موظفو الجامعة ......الى متى ؟؟؟؟؟

ببداية العام الجديد , تمتلئ كليتنا العزيزة بالطلاب الجدد و القدامى و يملؤهم التفاؤل بتحصيل نتائج جيدة خلال العام .

بدخولنا بهو الكلية المضيء يعترينا شعور جميل ينبئ بجو من الالفة و التفاعل بيننا كطلاب و قبل ذلك كبشر .

و ما ان ندخل الى احد المكاتب الادارية لنستفسر عن موضوع معين يخص التسجيل او المواد او النتائج ,

يتلاشى هذا الشعور شيئا فشيئا أمام عنجهية و غرور و قلة احترام موظفي جامعتنا ( ولا اشمل الجميع ).

و اذا سألنا انفسنا لم كل هذا , لانجد الا قلة الخبرة بالتعامل و قلة الاحترام سببا لذلك .

و ان ما يدمع العين هو ان سقف تحصيلهم العلمي هي البكالوريا الشحط , فعلى من يتعالون .

السنا بشر قبل ان نكون طلاب , اوليسو بشرا قبل ان يكونو موظفين , ألم يتعلمو في منازلهم ادب اللباقة و الاحترام .

البارحة رأيت منظر اما عيني , موظفة في شعبة امتحانات العربي تغلق النافذة بوجه طالبة تستفسر عن موضوع و اعتقد ان سؤالها

كان جوابه كلمة واحدة , و اليوم كنت استفسر عن مادة من مواد الفرنسي و اذ بموظفة الشعبة ترد من رأس مناخيرها و فوق ذلك رفعت صوتها بتهجم لتلقى الجواب الملائم وكأني اطلب صدقة او زكاة تتحنن بها علينا .

و ما زاد الطين بلة في موضوعنا انني و عند خروجي من الجامعة في شارع التجارة ( الكورنيش كما يسمى ) ,

خرج شخص بسيارة اوبل ستيشن قديمة من النسق الخاص بركن السيارة مسرعا باتجاهي و كأني (سوبر مان ولازم طير من قدامو )

لأن حضرة معاليه مستعجل ولم تجبره لباقته و اخلاقه على الاعتذار من هكذا تصرف غبي , لا وبل قال لي ( لتزور لتزور ) وقد تبين فيما بعد انه احد الموظفين في الجامعة .

فماذا كان علي انا افعل , هل كان يجب علي ان اعتذر له عن خطأ حصل عندما خلقني الله بدون اجنحة , ام كان علي ان اخرجه من سيارته العفنة و اجعله عبرة لمن يعتبر رغم كبر سنه .

هذه هي ثقافة بعض موظفي جامعتنا و هي لمحة عن قصص قصيرة تصلح لتنتج افلاما في هوليود و ذلك خلال يومين فما بالكم مما يحصل على مدار العام .

صدقوني هذا غيض من فيض حصل معي شخصيا و اعرف الكثيرين ممن صادفتهم مواقف اغرب و افظع مع البعض من الموظفين .


الى متى يا محترمين , يا من تنظرون لأنفسكم و كأنكم حماة الديار و يجب علينا ان نقول لكم عليكم سلام , و و الله لأقولها لو رأيتكم في ساحات الوغى تحملون السلاح و تقابلون العدو بمثل ما تقابلونا به .

(لا أريد لأحد أن يسكت عن الخطأ أو أن يتستر عن العيوب والنواقص ) القائد الخالد حافظ الاسد رحمه الله .

والله حطيت ايدك عالجرح
كتير مواقف صعبة بتصير معنا كل يوم بكليتنا العظيمة
شو بدنا نعمل بدنا نطول بالنا
الحمدلله ع سلامتك

اخ ابو النضل ليش هدول لو كانو بيعطو اهمية للي اكبر منون كانو تعاملو بهاي....

وبعدين متل ماقلت موظفين عاشهادة شحط وشو بكالوريا

يعني الون واااااااااااااااااااااااااااااااااااااااااااسطة

وياما وياما شكينا وحكينا بدون فائدة

وكذا مرة قلنا بوشون بدنا نشتكي ولا حتى بيحسو بالحكي

الله من عندو يرد عليهن وخلاص

روق روق هيك اشخاص مابيستاهلو نعطيهن قيمة

لا
مو لازم نطول بالنا
الموظف يللي بيقلل ادب و ما بيحترم الطال يللي قدامو لازم يتبهدل
و لو الطالب يللي بيبهدلو
طالما انا ضمن القانون و النظام
و ما عم اغلط
واجبو يحترمني و يجاوبني
مو يقعد يطق حنك
و الله شي بيقرف الواحد عيشتو
و كأنن عم يتصدقوا علينا و عم يشتغلو سخره

بدي فش خلقي
بس بمين؟؟
فيه موظف من زمان حاططو ببالي
بس........................
؟؟؟!

عنا بالبعث نفس الشي تمامااااااااااااااااااااا...والذوق والللباقة مابنقدر نشتريهم وإذا هدول الموظفين مو مربايين ببيتن فشو رح نقدر نعملن؟؟وهلق أهم شي نضال لاتدايق حالك مافي شي مستاهل تزعج حالك مشانو..روووووووووووووووووووووووووووق وانسى

جوى , آية , عصام , يارا

مشكورين عالمرور

بس و الله هالمحترمين فرضو علينا نعاملهن بالمتل و مني شخصيا خليهن يلقو بقا اذا بيلقو

كلام منطقي نضالو وخاصة انك قلتو بموضوعية
وعلى أرض الواقع هاد الي عم يصير
وما لازم نسكت عن الغلط
لك ياريت عم يشتغلو و يطلعو النتائج بكير
كان الواحد بقول اي معليش خليهن نفسية حرام عم يتعبو
مع العلم انو بكل الجامعة هالقصة مو بس بالآداب

لك ااااخ يا نضالو .. فعلا حطيت ايدك عالوجع ..
يعني هيك مواقف بتصير معنا كتيير ..بس هدول بدهون طلاب مدعومين لحتى يقدرو يشتكو عليهون .. لأنو حتى لو رحنا و اشتكينا ما حدا رح يسمعنا .. لا و بجوز يطلع الحق علينا كمان..بقا ما فيني قلك الا هانت انشالله .. كلها عضة كوساية و منتخرج ومنخلص منون بقا ..

سومر

و الله يا غالي بالنسبة للنفسيات , هديك المرة رحت عكلية التجارة و حسيت حالي بباريس يا زلمي و لك عالقليلة بتقول مرحبا بيردو عليك اما عنا ما بيرفعو راسن .

رورو

وحياتك لا مدعومين و لا غيرو بيقدرو يعملو شي ليغيرو هالقصص لأنو التغيير متل ما قال سيادة الرئيس بشار الاسد ( كل واحد يبلش بعائلتو ) و ما قال هالشي عن عبث لأنو يلي حكيت عنهم ببيوتهم مو متعودين عاللباقة و الاحترام .

لاتكون جئر متلي صرت مفصول 6دورات اخرتا من سنتين اذا سمعتوا فيا وقت يلي اكل الوكيل الاداري بالاداب بوكسين ع خلقتو

رامي

فشة خلق حبيب

ابو الريم

طول بالك و اذا فقعت معنا الشغلة منروح سوا ابو الريم

Joe

طول بالك صديقي معلش بيعين الله

ابو الريم

عنجد في موظفين قمة بالادب و الاكابرية بس يا زلمي قديش نسبتهن قليلة

مشان الموظفين ما رح احكي شي لانكن حكيتو كل شي وشو ما حكيت ما بخلص تصورو انو انا مرة ضيعولي اضبارتي طالب سنة تالتة بقلو الموظف انت مالك اضبارة تصورو يا رعاكم الله بقى شو هالموظفين والاحلى بعد شي كم يوم قال لقولي ياها يمكن شي موظف كان لازمو جرايد يمسح بللور سيارتو ما لقى غير اضبارتي لانو فيها نقص :suspect: :!: :!: :!: :!: :!: :suspect:
ومشان هادا تبع السيارة ولو نضال انا بعرفك حمش منين اجتك هالهداوة ما بعرف
توقعت تدحشو بالاشطمان

علوش

الله وكيلك هادا ابو سيارة موظف بعمر جدي و جدك

اي شو هاد نضال

حسيت حالي بعكس السير او بشي محاضرة على هلاسلوب المعبر خخخخخ

انا برأيي وعن تجربة لاتسكتلن خالص

لكن عمي مدين وقت الشدة نحن لهااااااااا

و الله تعلمت كتير من هاليوم يا مدين و كلامك عالعين و الرأس

الموظف عندناشايف حالوا ومو مصدق مفكر حالوا شي شغلة كبيرة () كل واحد منون وجهو مثل خريطة الوطن العربي جاي من الصبح مانو شربان قهوة ومو مغسل وجهو لانو سهران لللللل وعلى أشو سهران () ما بعرف لايمت بدنا نضل هيك بس مو مطولين إما للأسوء أو للأفضل وهذا ما نتمناه جميعا
ميرسي بكو

اي و الله فيه هيك موظفين بكلية الاداب

و خاصة هي الموظفة اللي بشؤون طلاب اللغة الفرنسية
مفكرة انو العالم عبيد عندها و المشكلة ما حدا بيسترجي يحكي لأنو إلو رجعة كل سنة لعندها

الله يعينكم

نحنا عنا بكلية الهندسة الميكانيكية
و الله الموظفين و الموظفات متل الدمعة كلهم بيردوا علينا بأفضل طريقة و بيساعدونا بأي طلب

شرفتونا بمروركن شباب

ابو سمرة هالسنة الأخيرة الي نشالله و بس اضمن التخرج في كلام آخر مع هدول

نضالو شو رح تعمل فيهن

بدي ازجرن زجر