هام لحملة مادتي النقد و اللغة >>> التظلم عند العميد

أكيد الغالبية الساحقة من طلاب السنتين التالتة و الرابعة عندهم معاناة كبيرة من هالمادتين
حتى سمعنا قصص كتيرة عن هالموضوع
وصلت لدرجة انو ناس وقفوا تخرجهم لحتى يتغيروا الدكاترة :!:
و شفنا كم مثال بموضوع سومر و بمواضيع تانية
[ندعوك للتسجيل في المنتدى أو التعريف بنفسك لمعاينة هذا الرابط]
المهم
الحق على الطلاب أو المنهاج أو الدكتور ما بيهم
المهم انو هالوضع مو طبيعي و لازم ينحكى فيه
رورو اقترحت فكرة الشكوى عند العميد لما بيجي الدكتور يوم الأحد
و عجبتني هالفكرة كخطوة أولى صحيحة
سألت عن الموعد بس ما حدا رد
و لهيك حابب قول لمين حابب يحكي قصته أو يشتكي على نمط الأسئلة أو الدكاترة أو أي شي
حتى يلاقيلنا عند السيد عميد الكلية يوم الأحد الساعة 11
و اللي بيجي أبكر يا ريت ينطر عند باب الكلية
و اللي حابب يفيدنا بأي معلومة أو ملاحظة حتى نقولها يا ريت يرد ع الموضوع
و اللي خطرلي بموضوع سومر شغلتين :

اقتباس :

- عدد الطلاب الراسبين و نسبة النجاح المتدنية دليل على عدم أهلية الدكتور للتعليم ! موصحيح ؟
- ليش من مصلحة الدكتور المادية انو يرسب الطلاب ؟؟؟!!!

بعتقد الكل بيعرف انو الدكتور بياخد 8 ليرات على كل دفتر بيصلحه
و إذا افترضنا انو شي دكتور رسب 1500 طالب بمختلف السنوات بشي دورة
هادا يعني انو بيقبض 12000 زيادة

و شغلة أخيرة مهمة :
يا ريت ما حدا يقلل الاحترام مع عميد الكلية
أو يعمل أي نوع من أنواع الفوضى
خلينا نكون حضاريين و نحكي بكل احترام و هدوء مع العميد
و ان شالله بيصير تغيير ايجابي بالموضوع

تحياتي للجميع و مع تمنياتي الكم بالتوفيق

و بالنسبة لمشاركتي بالمنتدى للي بيعرف مشكلتي مع الإدارة هون
هاد الموضوع (حالة شاذة)
و رح ضل منقطع عن المشاركة (الفعلية) لحين إلغاء صندوق أفضل 10 أعضاء ع الأقل بالمواضيع العادية

تحياتي

ما بعرف ليش ما حدا رد ع الموضوع
.................للرفع..................

انا مع الفكرة لان ادارة الكلية لازم تسمع شكاوي الطلاب
بلكي انشالله بيطلع نتيجه بس اهم شي متل ماحكيت
الاحترام ومايتسبب الموضوع ب فوضى ترجع علينا
بنتيجه سلبيه

شكراً كتير روز ع المساندة



اليوم حكيت كذا واحد من رفقاتي بخصوص الموضوع

و الكل تقريباً عبر عن خوفه من العواقب

و كأنه إذا ما حدا حكا رح يكون الوضع مختلف !!!

و بموضوعي هون ما حدا رد غير روز



عموماً

أنا رح حكي العميد و لو كنت لحالي بكرا



تحياتي

بأولادي يا ابو حميد لو اني انكليزي كنت رحت معكن

بس عنجد برافو و لازم تروحو اذا في ظلم

كيفكن ياجماعة
انا هلأ شفت الموضوع يعني اتأخرت كتتتتتتتيييييييير
الموضوع راااااااااائع ولازم نتفق على موعد تاني ونشوف العميد
حاجتنا صرلنا من السنة الاولى ساكتين والدكاترة واهميننا ان نحن السبب برسوبنا
انا عن نفسي موافقة لان مامعقول يلي صار هالسنة فينا خاصة بهالمادتين ومتلهم متايل
نحن مو رايحين لانعيط ولا نساوي فوضى من حقنا نلفت نظر العميد عن يلي عم يصير احسن ما حدا من برا يلفتله نظره.........

الشكوى لغير الله مذلة يعني اذا رحنا واشتكينا للعميد رح يغيّر استاذ المادة !!!!!!!

بس يا عاشق اسبانيا .. الساكت عن الحق شيطان اخرس .. انا حكيت كتير و شجعتون كتير مع انو ما الي علاقة بالموضوع .. بعدين دريت انهون ما راحو ولا شي .. انقهرت كتير .. بجوز ما كانوا قدروا يعملوا شي بس عالقليلة منكون طلعنا من السكون و الاستسلام اللي نحن فيه ..

معك حق احمد
وانا مو انكليزي
والله الشغلة زادت عن حدها وان شاء الله يطلع معكن شي

موفقين جميعا

يا جماعة انا برأيي انو يمكن ينقلب هالحكي ضدنا يعني اذا رحنا رح نكون بالكتير عشرة.... وهالعدد ما بيعبر عن رأي ٣٥٠٠ طالب ...ويمكن يلتئم الدكتور من ورا هالشكوا وخدو بقى عرسوب على ابو جنب........ انا شخصيا برأيي انو ناويين يخلصو من طلاب الرابعة هالسنة لانو نحنا بنصير عبء عليهون عالنظام الجديد ومشان هيك عملو هالاستثنائية....فاسمعوا مني وادرسو لهالامتحان احسن شي....لانو بجامعتنا فالج لا تعالج

اسمحولي قلكوا انو
بهالكليه ما حا ل حا
و ما في حا بيحب حا

أنا رحت حكيت دكتور ماده سنه تانيه الكل عم يعاني من مادتو

و شو النتيجه؟؟
اقدمها للدوره السابعه على التوالي

اية و عصام و سوسو ..بس حبيت قلكون انو هالحكي قديم شوي .. يعني من اول ما طلعت مادة اللغة ف 1 .. بس ما بعرف مين طلعوا للموضوع ..يعني خلص فات الاوان .. ما عاد رح نعمل شي غير انو ندرس لهالدورة و بس ..

I think we have to go to the head of the department if that happens again

بصراحة أنا بعد ما نقلت على جامعة تشرين بالسنة الرابعة علقت و معد إلي نفس على شي إسمو دراسة ولا تقديم.. صرلي 3 سنين بالرابعة و عنجد ظلم بالتصحيح بس إزا حكينا رحح يكون في نتيجة؟ يمكن مايكون في نتيجة بس أنا مع إنو نروح ونحكي بس لازم يكونوا الطلاب اللي بدن يحكوا كتار لأنو إزا كم واحد ما رح يعبروا عن الكل...
بالتوفيق للجميع

طبعا يا جماعةاكيد لازم نحكي وما نسكت..حاجة بهدلة وذل بقى..الموضوع كتير حساس وخطر..لايمتى بدنا نترك هالكم دكتورالمعقدين يتحكموا بمستقبلنا ومصيرنا..لازم نرجع نحكي ونتفق على موضوع الشكوى للعميد..وانا برأيي انونكبر الموضوع اكتر ونطلع على اتحاد الطلبة..ما معقولة نجمع 3500 طالب ونجيبهم لعند العميد..الاحسن يكون عدد مقبول 10 -15 طالب بيحكوا باسم طلاب الكليةاو في اقتراح تاني.. منعمل ورقة شكوى او اعتراض او تظلم شو ماكان اسما يكون ونخلي كل شي في طلاب عنا بالكلية يوقعو عليها بالاسم والرقم الجامعي...غير هيك ما في حل ..وحتى بهالطريقة يمكن ما يكون في حل...بس عالقليلة ما نضل خايفين وساكتين..نحنا شباب وصبايا واعيين ومثقفين ما لازم نخلي حدا يلعب فينا او يضحك علينا...ويلي بيحكي معكم كلمة وحدة بخصوص هالموضوع..ذكروه بكلمة القائد الخالد حافظ الاسد: "لا أريد لأحد أن يسكت عن الخطأ أو أن يتستر عن العيوب والنواقص".....الشغلة بدها شوية جرأة وشجاعة ..وشكرا لكل الزملاء