور الها علاقة بشي من تزمتنا و تعصبنا و اعماء نظرنا عن المنطق و العقل و اتباع الشي اللي فرضو علينا مجتمع التزمت و التعصب و يلي بامكان كل شخص فينا يتخلص منو

و منشان ابو خالد
بموضوع الكتاب (ثم اهتديت) انا حسيت في نوع من الفكر الديني بمجرد طرح الكتاب و اكيد لازم كل واحد فينا يكون عندو اطلاع على هيك امور منشان يميز الصح من الغلط بس مو لدرجة التعصب عهيك موضوع لانو صراحة البيئة اللي بينشأ فيها ابن الزنا و اي انسان اخر هي اللي بتأثر على شخصيتو و تصرفاتو

شكرا اسماعيلوووووو موضوع يستحق النقاش و تحية لابو خالد الرأي الاخر

على فكرة أنا ما بنزل هيك موضوع لحتى أسمع كلمة شكراً
وبالتالي أنا بكون سعيد لما بتكتبوا وبتقولوا وبتعبروا عن أفكاركم بصراحة و باحترام
وبنبسط أكتر لما ما بتختصروا وبتقولوا كل شي متل ما لازم ينقال
رورو: مشكورة كتير وكتبت شي أهم من موضوعي كلو .
نضالو : متل العادة رأينا متقارب وكل الشكر لكلامك القيّم .
مشاركة كل واحد فيكن بهالموضوع بعتبرها إضافة قيّمة وهيدي حقيقة وليست مجاملة.
والحقيقة أنا أول شي ترددت أطرح أمور حساسة , بس اليوم أثبتوا أنو نحنا قادرين نناقش أي موضوع مهم بهالمنتدى الرائع
مشكورين أصحاب الرأي والرأي الآخر ....

Isma3el كتب:

أول شي بدي أشكر كل شخص علق عالموضوع وأعطى رأيه بصراحة
تاني شي أنا صحيح قلت انو الموضوع قنبلة بس ما كان بدي ياه يروح لمحل تاني وتنفجر القنبلة بغير مكانها الصحيح

أبو خالد : بحترم رأيك بخصوص اللعنة , مع اني ما بتفق معك فيها لأنو مافي قانون ولا دليل علمي أو غير علمي بقول بصحة هالافتراض و هالشي
ملاحظة:
أنا بدي اعتذر من أبو خالد أولا لأني حذفت جزء من ردك اللي ما كان قاسي وبس كان جارح لناس كتير وانت بتعرف هالشي وكان فيك ببساطة تعلق عالموضوع متل ما بدك بدون ما تروح ع مكان تاني
وكمان من سوسن اللي حذفت ردها على كلام أبو خالد
يعني ما حدا يزعل أنا حذفت الرأيين المتناقضين لسبب واحد اني ما بقبل وعلى الأقل بموضوع من كتابتي انو يتم سب أو لعن أي شخص ممكن يكون رمز أو قيمة لو مهما كانت صغيرة عند أي طائفة من الطوائف جميعاً
بحترم رأي الكل بس نحنا هون ما لحتى نسب حدا وإلا ما منخلص وكل واحد ممكن يرد بطريقة جارحة أكتر من التاني

إسماعيل أنا بس كنت عمأعطي مثال من التاريخ
بعرف انو ما بدك تدخل بهيك شغلات بس أنا حقي وضح للناس مين هنن هالرموز التاريخية يلي عمينحكى عنا
يعني كمان أنا هون ضاع حقي بالتعبير
بس أنا بعذرك لأنو مع كل أسف الشخصيات السيئة كتير شبه مقدسة ...
في حكي كتير بهالموضوع ..بس مو هون مكانو
بس عفواً إسماعيل للتوضيح أنا ما بسيء لأي مجموعة لأنو هدفي الوحدة
بتمنى انفهم مزبوط

nedalo كتب:

موضوع رائع اسماعيل و مشكور
و منشان ابو خالد
بموضوع الكتاب (ثم اهتديت) انا حسيت في نوع من الفكر الديني بمجرد طرح الكتاب و اكيد لازم كل واحد فينا يكون عندو اطلاع على هيك امور منشان يميز الصح من الغلط بس مو لدرجة التعصب عهيك موضوع لانو صراحة البيئة اللي بينشأ فيها ابن الزنا و اي انسان اخر هي اللي بتأثر على شخصيتو و تصرفاتو

شكرا اسماعيلوووووو موضوع يستحق النقاش و تحية لابو خالد الرأي الاخر

نضالو انتى عمتقول بحقي شغلات ماني قايلا وبعدين عمتحاسبني عأساسا
يعني كيف ربطت بين موضوعي هداك ومشاركتي هون؟شي غريب
وإذا أنتى مانك متدين فأنا بحترم هالشي بس لا تقول أنو أنا متعصب إذا كنت مانك متدين
لأنو بصراحة مو شرط تكون قاعدتك بعدم التدين هي الصواب المطلق وهيك بطلع أنا متحجر وأنت متحرر
ما بحقلك تقيم الأشخاص وفق مفهومك الشخصي ، وخاصة أنو ممكن يكون غلط

أبو خالد كتب:

يعني بصراحة إسماعيل
ما بعرف لأيا حد أنو واحد بهيك ظروف رح تكون شخصيتو كويسة
بجوز كون غلطان
بس رح ضل فكر بالموضوع بضوء الإسلام لحتى وصل لحل منطقي
وآسف إذا كان رأيي قاسي

يعني ليش الكلام يلي بالأحمر ماحدا شافو ؟
يعني وجهة نظري يلي طرحتا بموضوعية واحترام
بصراحة في تحامل كبير بالتعليقات يلي لمحت أوتناولت كلامي
وكان في كل واحد يطرح وجهة النظر المناقضة باحترام وبدون محاولات مكشوفة لتسخيف لرأيي..يعني عيب هيك
خاصة أني وضحت أنو مانو رأيي الأخير وإنما رح أدرسو بضوء الإسلام لحتى وصل لرأي بقتنع قي مية بالمية
طبعاً التحامل من البعض مو الكل

أنا بحترم رأيك و وجهة نظرك أبو خالد وأنا اذا بتلاحظ ما حذفت شي بأثر ع رأيك بالموضوع اللي عم نحكي عنو , أما قصة الشخصيات التاريخية , فنحنا بالأساس ما عم نحكي عنن ولا هنن موضوعنا أصلاً , بتمنى تكون فهمت تصرفي وانا أبداً ماني ضدك شخصياً
بالعكس سعيد بمشاركتك بس متل ما انت بتعتبر بعض الشخصيات غير مقدسة عندك , غيرك بشوفن غير هيك , والعكس صحيح يعني انت كمان بتشوف بعض الشخصيات مقدسة , ممكن حدا تاني يشوفن غير هيك ....
بالمختصر ما هادا موضوعنا حبيب القلب وما بدنا نعمل حساسيات مالها طعمة و خلي الشخصيات التاريخية بالتاريخ وكل واحد بشوفها من عندو , لأنو ما بقدر خلي الموضوع يصير حرب شتائم .
وكلامك بالأحمر أنا قرأته وبحترمه و بدل على فهم وعقلانية وانا معك فيه.

موضوع مهم وحاس بنفس الوقت مشكور اسماعيل عالطرح

ما بعرف بعد يلي كتبتوه شو بدي رد يعني ما خليتو شي
شفنا القليل من البرامج والسكيتشات بدرامتنا السورية طرحت هي المشكلة وبشوف انو لازم نكتر منها مشان التوعية والتثقيف بشكل عااااااام.........والمشكلة الحقيقية تكمن بالتفكير السائد المغلوط عند معظم الناس بمجتمعنا تجاه هاد النوع من الاشخاص اللي بالنهاية بيجوز هاد النقص اللي فرضو عليهم المجتمع يكون المحفز الاساسي الن ليكونو افضل من "الناس الطبيعيين"
"من نظرة المجتمع التافهة" او العكس.............
في مثل يقلك:" الآباء يأكلون الحصرم........والأبناء يضرسون....."
وهاد مانو سبب لتحقير "ابناء الزنا" لانو بالنهاية ازا كل واحد صحح اغلاطو قبل ما يحكم عالاخرين بالاحتقار والازدراء ما رح نشوف هي النظرة الغلط
السيد المسيح بيقول بالكتاب المقدس "و لماذا تنظر القذى الذي في عين اخيك و اما الخشبة التي في عينك فلا تفطن لها"

وابداً مالازم نحكم عالشخص من منطلق اسمو وعيلتو او دينو لانو بالنهاية انســـــــــــــــــــــــــــــان ولازم نعاملو على هالاساس

تقبل مروري

موضوع مهم وحساس بنفس الوقت مشكور اسماعيل عالطرح

ما بعرف بعد يلي كتبتوه شو بدي رد يعني ما خليتو شي
شفنا القليل من البرامج والسكيتشات بدرامتنا السورية طرحت هي المشكلة وبشوف انو لازم نكتر منها مشان التوعية والتثقيف بشكل عااااااام.........والمشكلة الحقيقية تكمن بالتفكير السائد المغلوط عند معظم الناس بمجتمعنا تجاه هاد النوع من الاشخاص اللي بالنهاية بيجوز هاد النقص اللي فرضو عليهم المجتمع يكون المحفز الاساسي الن ليكونو افضل من "الناس الطبيعيين"
"من نظرة المجتمع التافهة" او العكس.............
في مثل يقلك:" الآباء يأكلون الحصرم........والأبناء يضرسون....."
وهاد مانو سبب لتحقير "ابناء الزنا" لانو بالنهاية ازا كل واحد صحح اغلاطو قبل ما يحكم عالاخرين بالاحتقار والازدراء ما رح نشوف هي النظرة الغلط
السيد المسيح بيقول بالكتاب المقدس "و لماذا تنظر القذى الذي في عين اخيك و اما الخشبة التي في عينك فلا تفطن لها"

وابداً مالازم نحكم عالشخص من منطلق اسمو وعيلتو او دينو لانو بالنهاية انســـــــــــــــــــــــــــــان ولازم نعاملو على هالاساس

تقبل مروري

والله مرورك روميو إضافة كبيرة وقيّمة للموضوع
مشكوووووووووور كتيييييييييييييير

والله يا ابو خالد الغالي رح قللك كيف ربطت بين الموضوعين

اولا طرحت كتاب ديني قليل التداول بأوساط الشباب و بحييك لانو كتاب رائع و مفيد للي بدو يستفاد

و تانيا تعليقك بموضوع ابن الحرام هو اللي خلاني رد بهالطريقة يلي ما فيها اي مس بشخصيتك و بمعتقداتك وبميولك و لو اختلفنا بالفكر بس ما بيعني نزعل و نتقاتل

بعدين انا ما قلتللك اني ماني متدين و انا من اشد المعجبين بديانتنا القائمة على العقل قبل كل شيء و لما بدك تعتبر ابن الزنا ملعون فبدك تسمحلي لانو هالشي تعصب و متل ما قلتللك قبل اذا كان ابن الزنا ملعون فنحنا كمان لازم نعتبر حالنا من الملاعين بسبب الاشياء السيئة يلي عم تصيبنا بحياتنا

و كمان بقللك اني ما بعتبر نفسي اني صح و غيري خطأ لا بالعكس في ناس متدينين جدا جدا و عندهم فكر منفتح عالجميع ومستوعب للجميع و هادا الشي الي امر فيه الاسلام من 1431 سنةهجرية

و بالنهاية انا ما قصدت ازعجك ابدا و نحنا هون لنفيد و نستفيد من بعض و بكرر اي فكرة بطرحها هي تعبير عن رأيي الشخصي و ليس بالضرورة يكون صح بنظر الاخرين

بس كلمة (لعنة عالشخص) يلي استخدمتا أنا هيي بالعامية
وهيي غير (لعنة الله على الظالمين)مثلاً ، يلي بالفصحى
فلو كانت بالفصحى ،يعني لو عمألعنو أنا بطريقة موجهة وقتا كان بحقلك تقول أنو في مبالغة أو تعصب
بس كلامي كان واضح ..مثل مثلاً بتغلط مع شي واحد ..وبعدين بتصيبك شغلة ..بقلولك ..هي لعنة فلان
****
عكل نحنا أصدقاء ..المهم عندي ما حدا يتحامل عليي
وبقبل أي رأي بينطرح باحترام

أكيد أبو خالد ما حدا قاصد يتحامل عليك يعني ممكن يصير اختلاف بالأفكار والعقائد و وجهات النظر , بس بين الأعضاء كأشخاص ما بصير خلاف انشالله
واختلافنا عن بعض هو نعمة وليس نقمة ولازم نعرف كيف نركز عالأشياء اللي بتجمعنا.
وبتمنى نضل محافظين ع مشاعر الطرف الآخر أياً تكن آراءه أو معتقداته .
كل الشكر الك ولكل مين ساهم و أضاف للموضوع

ابو خالد
اكيد نحنا اصدقاء و هالحركة بالاتجاهين بتعطي نكهة و مصداقية اكبر لمنتدانا و اكيد مهما اختلفنا بالافكار منضل اخوة بوطننا الحبيب سوريا

أهلين بالشباب
إسماعيل ونضالو