نقطة تحوّل بحياتك

لحتى نقرّب من بعض أكتر ونعرف عن بعض شغلات أكتر ونستفيد من تجارب بعضنا , حبّيت اليوم نحكي عن

نقاط التحوّل بحياتنا , يعني كل واحد فينا يحكي عن الشي أو الحدث اللي بيعتبره نقطة تحوّل بحياتو , طبعاً ممكن

يكون هالحدث إيجابي أو سلبي , المهم يكون غير بحياتكن وأثر فيها تأثير كبير ... واذا بتحبوا , كل واحد يقول

كيف تعامل مع هالإنعطاف أو التحول اللي صار معو , واذا عندكن نصيحة أو درس تعلمتوه من هالتجربة يا

ريت ما تبخلوا علينا و خلونا نتعلم من كيسكم .

...............................................................................................

بالنسبة إلي أهم منعطف بحياتي كان إعادة البكالوريا , أنا دراستي كلها كانت علمي لأني بحب الرياضيات

والعلوم وما بطيق الحفظ , بس بنفس الوقت كان بدي أدب انكليزي ووقتها أخدت 27 وكانت علامة الإختصاص 28

من 30 , يعني علامة وحدة فوتتني بالحيط , وبوقتها ما كنت متخيل انو رح عيد البكالوريا , وسجّلت إدارة

أعمال (تعليم مفتوح) كنوع من الهروب من إعادة البكالوريا , بس صراحة ما حبيتو , وهون أحد الأصدقاء

أقنعني انو عيد البكالوريا وأدرس فرع بحبو , وهيك صار ؟ وكان التغيير العظيم بحياتي ...

المنعطف التاني كان وقت كنت خاطب و تركت , صراحة تغيرت حياتي ورجعت انطلقت من جديد , يعني

اخترت اني اخسر سنة ونص من عمري ولا اني عيش حياتي كلها مع انسانة اكتشفت انو المسافة بيني وبينها ,

وبين أولياتي وأولوياتها كتير كبيرة .

الدرس اللي تعلمتو واللي بحب قلكن ياه :

1. بحياتكن ما تعملوا شي ما بتحبوه وما مقتنعين فيه , يعني واجهوا ولا تهربوا لأني بالآخر لا بد من المواجهة

اذا بدكن تعيشوا سعداء ومرتاحين.

2. لا تستعجلوا شباب وصبايا بموضوع الإرتباط , قبل ما تكونوا متأكدين بنسبة كبيرة من التوافق مع الشخص

الأخر , يعني الإعجاب ما بكفي و حتى الحب أحيانا لوحده ما بكفي .


النقاش مفتوح ...................... ناطر مشاركاتكن

و الله يا اسماعيل انت استاذ

بالنسبة للتغيير عندي كان من سنة

صراحة تعرفت عأروع انسانة بشوفا بحياتي و صراحة هالانسانة يمكن كتير من الشباب ما بيقدرو يعملو الشي اللي عمليتو لنفسها .

و هي السبب بعودة الامل من دراستي بعد ما كنت فاقدو تماما لاء و رجعت بقوة و بمعدل عالي بالمواد يعني صراحة غيرتلي نظرتي لكتيير امور بحياتي للأفضل طبعاعلى الرغم من انو ما كانت علاقة حب .

بالاضافة للأحساس بالقوة يلي حطيتو فيني بجوز بدون قصد بس صرت بحب الشغل و الدراسة و النشاط الكبير بحياتي .


و صراحة احلى شي مر بحياتي كان عن طريقها .


و بالنسبة للدرس يلي تعلمتو من وجود هالانسانة قريب كتير من يلي كتبتو حضرتك بس معكوس و يفيد بإيه الندم

مشكور اسماعيلوووو

مشكور نضالو الغالي

والله يخليلك ياها لهالإنسانة ويديم الوفق والمحبة بينكم شو ما كانت علاقتكم ... حب ولا صداقة .

احلى اسماعيل و كلك ذوق يا غالي

موضوع كتير مميز اسماعيل وبدو تفكير بصراحه
لان يمكن بتمرق بحياة الانسان كتير تفاصيل ممكن
يشوفها بسيطه بس وقت يفكر فيا بيحس انو شكلت
منعطف وعملت منحى جديد لحياتو0
هلأ بصراحه بالنسبه الي ماصار معي هالشي
بالمعنى لحرفي
انا اول تغيير بحياتي بشكرالله انو صار
هو انو كان حلمي من وانا صغيرة اني ادخل
ادب انكليزي وبالبكالوريا كانوا معظم رفقاتي
علمي وانا ادبي0 لما طلعت النتائج كنت واثقه مية بالميه
انو رح يطلعلي انكليزي لانو بهديك الفترة كانوا كل سنه
يطلبوا علامة 36 بالماده فأنا كنت جايبه 38
وعحظي كانت اول سنه بيرفعوا فيا العلامه لل 39!
هون حسيت حالي ضعت بين انو عيد البكالوريا متل رفقاتي
او سجل اي فرع تاني ؟؟
وانا من النوع يلي مابيعرف يشتغل بشي مابيحبو او مامقتنع فيه
وما اتخيلت حالي بغير الانكليزي
هون اهلي اتدخلوا بالموضوع وقت شافوني مستقتله عالانكليزي واني
مستحيل عيدالبكالوريا فسجلت عمفاضلة الموازي يلي كانوا طالبين فيا
38 باللادقية بس وانا كنت ساكنه بالشام0
ونقلت لهون كرمال ادرس الفرع اللي بحبو واشتغلت فيه
وكتير مبسوطه الحمدلله0
وانا لهيك بنصح الكل انو ماحدا يعمل اي شي هو مو مقتنع فيه او مابيحبو
ميرسي

مشكورة يا أحلى روز

وبرافو عليكي ومنيح انو صارتلك فرصة تدرسي الفرع اللي بتحبيه من دون ما تعيدي البكالوريا ,

و اللادقية منورة بوجودك هبة ...

شكرا اسماعيل عالموضوع المميز ...بس فعلا الموضوع بدو مخمخة .. :*740*:

هلق انا من وقت كنت صغيرة .. بحب الانكليزي .. وبالمدرسة ما كنت شاطرة الا بالانكليزي و الرياضيات ..و طبعا كان مستحيل اني ادرس علمي .. لأني ما بطيق كل بقية المواد العلمية ..المهم وبلا طول سيرة ..دخلت ادبي و جبت بالبكالوريا ..39 و لهلق ما بعرف ليش مو 40 .. و كانت نقطة التحول بحياتي لما حققت حلمي و قريت اسمي مقبولة انكليزي بتشرين ...

هلق في نقطة تحول تانية ..اكبر من الاولى بكتير .. بس الحقيقة ما جاية على بالي احكي بالموضوع هلق..

بركي اذا ضل الموضوع فترة .. ممكن يجي على بالي احكي .. :*740*:

و مشكور اسماعيل مرة تانية..

عمو أحمد ... بلاها لهي عمو :suspect: يعني ما في 20 سنة بيناتنا :?: :!:

ثانياً كل يوم الانسان بمر بتجربة و بيتعلّم منها مهما كان عمره صغير .

شكراً انك خبرتنا عن معدلاتك و موفق أكيد

رورو الغالية أحلى شي لما بتمخمخي

وانا رح انكش الموضوع من الجوارير , بس لحتى اسمع منك النقطة التانية

انشالله ما بتترفعي ترفع ريمو



انشالله بتنجحي وبتشيلي كل موادك

شكراً ع مشاركتك بالموضوع وسعيد انك حبيتيه

إنشاء الله للجميع
وشكرا إلك

لالالالالالالالالا وين رايحة سويتي

يعني قال وصلتينا لنص البير وقطعتي الحبلة فينا


انشالله بتنجحي بالأنكليزي وصراحة قد ما كان الواحد قوي بدو يتعذب شوي ... عادي

ألف شكر ع مشاركتك الحلوة

مشكوووووووووور مع انو بدي بس 3 بترفع يالله نشالله الكل بينجحو نجاح ما ترفع

بسيطة 3 مواد ما كتير .... أنا عندي 3 مواد وبتخرج ....

بقى متفائلين انشالله .... انتو بتنجحوا وانا بتخرّج بإذن واحد أحد.

موفقييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييين

موضوع كتييييييير حلو اسماعيل

نجحت بالبكلوريا اول سنة وتطلعي معهد اعمال ادارية بحلب

سجلت بالمعهد وانا كان حلمي ادب انكليزي فباخر لحظة قررت اني عيد البكلوريا

وبالفعل عدت البكلوريا ودخلت ادب انكليزي عالاختصاص والمجموع

وهي كانت نقطة التحول بحياتي من ناحية الدراسة

وعنجد بشكر الله كتييييير لاني ما كملت معهد ودخلت ادب انكليزي

ومشكور اسماعيل على مواضيعك الراقية

ييييييي نسيت ادعيلكون

انشالله يارب مو بس تترفعو تنجحو وتنضفو كل المواد واللي على باب تخرج يتخرج ونشوفو متكرم بالشهادة

الله لا يضيعلكون تعب

انشالله نقط التحول دائماً بتكون ايجابية بحياتك روميو

وكمان بالتوفيق الك وللجميع بامتحاناتهم

شكراً ع مشاركتك اللطيفة

كلام ونصائح رائعة

وفعلاً سوسن أحيانا الله بيعطينا اشارات معينة ونحنا متجاهلها لأنو منكون منحب بعض الأشخاص

وما بدنا شي يبعدنا عنن .... بس منندم بالأخير....

مرورك متل العادة قيّم ورائع ... مشكوووووووووووووووووووورة