حدد البند الأكثر أهمية لك وتتمنى على وزارة التعليم العالي إيلائه الأولوية في هذه المرحلة

الأهم بنظري هو تغيير المناهج بشكل كامل , لأن شو رح نستفاد من الترفع الاداري اذا بدنا نوقف عند التخرج و معنا شي 20 مادة من كل السنوات عنفس المنهاج يلي عم نناطح الحيطان منشان نتغلب عليه

اذا تغير المنهاج و صار بمستوى جيد نسبيا ما رح بقا حدا يحتاج لشي اسمو ترفع اداري

هادا رأي تفضلو عطونا آراؤكم حول الموضوع بجوز حدا يكون عندو حل تاني .

يمكن أفضل خيار بخصوص المناهج

بس أنا مارح صووووت

برأي تغير شامل للمناهج و طرق اعطاء المحاضرات.واشراك الطلاب بعملية التعليم,مو بس بحلقات البحث بل بغير شغلات.ام حاليا نرجو من وزارة التعليم الأخذ بعين الرحمة ما حدث لطلاب نتيجة لظروف المرحلة.ومساعدة الطلاب بترفع الطلاب وحذف 4مواد من مواد كل طالب.الوزارة تحدد عملية الاختيار للمواد...هادا الي بدنا ياه...بحسو مو طلب كتير تقيل.

برأيي كل البنود بدون تنظيم

مثلا اول بند كتير عملولنا ضغط بالوقت وكترولنا المحاضرات وصاروا الدكاترة مهملين اكتر بالتصحيح

تاني بند هاد شي لازم ولابد منه

اما الترفع الادراي كمان لازم يكون لانو هاي السنة ماحدا داوم متل الخلق وحتى لي داومو كان كل فكرون مشغول بالاوضاع

وان شاء الله للاحسن

شكرا نضال

ما بظن الشغلة واقفة على الترفع الاداري

انا رايي من راي نضال يعني اي صار ترفع اداري وبعدين المشكلة رح ضل موجودة ويلي هي المناهج

المفروض انو تكون افضل من هيك

منورين جميعا

عفكرة قرار الترفع الاداري رح يخلي الطلاب ما بقا يدرسو و يتركو هالمواد لبعدين يعني ما رح نستفاد شي غير تكديس الطلاب بالقاعات و زيادة اعدادهم بكل سنة بشكل مخيف , لأن هلق و بهالمنهاج السيء و عم ينجحو الناس بطلوع الروح و احيانا عالنسبة , فما بالكن بكرا اذا صار قرار الترفع و صارت اعداد الطلاب مضاعفة بكل سنة و قتها كيف بدهن يلحقو تصحيح و عأي شي رح يعتمدوا بتنجيح الطلاب عالنسبة ولا عالمستوى يلي اكيد رح يضل زفت لا وبل رح يزيد تزفيت بس تصير الأعداد كبيرة

غيرو المناهج و اعملوها متل الدول المتقدمة علميا , و خلو المعايير عالمية و شوفو كيف بينجح تلت رباع طلابنا و بيساهمو بتطوير البلد

قال دخلنا بعد البكالوريا الفرع يلي كان اسمو ( لغة فرنسية ) قام بعد ما دخلنا تفاجأنا بأنو ( أدب فرنسي ) , بدي افهم شو رح تفيدني المسرح ولا اللسانيات ولا الرواية اذا انا رح صير استاذ درس اللغة الفرنسية للطلاب ؟؟؟!!!!!!! ولا شو رح تفيدني بحياتي العملية ( صير مخرج مسرحي مثلا ؟؟؟ هههه ) ولا كاتب قصة ولا عبقري لسانات

كمان برأيي أحسن شي تبديل المناهج مو بس تعديلا
لأن عيب كتاب يضل الف سنة يدرس ونصو بس حشي معلومات هاد رأيي
مشكور نضالو

انا معك ومن رأيك نضال .
بس أنا برايي قرار الترفيع الإداري مابيضرنا هيدي السنة
لأنو كلنا منعرف الظروف اللي تعرضنالا وكانت جديدة علينا تماما" .
بشكل عام كل البنود المطروحة ضرورية ولازم تتناقش وتاخد حقا
بس برأي قرار الترفيع الإداري ضروري إلنا هيدي السنة وضروري يتناقش .
شكرا" نضال على الطرح وياريت تكتر من هالمواضيع والطروحات المهمة إلنا واللي لازم تتناقش وينحكا فيا

سامراء

اهلا و سهلا فيك \ ي بالمنتدى

كلامك صحيح , هالسنة فقط بامكانهن يساعدونا بالهالموضوع لأن الصراحة ما حدا درس متل الخلق بظل هالأجواء المكهربة

و بالنسبة لخطة الاصلاح الجامعي , المفروض يبلشو بتغيير المناهج ليصير عنا تطور عن حق و حقيق

منورين جميعا

انا بقول كمان انو الترفع الاداري ما بيضر هي السنة لانو الي امرقنا فيه كان كتير صعب
انزلت مرة قدمت مادة تحت الضرب
بيرأيكم كيف قدمت ؟... ضليت كل الوقت اكله هم الرجعة عالبيت
طبعا هاد ما بيمنع انو لازم يكون في اعادة نظر بالمناهج الي عم ناخدها برأيي انو ما رح تفيدنا بالحياة العملية
رانيا /ادب انكليزي

اهلا و سهلا فيكي رانيا

المشكله لا بالترفع الاداري ولا بالمناهج المشكله بدكاترة كلية الادب الانكليزي بجامعة تشرين...يعني شو منستفاد اذا تغير المنهاج وصار في ترفع اداري ووصلنا للتخرج وعلقنا بمادة عند شي دكتور من دكاترتنا الرائعين وبتضل بالجامعة كرمال وماعاد بخرجك

شغلة الدكاترة نسبية يعني مو كل الدكاترة بالمجمل عم يتعاملو بنفس الطريقة هادا امر
الأمر الآخر تغيير المناهج و الترفع الاداري سهلة نسبيا امام اقالة الدكاترة او اجبارهم عالتصحيح بشكل يرضي الطالب

فينا نحاسب الدكاترة و نعاتبهم عشي واحد هو الاهمال و عدم العناية بالمواد و عدم المحاولة لابتكار اساليب تخلي المنهاج الحالي سهل و سلس

يعني اغلبهم بس يصير دكتور بتدق مناخيرو بالسما و يا ارض اشتدي و بيصير عندو التدريس مجرد امر روتيني جامد يفتقر للتجديد و للتفاعل مع الطالب و لك اذا شقفة كتاب يجمعو فيه المحاضرات اللي عم يعطوها ما الن خلق يعملوه ! بقا هدول شو بدنا ننطر منن غير الاسى ، فخلينا نطالب بتغيير المنهاج اسهل

و برأيي لما دكتور بدو يتعامل مع التدريس كمجرد وظيفة عم يقبض راتب من وراها ، الافضل يترك الوظيفة لناس اجدر منو ، بس كل شي بيرجعنا عسبب وحيد و هو الفساد الاجتماعي و الاخلاقي بالاساس

انا مع الترفع الإداري بخصوص هالسنة ويا ريت يرجع النظام الإمتحاني القديم وشكرا لكل العاملين والمشرفين على هذا المنتدى والخلود لرسالتنا ودام الأسد قائدنا