هالعبارة شفتها ع أول موضوع إلي وقت اللي دخلت عالمنتدى , وكتير انبسطت فيها!!! عم امزح أكيد ما انبسطت وبصراحة حسيتها
سئيلة شوي ؟؟؟
وصرت عم شوفها بأكتر من موضوع بالفترة الماضية .... طبعا أكيد ما بذكر مين كتبها وما هادا المهم .
المهم انو ومتل ما بقولوا (( الكلمة الحلوة طالعة والكلمة البشعة طالعة )) , والنبي محمد (ص) قال: (( الكلمة الطيبة صدقة ))
طيب ليش حتى ما نقول الكلمة الطيبة ؟
يعني منو منكون طلعنا لطيفين أكتر وكمان مناخد ثواب انو ما خجلناه لصاحب المساهمة المكررة . خاصة انو هو أكيد ما بيعرف انو
هي مكررة .
يعني في كتير أمثلة على نفس الموديل مثلا واحد حب يحكيلي نكتة , مجرد ما بلش فيها , بنط انا و بقلو (( بايخة ههههههههههه))
طيب ليش هيك ؟
واذا واحد جاية متحمس ليقلي خبر جديد وهي دائماً بتصير , بنط مرة تانية متل عادتي وبقاطعو وبقلو (( بعرف بعرف )) ؟؟؟؟؟
يعني بالله عليكم لو انا سمعت النكتة اللي انا أصلاً سمعانها , وضحكت عليها شوي , شو كان رح يصير ؟؟ رح ينقص مني شقفة ؟؟
بالعكس بحرك شوي عضلات وجهي وهيك ما بختير ع بكير وبنفس الوقت ما بخجلو للشخص التاني وبحطوا بموقف بايخ !!!
أو حتى لو سمعت الخبر اللي أنا أصلاً سمعانه وعملت حالي متفاجئ فيه وتفاعلت شوي , شوي رح يصير ؟؟؟؟؟ والله ما رح تخرب
الدنيا ولا رح أتكلف هداك العناء
!!!
الموضوع مانو ضد أشخاص (( لهيك ما حدا يعتبر حالو معني كفرد بذاته )) ولكن هو ضد أسلوب معين وضد ثقافة معيّنة من الرد ,
لازم وضروري نطلع منها و نغيرها , ليكون منتدانا اللي منحبه بتقدّم و رقي مستمرين والى الأمام انشالله .
