قصيدة ســــــــــــــكرانة

قصيدة سكرانة

من كام شهر
خدت قرار مش هكتب شعر
و إنى هذاكر و انجح و افلح
و آخد البكالوريوسو اتجوز
و اشترى عفشتى بالتقسيط
من كام شعر انا كنت عبيط
من كام شهر زرعت الميه
و طرحت فجلة
جاب العجل الفجلة لعجله و قالها مهرك
ريحة قهرك فايحة فى نهرك
قالت اوعى تعيش كسلان
بابا نويل بيوزع يويو فى حرب ايران
شامم ريحة جبنة قديمة
فيلم السهرة مكنش سياسى
كان عباسى
عبد الناصر حب يقلد فينا الروس
ساوى الروس
ليبرل نفسك
لأجل ما تبقى مثقف زى صاحبنا اياه
عندك ماركس
عندك هيجل
عندك حسن البنا
و حجى
عندك زحمة
صفى و نقى
منحنى عرض النسكافيه
واخد افيه
حاصل حرب النكسة فى حرب اكتوبر فى معاهدة ديفيد
بيساوى
حاصل ضرب النار فى التار فى العار
مرفوعة لأس اتنين مخاويت
و زى امرؤ القيس و جلامته اللى بتنزل من على
عندينا واد اسمه على بيطلع الدبابه و يلف بيها فى البلد
و مراته دايرة بشعرها تدور عليه
و متسألوش انا قصدى ايه
انا نفسى مش فاهم كلامى
بس الكلام واعر حويط
انا اللى دون الناس عبيط
من كام شهر و كنت بحبك
كنت بوضب روحى لاحبك قبل ما اقابلك
كنت بكل حلاتك قابلك
تفرحى قابلك
تزعلى قابلك
تتقلى قابلك
كنتى الارض و كنت سنابلك
كنتى الحرب و كنت قنابلك
حتى فى بعدك و انتى مسافرة
و بينى و بينك الف محطة
كنت بقابلك
عمرى يا نانا ما قلبى اتنازل و لا ساب حقه
زى ما سابلك
عمره ما ضحى بسهده و سهره و جاب من عمره
زى ما جابلك
هذا الوجع بقاياكى
سحر تمدد بين ضلعيا
و توارى خلف سلم منزلك
ترك لك رسالة كل سباح و سافر
يشهد عليكى السلم المستنى خطوتنا
تشهد عليكى الشبابيك اللى فتحتيها علشانى فى نص الليل و عز البرد
يشهد عليكى محل الهدايا اللى ع الناصية و كشك الورد
تشهد عليكى هدومك اللى قلتلك ماتلبسيهاش
تشهد عليكى امتحاناتى اللى علشانك مدخلتهاش
تشهد عليكى ويتنى هيوستن ، جورج مايكل ، عم شوقى بتاع الفطير
كيف يصير الحال كده ؟
م الابتدا انا اللى غلطانلك
و انا اللى محقوقلك
و انا اللى دون الناس عشقتك
كنت عايش جوه صدرك حلم دافى
كنت بنسى الناس و اجيلك يوم ميعادك يكش حافى
كنت ابسط م البسيط
و اكتشفت انى ف هواكى كنت دون الناس عبيط

هشام الجخ