هل إيذاء مشاعر الآخرين حرية شخصية؟ إعلان الإفطار في رمضان نموذجاً ...

كنت عم أتصفح بعض المقالات في النت ولفت نظري هذا العنوان في موقع سيريا نيوز
وقرأت المقال وهو بقلم ((سهير علي أومري)) وصراحة حبيت أطرح الموضوع عليكم ...
و تبدأ الكاتبة مقالها بتعريف مفهوم "الحرية الشخصية" :

تعريف الحرية الشخصية:
منذ أن كنا في المدرسة تعلمنا معنى الحرية الشخصية، وفهمنا ما وضعه الإعلان الفرنسي لحقوق الإنسان في 26 آب من العام 1789م بأن الحرية الشخصية هي: "حق الفرد في أن يفعل ما لا يضر بالآخرين" رددنا هذا التعريف كثيراً مع أمثلة توضحه تتمثل في أنّ من حقنا مثلاً أن نستمع إلى المذياع، ولكن ليس من حقنا أن نقلق راحة الجوار بصوته... ولكن مع تفجر الثورة المعرفية وتضارب مقومات الحضارة، وتعاظم المادة وسيطرتها على أنماط الحياة صارت الحرية الشخصية رغم تعريفها المتفق عليه من حيث العموم ظهر على الساحة اختلاف فيما يعنيه هذا التعريف، وأقصد هنا عبارة (ما لا يضر بالآخرين) حيث ظهر اختلاف في معنى الضرر... ما هو؟ وما مقياسه؟ وما نوعه؟ وهكذا صار كل فرد وكل مواطن يعطي هذا الضرر تعريفاً يتوافق مع منظومته هو، الفكرية والثقافية والنفسية وحتى الاجتماعية... بمعنى آخر صار كل فرد يحدد ما يضر بالآخرين قياساًَ على ما يضره هو... عندها صار من الطبيعي أن تسمع من شخص يرفع صوت المذياع عالياً يقول: أنا حر هذه حرية شخصية... أنا في بيتي أفعل ما أشاء.. ثم ما ضرر الصوت المرتفع بالنسبة لجاري؟؟ الصوت المرتفع جميل والأغاني التي أسمعها تطرب كثيراً...

إذن لم يعد المختلف عليه في الحرية الشخصية هو تعريفها بل هو مدلول هذا التعريف أي تحديد مفهوم الضرر الذي يزعج الآخرين...

وهنا أصل إلى موضوعي فبعد أيام يطرق شهر رمضان المبارك فنستقبله محاولين الالتزام بأحكامه وآدابه…. نستعين بالله على صيامه وخاصة أنه يزورنا هذا العام في غمرة هذا الحر الشديد……

وعندما نبدأ الصيام وتبدأ الأيام تتوالى... تتزايد مشاهداتنا لمفطرين هنا، ومفطرين هناك…

وكل منهم لسان حاله يقول للصائم: أنت تصوم ولكن غيرك لا يصوم ومن حقي أن آكل وأشرب في كل مكان هذه حريتي الشخصية وأنا لا أضرك في شيء... ما الضرر في أن تشاهدني آكل واشرب وأدخن أمامك هل ستجبرني على الصيام، ثم ألا تعلم أن من الممكن أن أكون مفطراً لعذر شرعي أو من الممكن أيضاً ألا أكون مسلماً أصلاً...

وهنا سأتوقف لمناقشة هذه الفكرة وأنا مدركة أنني أمام ثلاث حالات للمفطرين وهي: المفطرون من المسلمين لغير عذر شرعي، والمفطرون منهم لعذر شرعي، وغير المسلمين...

فالقناعات بالتأكيد حرية شخصية... إذن سأتحدث مع الجميع من منطلق اجتماعي وحتى وطني... متوقفة عند إثبات مفهوم الضرر الناتج عن إعلان إفطارهم في رمضان:

1- لقد كانت بلدنا منذ القديم موطناً للتعايش والتآلف، فعندما يفرح بيت تفرح معه كل البيوت، وعندما يحزن بيت تحزن معه كل البيوت كل ذلك كان يحدث في بلدنا على اختلاف أطياف الناس ومللهم وأديانهم، وذلك لما تحلى به هؤلاء الناس من مشاعر المحبة والتعاطف تجاه بعضهم البعض، وهذا ليس عن زمننا ببعيد وكان من أبرز مظاهره هذه المحبة والتعاطف تقدير مشاعر الناس بعضهم لبعض، واحترام شعائرهم وأعيادهم، ولا يخفى على أحد ما في إعلان الإفطار في رمضان من إزعاج لمشاعر الصائمين وزعزعة للتماسك الاجتماعي بين أبناء بلدنا الحبيب..

2- عدم الاكتراث بمشاعر الأغلبية والمنظومة العامة لأي مكان ضرر عام.... سيقول قائل الآن: من قال إن غالبية الناس في بلدنا صائمون..!! أقول: يكفي أن النظام العام للبلد تقدر أمر الصيام، وتتغير وفق ما يقتضيه هذا الشهر الكريم، فأوقات الدوام تتغير بكل ما في ذلك من مؤسسات ووزارات وهيئات تعليمية ومرافق صحية وخدمية سواء أكانت عامة أو خاصة... كل وسائل الإعلام يتغير نظام عملها وبثها وتراعي هذا الشهر الكريم، إذن كل المنظومة الاجتماعية تتغير وفق ما يناسب أوقات الصيام، وهنا يأتي ظهور غير الصائمين ومجاهرتهم بالإفطار في رمضان ضرر عام لما في ذلك من عدم اكتراثهم بالمنظومة العامة للمجتمع بل ومخالفتها...

ربما يقول قائل أيضاً: إنني أفطر دائماً أمام أصدقائي وأقاربي، وليس فيهم من ينزعج من إفطاري، وإلى هذا أقول: حسناً ليكن إفطارك علناً أمام من تضمن عدم انزعاجه، وأمام من تضمن أنه لا يوافق لك بالتدخين وشرب القهوة حياء منك.... بمعنى آخر عندما تريد أن تعلن إفطارك اسأل كل الناس من حولك إن كانوا يتأذون بإفطارك أولا.... أما أن تتخذ قرارك بإعلان إفطارك دون أن تكترث بمشاعرهم ورأيهم فهذا ضرر وتجاوز لما يحق لك إلى ما لا يحق....

خلاصة القول:
شهر رمضان شهر له قدسيته ومكانته في نفوس المسلمين، والصائمون أغلبهم تتأذى مشاعرهم من رؤية المجاهرين بإفطارهم ليس لأنهم عندما يرون من يأكل ويشرب سيتذكرون الطعام والشراب فيزداد جوعهم وعطشهم، بل لما في هذه المجاهرة من عدم اكتراث بهم وبمشاعرهم، ومحاولة للمساس بقدسية هذا الشهر الذي يعنيهم والذي يكنون له مشاعر خاصة... ولأن المجاهرة ترتبط لديهم بمنظومة فكرية دينية متأصلة ترتبط بتعاليم الدين وثوابته، وربما كان من الصعب إقناع غير الصائمين بها...

وإن تحفظ المفطرين على إفطارهم وعدم إعلانه ليس قمعاً لهم، وليس اعتداء على حريتهم الشخصية، بل هو تقدير منهم لمشاعر الصائمين وحرصٌ منهم على الوحدة الاجتماعية، ومراعاة للمنظومة العامة للبلد...

وختاماً لكلامي أرسل تحية لزميلة عمل قديمة جمعتني بها أيام كنا فيها ندرِّس في مدرسة واحدة كانت مسيحية لكنها كانت في رمضان تأبى أن تأكل أو تشرب أمامنا، وفوق هذا كانت تطلب منا أن نعلمها متى تكون ليلة القدر لتدعو الله في تلك الليلة، ولتصوم معنا اليوم الذي يليه....فتحية كبيرة لها ولكل عرف حدود الحرية الشخصية فوقف عندها....

كلام سليم ...... ومقال هام جدا جدا
أحسن شي بهالحالة الواحد يطنش وما يحملها أكتر من اللازم.

دوفانو الغالي
أكيد الواحد فينو ببساطة يطنش
بس أنا كانت غايتي طرح الموضوع للنقاش واستكشاف للآراء
مشكووووور ع مرورك وعلى رأيك

كان عندي رفيق عزيز عليي هو مسيحي لما كان يشوف انو حدا فينا صايم ما يدخن ولا ياكل ولا يشرب قدامو حتى احيانا كان يضل لوقت متاخر بدون اكل وشرب بس ليراعي شعور الصايم مع انو مو مجبور فهي برايي احترام للذات واحترام لمشاعر الاخرين وبتختلف بين شخص واخر ما بعتقد بين طائفة دينية واخرى

أكيد أكيد علي نحنا هون ما عم نحكي عن طوائف وأديان
قد ما عم نحكي عن مشاعر وأخلاق انسانية بحتة
يعني في مسلمين ما بصوموا !!!
وبالنسبة لصديقك ... فنعمَ الصديق والله
مشكووووووووووووووور

اللهم اجعلنا ممن يورثون الجنان
ويبشرون بروح وريحان
ورب راض غير غضبان
آمين يااااااااارب
معك حق اسماعيل ومتل ماقلت
الشغلة مالها علاقة بالشرائع والطوائف
القصد هو الإحترام
وفعلاً بنلاقي عدم الإحترام من المسلمين اكتر من البقية
شكراً كتير كتير والله يجزيك كل خير يارب
ويتقبل منا بها الشهر الكريم
ويرزقك كل خير ويحققلك لي ببالك ولي ببال كل عضو
وببال كل إنسان بدو يصوم

يعطيك العافيه
إسماعيل
طرح مميز وبوقته
بالنسبه الي الموضوع متل ماقلت ما بيتعلق بأديان وطوائف وعقليات
أد ما بيتعلق بالذوق والمشاعر الإنسانية
احترام الشخص لمشاعر غيره مو بس بالصيام
بكل مناسبات حياتنا شغله كتير حلوه
كــل الشكر مره تانيه

شكراً ع مروركم القيّم صبايا
آية & سوسن

يعني شو وإذا جاهر بإفطاره الصايم اللي ينزعج من هل الشي مع الاسف بكون منافق وصايم بحكم العادة مو إرضاءا لربه وبكون عم يحسد الآخر لقيامه بشي (الأكل) هو غير قادر مؤقتا على القيام به لأنو الإنسان لازم يصوم إرضاءا لخالقه مو إرضاءا للمجتمع والصايم الحقيقي هيك أفعال بتقويه مو بتزعجو
وأنا بعتذر سلفا لكل شخص ممكن يكون رأيي مزعج إلو. سلام

don't worry Serjio
الك كامل الحق تقول رأيك بصراحة
بس بحب عقب بشغلة انو المقال ما موضوعه انو الصايم بدو ينزعج مشان الأكل
الفكرة انو الصايم ممكن ينزعج من الناس اللي بتجاهر بإفطارها بشهر المفروض من
المسلمين يكونوا كلن فيه صايمين وهون عم أحكي أولاً عن المسلمين
واذا بتلاحظ المقال ركز على فكرة انو اللي بدو يفطر هو حر أكيد
بس من زمان كان اللي بدو يفطر ومن المسلمين تحديداً يحاول يخبي الموضوع
وهادا ما نوع من القمع ولكن نوع من الاحترام للجو العام لشهر رمضان
بس اليوم الوضع اختلف والناس صارت بتشوف كل شي عادي ؟؟؟
أنا بحترم رأيك أكيد وبشكرك عالمرور

أول شي أنا بشكرك على عقلانيتك وقبولك للرأي الآخر
بس هاد بيصير فرض للمعتقدات بالقوة يعني أنا مالازم انزعج من شخص مفطر لأنو أنا صايم ببساطة هادا نفاق من الطرفين
مثلا ممكن شخص بمعتقدات دينية مغايرة ينزعج من اللحية الطويلة اللي بيطلقها بعض المسلمين بس ما لازم يطلب منهم يحلقوها منشان راحة سيادتو
وفي شغلة كمان هون إذا حدا قال أنو مو صايم رح يطلعلو شي أربع و أربعين شخص ويحاولو ينصحوه ويعيدو للطريق القويم (من وجهة نظرهم) أما مثلا إذا واحد أوروبي قال أنو مو صايم ماحدا رح يلتكش فيه أو يلومو لأنو انسان بالغ راشد وبيعرف مصلحته

طيب أوكي سيرجيو
وأنا كمان بدي أشكرك على رحابة صدرك وكمان بدي عقب
انو قصة الدقن مختلفة عن قصة الصيام ولاحظ أنا هون عم أحكي عن المسلمين
يعني الدقن مافي اجماع عليها انو فرض ولكن الصيام كل المسلمين بيعرفوا انو فرض
يعني هون ما في حدا عم يفرض معتقدات ؟؟؟ هون في انو كل واحد مسلم بيعرف انو الصيام فرض من عند الله يعني لا من عندي ولا من عندك !!!
ولهيك المشكلة مانها مع الأوروبي أو حتى مع أخي المسيحي
واللي أنا ما بطالبن بشي أكيد لأنو هنن مالن علاقة بالموضوع أصلاً
واذا تجنبوا ياكلوا ويشربوا ويدخنوا قدام المسلمين الصايمين فهادا بكون كرم أخلاق منن
يعني أنا ما بنزعج من ذلك الأوربي أو أخي المسيحي انن فاطرين وأنا صايم
وحتى ما بنزعج من أخي المسلم اللي فاطر وهو حر وعلاقته مع الله وما معي
بس بنزعج وكتييير لما بشوفه مبسوط بحاله انو هو مسلم وفاطر ومشعل السيجارة
وعم يتفتل ويحوص بهالشوارع قبل المغرب وما بحس حاله عامل شي غلط ؟؟؟؟؟
إلا اذا في حدا مسلم بيعتبر الصيام برمضان حرية شخصية ومانو فرض ؟؟؟
وبرجع وبقول انو رأيك على عيني

اوكي حبيب القلب أنت عم تقول أنو ما بتنزعج لما بتشوف حدا مانو مسلم وهو فطران
وحكما المسلم القادر و الفاطر برمضان مانو مسلم (فيك تسمي ملحد أو كافر أو شو مابدك) والطبيعي انو ماتدايق منو بما أنو مابينعد مسلم

ختاما أنا رح اكتفي بهيك لأنو المواضيع المتعلقة بالإعتقادات الدينية صعب مناقشتها من ورا شاشة الكمبيوتر وبتمنى انو اختلافنا بالرأي ما يفسد بالود قضية.
سلام

هلق المسلم اللي قادر ومانو صايم ما بسميه شي وهو بالآخر بيبقى مسلم
وأكيد أكيد سيرجيو الود موجود ونحنا بالمنتدى متعودين على هيك شي
وأصلاً ما بعتقد انو نحنا مختلفين كتير وأنا سعيد بالنقاش اللي صار بيني وبينك

و الله يا اسماعيل انا بايدك بكل حرف قلتو
كتييييييييييييييييييير مشكور

مشكور هكتور ع تأييدك أولاً
وعلى مشاركتك ومرورك ثانياً

هلق انا بشوف انو كل الناس احرار ... يعني كل العالم بتعرف واجباتها ..يعني الصلاة و الصوم و الزكاة و الحج ... والخ و اللي ما بيعمل واجبتو وقتها يصطفل ..كمان هو بيعرف شو عاقبة الموضوع ..
بس بالنسبة للصيام بالذات انا الي وجهة نظر خاصة ..
هلق الصيام شو غايتو ؟؟ 1- العبادة
2- تعويد الصبر
3- الاحساس بالناس الفقراء
فلما بتشوف انسان عم ياكل بشهر رمضان .. فانت بالتالي عم تصوم رمضان على اصولو ..يعني اذا انت ماشي بالطريق ما حدا عم ياكل و يشرب قدامك و انت جوعان و عطشان...فكيف رح تحس باحساس هالفقير بغير اشهر اللي بكون فيها هالمسكين طوال الوقت عم يشوف هالعالم عم تاكل و تشرب و يشم روايح الاكل و هو مو قادر يشتري ؟؟
بالاضافة انو انت لما بتشوف حدا عم ياكل وضليت صابر بيزيد ثوابك عند الله عز وجل .. :*740*:
و الخلاصة .. انو هيدي شغلة اخلاق وتربية .. و ما كل العالم بتفهم بالذوق العام و الاحترام ..
فلذلك دائما اطلع عالنص المليان من الكاس ...
و رمضان كريم للجميع ...