بتمنى كل واحد يحط رايو

تحتدم النقاشات أحيانا بيني وبين أصدقائي الشباب أحيانا
بيني وبين أصدقائي أحيانا سواء ع التلفون أو في الكلية
والبعض يلومني على الشاعرية الزائدة
خاصتا إذا حكينا بموضوع الحب
فهذا يقول أنا بحب اتسلى بس
وهذا يقول انا بكذب عالبنات وباخذ اللي بدي ياه
وآخر يقول أنا بس لامن حالي بلاقيلي شي بنت آدمية
وآخر يقول أنا مابحب قرب من البنات ابدا ولا بيتحرك فيني شي تجاهن
اكثر مايثير استغرابي كيف نكذب على انفسنا ونتسلى ببنات العالم
عند الاخ رقم 1ورقم2
اما بالنسبة للاخ رقم ر3 فكيف يخنزل اختياره بهذه الطريقة التقليدية الفاشلة
أما الاخ رقم 4 فعجيب من امرو
انتو شو رايكن كيف لازم نعيش ياترى
مع التذكير انو العواطف حاجات انسانية لازم نلبيها
وانو من المفترض تكون غاية كل إنسان تأسيس عائلة أساسها
الحب
انتو شو رأيكن
كيف لازم نحب
حب بدون عواطف
وكيف فينا نعيش بلا حب
انا برايي العواطف حاجة روحية
وبلا عواطف الروح تصاب بالاكتئاب
انتو شو رايكن

صديقي الحياة بلا حب و عاطفة ما بتسوى شي

و طبعا باختلاف الناس و تربيتهم و طبيعة الاجواء يلي عاشو فيها بتختلف نظرتهم لهالأمور و انا كمان عندي اصدقاء ما بيآمنو بشي اسمو حب و في منهن حياتهم الحب و في كمان عالحياد و لا بيقربو عكل هالشغلات

ور ح قللك شغلة , النوع يلي بيفكر ياخد يلي بدو ياه من البنت و خالصين , صدقني ما عم ياخد غير من يلي عشاكلتو يعني اكيد ما فينو ياخد شي من بنت محترمة و الطيور على اشكالها تقع .

و احلى حزين بالعالم

أنا رأيي متل نضال كمان بس يمكن بهالزمن صارت الناس تدور شلون بدها تعيش
وقل الاهتمام بالحب و العواطف
وأكيد الشباب يلي ما بيأمنو بشي اسمو حب وغايتهن التسليةهن اشخاص فاشلين عاطفيا

شو كنان مرة مع ومرة ضد
هو الشب لي بيضحك او بيتسلى ماعندو ذرة اخلاق ولا رجولية ولا ثقة بحالو
سواء بنت او شب
ولازم يحطو ببالون عندون اخوات بالبيت وامهات وازواج وبكرا بيصرلون ولاد
اما رأيي بزواج فمافي مقياس للعلاقة الزوجية
والحب شي اساسي لنجاح اي علاقة واحلى شي بالحياة طبعا مع التفاهم
في علاقات حب ناجحة انتهت بزواج وضل الحب
وفي علاقات حب انتهت بالزواج ولعنو الساعة لي التقو فيها ببعضون
وهاد الاغلب
لانو الحياة صار بدها واقعية شوي
في اشخاص مابيستاهلو الواحد يتزوجون عالحب لانون فاشلين اجتماعيا
وبنفس الوقت في زواج تقليدي ناجح من خلال الاعجاب بعقل الشخص وتربايتو
وسمعتو وبعد الزواج بيعشقو بعض وكأن بيعرفو بعض من دهر
وفي زواج تقليدي فاشل وهاد راجع لاحد الزوجين لعدم التفاهم مع بعضون
او لان الاهل زوجو ابنون بالبنت لانها بنت عيلة كبيرة او حلوة ...
او لانو زوجو بنتون لكترة البنات عندون او للمنصب والمال...
وأنا بأيد الزواج التقليدي اكتر
وعذرا للإطالة

انا بشوف ان الزواج قسمة ونصيب..والحب ايضا قسمة ونصيب..ويا ريت ان كل واحد يستطيع ان يتزوج من يحب ..لكان العالم احسن بكثير..ولكن يا ريت ما بتعمر بيت..ويا ريت ان الانسان يستطيع ان يحب من يتزوج على طول..لكان العالم احسن بكثير..والامور نسبية وتختلف من حالة لاخرى..واذا استثنينا احالة السيئة ان الانسان يقصد ان يغش انسانة ما او يضحك عليها فقط وبالقصد..او بالعكس..انسانة تحب ان تضحك على انسان..لتسرق قلبه او ماله او بيته ثم تذهب في طريقها الى فريسة اخرى او ضحية اخرى ..وفيما عدى ذلك..فالحب ضرورى للحياة العادية والمستقيمة..وبدون الحب بكون الانسان تعيسا..حتى لو كان عنده المال او المركز او الاولاد..فالحب هو الحياة.....هذا رايي..

انسة أ ية
شو كنان مرة مع ومرة ضد
شو قصدك بالعبارة هاي
بعدين أنا بدي اسأل شو يعني حب
الحب= اعجاب فكري – احترام – تفهم
اما والله انا مابحب وحدة بس عالشكل
الشكل لحالو شو بساوي
اصلا هاد اسمو اشتهاء ما حب إذا حللناها

كمان يعني بدي اسال شو يعني زواج تقليدي
معقول الواحد يتزوج وحدة وما يشوفها أو يحكي معها
شو الشغلة بطاطا
شو هالتخلف
بعدين الحياة بالاساس صعبة ولازم أنا عالاقل ود الشخص مشان اقدر عيش معا
انا مثلا ضد زواج الاقارب
وبراي هو زواج متخلف طبعا إذا كان مفروض
وضد أي شيء مفروض
والحب يا شباب اوله من الروح وليس من العقل

ومين قال الزواج التقليدي انك تتزوج عالعمى
بدك تزورون وتقعدو مع بعض وتحكو مع بعض كذا مرة

وماحدا حكى عن الشكل

وقلت مافي مقياس للزواج في نجاح بالطرفين وفي فشل بالطرفين
وبتضل الشغلة وجهة نظر وبحترم وجهات نظر الكل ومالها علاقة بالتخلف ابدا

انا بشوف انو رقم 3 هو الانسب بالظروف اللي عم نعيشها
و هي مانها طريقة فاشلة ابدا بالعكس كتير واقعية و مناسبة
و بالنهاية الحياة عبارة عن دروس و عبر
و الحب و الزواج قسمة و نصيب و ما حدا بيعرف شو
الله كاتبلوا

على قولة أبو وديع

لو كل عاشق في الهوى اختار نصيبه

ما كنش عاشق يا هوى فارق حبيبه

وكان الكل عاش بسبات ونبات بس كل بسمه قبالها دمعه

انا للصرااااااحه بآمن بالحب

بس بهالايام اللي صارت صعبه صار الشب بدو بنت ومافيي يتزوجها لانو مو مامن حالو

ولحتى قال يامن حالو بيتسلى بشي بنت لانو وبقول مافي بنت بتستنى

والبنت كمان وضعها مو احسن بتحب الشب بالعشرين وبعدها بفكر يامن حالو بتكون صارت بالتلاتين

غير نق الاهل اللي ما عم يعرفوا ليش رافضه الزواج

وانا بشك انو في شب او بنت ما بيشعروا بشي تجاه الجنس الاخر

الا اذا عامل اسئصال للحواس والاعصاب واللي بعروقه مو دم مي

لانو هالشي غريزي

على كل النقاش بهالموضوع بياخد كتير مناحي

اللي بيبعته الرب يا محلاااااااه

وكل واحد ونصيبه ويااااريت الكل في ياخد الشخص اللي بحبه

شكراااااااااااااااااااااااااااا ولا تضل حزين مافي شي بيستاهل

أول شي بدي أشكر كنان عالموضوع الحلو مع إني حاسو معصب شوي
بالنسبة لرأيي :
بتمنى ما يكون في ربط بين الحب وبين أي نوع آخر من العلاقات , وبمعنى أوضح ما لازم نحصر الحب بنوع واحد من هالعلاقات أو الحالات اللي انذكرت ...
لأنو برأيي الحب ممكن يهجم على أي حالة من الحالات الأربعة , يعني ممكن واحد يكون حابب يتسلى مع بنت وما يلاقي حالو إلا حبها , وممكن واحد يتزوج بطريقة تقليدية بناءً على إعجاب أو استلطاف وبعد فترة من الخطبة أو حتى لاحقاً بعد الزواج يلاقي حالو عايش حالة حب ... وهون عم أحكي واقع ما أفلام سينما ...
إذاً أول شي خلونا نتفق إنو الحب ما بيعرف تصنيفات متل تقليدي وتسلاية وما بعرف شو ؟؟؟
النقطة التانية اللي حابب أوقف عندها هي قصة الزواج التقليدي وشو مفهومه اليوم بعصرنا الحالي ؟
يعني هل الزواج التقليدي اليوم هو على طريقة أيام شامية و ليالي الصالحية ؟؟؟ أكيد لأ
هل هو على طريقة أبو جانتي اللي أمو بتجبلو كام صورة لكام بنت وهو بدو ينقي ويختار ؟؟؟ كمان لأ
حقيقةً , الزواج عالطريقة التقليدية ما بيختلف كتير عن غيرو من الطرق إلا بشغلة وحدة بس وهي ,
إنو هالطريقة بتتم عن طريق وسيط بينما الزواج العادي واللي الأغلبية بفضلوه بتم بدون وسيط
بمعنى أوضح إنو بالزواج العادي الشب بيتعرف عالبنت بنفسه وبيحكي معها وبحبها وبعدين بروح بيطلب إيدها
أما بالزواج التقليدي بكون هالشب ما عم تعجبو إي بنت وبالتالي بيتبرع وسيط ما ( أمه , أخته , خالته , عمته .. ) وبتقلو إنو في البنت الفلانية , شو رأيك تشوفها ؟
وهون إذا بتلاحظو السؤال كان ((شو رأيك تشوفها )) يعني ما في شي إجباري
الشب بشوف البنت وبيقعدوا مع بعض وبيحكوا وبيتناقشوا مرة واتنين وتلاتة وطول فترة الخطبة
اللي أصلاً هي انعملت مشان هالغاية ... وعلى أساس هالشي يا إما بيتفقوا وبكملوا أو بصير العكس ؟؟؟
وما بتكون خربت الدنيا ولا صار شي غلط ...
بالمحصلة أنا ما بفضل ولا بنصح بطريقة على حساب الأخرى , يعني إذا الشب التقى ببنت الحلال اللي لفتت إنتباهه وتعرف عليها وحبها وراح خطبها فما في مشكلة وهيك أحلى ...
وإذا ما صار , ما بيمنع أبداً وليس من التخلف إنو يشوف ويتعرف على بنت حلال عن طريق وسيط معين ...
وممكن يحب هالبنت وتكون من نصيبه , وإذا ما حبها ما حدا بيجبرو إنو يتزوجها
وطبعاً عم أحكي نفس المنطق بالنسبة للبنت , يعني بستغرب من بعض البنات اللي بمجرد ما تقلها أمها في عريس بدو يشوفك ويتعرف عليكي , فوراً بترفض الموضوع من أساسو
طيب ليش ؟؟؟ ما حدا قلك اقبلي فيه أو تزوجيه
عم نقلك بس شوفيه وتعرفي عليه وممكن تحبيه ويكون زوجك بكل بساطة !!!
وبكل اللي حكيتو الحب هو أساسي يعني إذا تعرفت على بنت سواء بأي طريقة كانت وما حبيتها فما بنصحك أيها الشاب إنك تخطبها وتتزوجها ... وكذلك الأمر بالنسبة للفتاة
وهون ممكن حدا يقلي إنو كيف بدي حب من لقاء أو تنين أو تلاتة ؟؟؟
بقلو الحب لما بيجي بيحتاج ثانية أو أقل ليدخل على قلبك , وبعدين ما بالضرورة من أول فترة توصل لمرحلة العشق .. بس بكون في مؤشرات ومشاعر بداخل كل واحد فينا بتقلو إذا هو منجذب للشخص الآخر وممكن يحبو ويطور علاقة معو ولا لأ ؟؟؟
وكمان بقلك إنو ليش العجلة ؟؟؟ يعني ببساطة خدوا وقتكن بالخطبة وتعرفوا منيح على بعض وبعدين بتقرروا ...
........................................................................
بتمنى التوفيق للكل وانشالله بتلاقو نصفكم الآخر بأي طريقة,, المهم تلاقوه

انا رأيي من رأي اسماعيل
كتير منسمع شباب وصبايا هاد اللي بيقول انا مارح اتزوج
والزواج شغله فاضيه وهي يلي بتقولمافي شي اسمو حب
الحب بالنهايه رح يجي ان كنت بتآمن فيه او لاء
وما الو طريقه بتحددو ولا اسم لا ان كان تقليدي ولا حديث ولاعن طريق النت
وقت يدق قلب الانسان تجاه شخص معين ماعاد بيحط شروط
واكيد الحب هو حجر ااساس باي علاقه بس بنفس الوقت
انا شفت كتير زواجات بدأت من دون حب وانما مجرد تفاهم
واحترام او توافق فينا نقول وانتهت نهايه سعيده
لهيك بالنتيجه هاد الموضوع مالو قاعده ولا الو شروط
المهم الانسان يصفي نيتو تجاه الشخص الاخر
واكيد رح يجي يوم يلاقي فيه نصو التاني0