اعطاء التوجيهات من وزير التعليم العالي بمنع دخول المنقبات الى الحرم الجامعي

شفت هالخبر بموقع ارتين بس ما صدقت قمت تأكدت بالغووغل قام طلع شي مية موقع ذاكر الخبر و نحنا ما النا خبر

اعطى وزير التعليم العالي غياث بركات توجيهات تقضي بمنع دخول الطالبات المنقبات إلى حرم الجامعات السورية ، ويعلن رفضه لهذه الظاهرة التي "تتعارض مع القيم والتقاليد الأكاديمية ومع أخلاقيات الحرم الجامعي".‬
جاءت هذه التوجيهات بعد مطالبة أهالي الطلبة وخاصة اللواتي يدرسن في الجامعات الخاصة إدارات هذه الجامعات بوضع حد لظاهرة الفتيات المنقبات اللواتي يرتدن إلى الجامعات والمعاهد بحجة العلم, وبأن يكون اللباس عموما في إطار الاعتدال والوسطية.

وقال مصدر موثوق مقرب من وزارة التعليم العالي فضل عدم الكشف عن اسمه لسيريانيوز إن "مطالبات الأهالي دفعت رؤساء الجامعات الخاصة إلى مناقشة هذا الموضوع في اجتماعهم في وزارة التعليم العالي مع وزير التعليم العالي يوم الأربعاء الماضي".

وأضاف المصدر أن "الوزارة استجابة لطلبات الأهالي، وأن وزير التعليم العالي غياث بركات أعلن رفضه لهذه الظاهرة التي تتعارض مع القيم والتقاليد الأكاديمية ومع أخلاقيات الحرم الجامعي", مضيفا أن "بركات أصدر توجيهاته إلى الجامعات تمنع بموجبها دخول الطالبات المنقبات إلى حرم الجامعات السورية".

ولفت وزير التعليم العالي, بحسب المصدر, إلى أن "طلابنا هم أبنائنا لن نتركهم عرضة لأفكار والعادات المتطرفة", مشيدا بـ "أخلاق المجتمع السوري الذي اثبت على مر العصور الوعي والقدرة على التصدي للكثير من العادات السيئة وشارك بفاعلية وجدية في ضد حملات الغزو المنظمة", داعيا في الوقت نفسه إلى "التعاون مع مختلف شرائح المجتمع لنشر الوعي بين أبنائه".

منقول من ارتين بس و الله ما فات بمخي هالخبر لأنو عكس السير ما جايب سيرة ابدا

مابعرف برضو ما عم استوعبه
لأن كل الدول بتقوم ع الدول الاوربيه وبتستهجن اعمالن ضد الحجاب والمرأه المحجبه
فما بظن يكون في هيك قرار ببلد عربي
ولو كان الخبر صح
فعنجد
لاتعـــــــــــــــــليق
يعطيك العافيه نضالو

حزري شو يمكن و عالاغلب هيك القصد من النقاب هو البرقع يلي بالصورة مو الحجاب العادي الابيض يعني

اي لانو والله هادا اللي بالصورة غريبة كيف بيشوفو الطريق قدامهن من خلالو بعدين والله برأيي مانو منظر يعني خلص خليهن مكتفين بالحجاب العادي يلي منعرفو و مو ضروري التخباية هيك شو عم نلعب طميمة نحنا(لعبة الاختباء)

مع التنويه الا انو اخلاق الفتاة غير متعلقة بارتداء الحجاب اوعدمو

مشكورة سوسنة

يعني معقول هالحكي ممنوع دخول المنقبات للجامعات و مسموح دخول احلى الجينزات مع احلى العطورات مع احلى المكياجات البنات في الجامعات بيجو شبه عاريات هاد مسموح لكن لفت نظري انو النقاب لا يتماشى مع اخلاقيات الحرم الجامعي يعني هالموديلات والعرض الازياء بيتماشى بتمنى من سيادة وزير التعليم ان يكون منصف لكل المنقبات وان يكون عادل في قراراته شكرا لكم

محمد المصري

متل ما قلت انا فوق القصد هو البرقع يلي بالصورة وليس الحجاب العادي

يعني الحجاب العادي و البرقع التنين بيسترو ,طيب ليش المبالغة و التشدد بلبس البرقع

مشكور على رأيك و بالنسبة للموديلات و عرض الازياء كمان ينطبق عليه نفس الحكم يعني برأيي ما في داعي للمبالغة سواء بلبس الحجاب او باللباس المثير

انا برايي يكون في حرية شخصية يعني اللي بدها تلبس النقاب هيي حرة واللي بدها تلبس جينز وسبور كمان حرة ولا شفنا الدول الاوربية طلع اسمن بهالشغلة صرنا بدنا نقلدن خلص تركو البنات عكيفن يا اخي ما عاد في شغل بالوزارة غير لباس الطالبات :suspect: :suspect: :suspect: :suspect:

اخي انا معك انا ضد المبالغة سواء بلبس النقاب او بالتعري لكن لازم نكون منصفين يعني ما نصدر قرار ضد المنقبات ونترك غيرهن واذا حكينا عن الحرية لكل شخص الحرية في لبسه يعني لا انا ولا انت منقدر نفرض على الناس شو يلبسو هم احرار فيما يلبسون مع اني ضد لباس النقاب لكن في النهاية لكل شخص حريته ولازم نفكر ليش بهالوقت بتصدر هيك قرارات بكل انحاء العالم حملة ضد المنقبات يعني هالنقاب مانو قضية مهمة الافضل من الوزير انو يهتم بمناهج التعليم وقضايا الطلاب ومشاكلهم

شباااااااااااااب تابعو معي شوي لانو الفكرة ما وصلتكن مظبوط

هلق الخبر انا ما كتير مصدقو لحتى يثبت صحتو بس اذا كان صحيح

فباعتقادي انو المقصوووود البرقع الاسود اللي بيغطي كل شي بالفتاة و ليس الحجاب العادي يلي منشوفو يعني حجاب الرأس

وهون الفكرة بتمنى تفرقو بين الاثنين

لانو من غير المعقول اصدار هيك قرار بحق الحجاب العادي لانو تلات ارباع السوريات يلبسن الحجاب العادي و ما في اي مشكلة بخصوصو بس القصد هو اللي بالصورة و اللي بيغطي كل شيء و حتى الوجه

و بأوروبا اللي انمنع هو الحجاب العادي تبع الرأس و ما بعتقد عنا بيصير هيك شي بعمرو لانو متل ما قلتو هي حرية شخصية

حسبي الله ونعم الوكيل

شكرا لمرورك حبيب

اين العدل ناس ممنوع يفوتو بالنقاب وناس بفوتو عاريين لا منطق ولا عقلانية اين الحرية

و الله هي يا شباب الوسطية و الاعتدال افضل خيار برأيي
بس القصة انو مين اللي عم يحكي لصالح كذا او كذا
و بكلام اوضح مين هي الواسطة المتمثلة هون برؤساء الجامعات الخاصة
اللي هن مو قلال بالمرة
يعني هدول الرؤساء بجلسة وحدة طلعوا متل هيك قرار
و نحنا طلاب الجامعة او انا كطالب جامعة صرلي عشر ايام عمبوس الايادي
بس لاعرف ايمتا المواد, بس لا حياة لمن تنادي
والله لو كلب ما هيك

بشرفي معك حق

ولك نحنا كلنا حقنا نص فرنك قدام هالبدلات الرسمية اللي قاعدة عكراسي

لا خرجهن مناصب ولا من يحزنون لاء و فوق هادا كلو اذا بتطالب بحقك بتاكل بهدلة قياما وقعودا و اذا اظهرت عجزهم و عدم قدرتهم عالادارة بجوز تنحرم هي اذا ما نفصلت

عذرا سيدي الوزير انت غير منصف ومتسرع اذهب وعش في دولة غير اسلامية واصدر ماشئت من القرارات لقد اهنت التعليم بقرار ليس له علاقة بالتعليم

ياللههههههههههههههه اخي نضالو مكتوب علينا المعاناة شو بدنا نساوي
بكرة بس صير وزير التعليم العالي بعد شي 3000 سنة شوف شو رح يصير
والله لاهري نعمتن

الله كريم و منصير خيي منصير

عالقليلة بكليتنا بس ينزلو النتائج عالنت بيصير الهن شوية حق يدافعو عن انفسهم امام الطلاب و امام رب العالمين عما اقترفته ايديهم سواء من فعل جيد لخير الناس او لسيء عملوه

الله يسمع منك

متل ما تعودت علي نضالو رح كون صريح للآخر لأنو الموضوع حساس
أول شي ما بستغرب القرار كونه سبق وتم منع المنقبات من السلك التعليمي أو المدارس
وتاني شي وبغض النظر عن رأيي الشخصي بالنقاب أو البرقع متل ما سميتوه اللي بغطي الوجه كله , وسواء أنا معو ولا ضده , ما هادا المهم
المهم انو أنا مع الحرية الشخصية وهادا حق للجميع بدون استثناء
وحاجة بقى نطلق أحكام عالناس بالجملة ومشايلة وكيفما اتفق
يعني هالناس مانن قطيع غنم وكلو متل بعضه
يعني مين قال انو هالفتاة المنقبة هي متطرفة بالمعنى ياللي بيطرحه سيادة الوزير ولا غيره
يعني عفوا هل أجت هالفتاة وبدها تبث أفكارها المسمومة وفاتحة مكتب دعوة على حسابها ؟؟؟
حاجة تبلي عالناس ومبالغة يعني أنا بشوف المنقبة قليلة الاختلاط بالناس وبالعكس بتمشي بحالها ومالها علاقة بغيرها ... واذا كان في البعض عم يروج لشي معين فهم قلة وما من حقنا نحاكم الكل بغلطة كام وحدة ... لهيك حاجة نحكي كلام غير دقيق وغير واقعي
خلص قولو بدكن تمنعو النقاب بس لا تقولوا انو المنقبة متطرفة وبعد شوي ارهابية ؟؟؟
الحقيقة بكل عيلتي ما في بنت منقبة بس الحق لازم ينقال والقرار اذا صح فهو جائر وظالم
بحترم رأي الكل حتى اللي مع القرار , واللي بشوفوه وسطية بحب قلن انو أنا مع الوسطية
بس حتى الوسطية ما بتقدر تطبقها عالناس اجباري ... صح ولا أنا غلطان ؟؟؟
وأنا بدي قول شي أهم انو هالقرارات يمكن يكون الها تأثير سلبي كلنا ما منريده وهو انها ممكن تخلق تطرف حقيقي ما كان موجود بالأصل عند بعض الناس كردة فعل
وهيك منكون بدل ما نكحلها عميناها ...
لهيك بتمنى تتناقش هيك قضايا منيح بمجلس الوزراء قبل ما تقر وما تكون بقرار فردي من وزير واحد . ورأي اتنين أحسن من رأي واحد ...

اقتباس :

وأنا بدي قول شي أهم انو هالقرارات يمكن يكون الها تأثير سلبي كلنا ما منريده وهو انها ممكن تخلق تطرف حقيقي ما كان موجود بالأصل عند بعض الناس كردة فعل

و الله انا معك بهالفكرة لانو سبق و صار هيك

تحياتي الك اسماعيلو و رأيك عالراس و العين بس في شغلة انو نسبة النقاب الاسود يلي بالصورة كتييييير قليلة بالجامعة يعني بالنادر تشوفهن و صراحة انا كلباس ما حبيتو

و كمان شغلة اسماعيل
يعني اكيد البنت يلي عم تلبس البرقع مانها عم تبث افكار و مانها فاتحة مكتب دعوة بس شوف الفكرة الابعد : اذا كان شخص غريب عنا بالتفكير و المعتقدات و عم يحكي كلام متعصب و بيعتبر الجميع خطأ وهو صح فهادا شي مزعج لكل شخص فينا, فنحنا فورا منحس عليه و منعزلو و فكرة النقاب نفس الشي يعني لما بدي شوف وحدة لابسة نقاب و مو مبين من وجهها شي فبالتأكيد بدي اعتبرها متعصبة و الكل بيعرف هالشي يا اسماعيل و اي شخص ببلدك رح يفكر بنفس الطريقة على انها متعصبة جدا و بعدين اللي بدها تحط النقاب يلي بالصورة على شو خايفة اذا بينت وجهها عالقليلة :?:

و بالنهاية انا شايف شي كويس من هالقرار
الحرية يلي عم تحكو عنها ما بتجي خبط لزق لانو لسا عضمنا طري بهيك مواضيع، خلو اللحمة الوطنية تاخد مجراها قبل ما ناخد حريتنا بهيك اموووور يعني خلي الكل بالأول يقتنعو بوجود الآخر و تعايش معو بدون الغاؤو و الحرب معو و بعدين بتجي هالشغلات مكملة لأنو اذا هلق بالحكي عم تعلق العالم ببعضها فأي حرية عم تحكو عنها انتو

مشكووور مرورك اسماعيلو الغالي

بالنسبة انو على شو خايفة تلك الفتاة المنقبة اذا بينت وجهها
فهادا سؤال بيتوجه الها وانا للملاحظة ما عم دافع عنها قد ما عم دافع عن الحرية الشخصية.
بحقلك نضالو تقول عن شخص انو متعصب وبحقلك ما تتعامل معو وتتجاهلو متل ما بدك بس ما بحقلك ولا بحقلي انو نحجر عليه
وبعطيك مثال تاني ممكن انت بالعكس ما يعجبك منظر وحدة جاية عالجامعة وكأنو جاية ع سهرة وفينك ما تتعامل معها وتتجاهلها بس ما بتقدر ولو حتى قدرت ما من حقك تمنعها من الدخلة عالجامعة . وانا هيك بفكر بالحالتين...

بعدين كمان متل ما انت بتشوف هالمنقبة انو هي متعصبة وشايفة كل الناس غلط وهي وحدها الصح ؟؟؟ كمان انت عم تمارس نفس سياسة التفكير بأنك شايفها غلط ورأيك هو الصح .
بعدين عن جد ضحكتني بآخر تعليق انو شو دخل اللحمة الوطنية بالموضوع وانو هلق النقاب هو اللي بدو يضرب الوحدة الوطنية ..؟؟؟؟
وانو بهالحالة كل ما تناقشنا بشغلة خلافية بدو ينقال انضربت الوحدة الوطنية ؟؟؟
لك أصلاً أنا ما فهمت عفواً يعني في تناقض بكلامك انو كيف ((خلي الكل بالأول يقتنعو بوجود الآخر و تعايش معو بدون الغاؤو و الحرب معو ))
طيب القرار هيدا شو بتسميه ؟؟؟ أليس الغاء وحرب على ذاك الآخر وعدم اقتناع حتى بحقو في الوجود والتعلم والتعليم !!!
و انت لاحظت بكل مشاركاتي من يوم ما دخلت عالمنتدى انو همي الأول والأخير هو انو نستوعب بعض ونحب بعض على اختلافنا ورح ضل هيك انشالله
وانا عم جاوبك هلق بكل رواق وانا ماني معصب ها .....
وصدقني بحترم موقفك من الموضوع وانك ما بترتاح لشكل هاللباس وعموماً الكل هيك بس عن جد وصدقني الأيام بتثبت انو بهالقرار الوزير عمل دعاية مجانية للنقاب
واللي ما كانت بتعرف شو يعني نقاب وليش البنات عم يلبسوه رح يكبر معلاقها وتصير تسأل؟
وخاصة انو معظم اللي حاطينه ما رح يشيلوه لأي سبب من الأسباب وهون البنت الغير منقبة بدها تشوف شو السر اللي بخلي المنقبة تتمسك بنقابها ؟؟؟
وممكن كتير تقتنع فيه وتروح تلبسه ؟؟؟
ملااااااااااااااااااااااااااااااااااااحظة نضالو
ما المطلوب يكون رأينا واحد , وأنا مهما اختلفت معك أو مع غيرك بالرأي فإنت بالنسبة الي أخ وانت بتعرف هالحكي وبتعرف اني ما عم بيع وطنيات وانو كلامي من قلبي ...
نسيت أشكرك بأول رد !!! شكرااااااااااااااااااااااااااااااااااااااااا

انا مع القرار100%

اقتباس :

بعدين كمان متل ما انت بتشوف هالمنقبة انو هي متعصبة وشايفة كل الناس غلط وهي وحدها الصح ؟؟؟ كمان انت عم تمارس نفس سياسة التفكير بأنك شايفها غلط ورأيك هو الصح .

لا غالي بالنسبة الي الفكرة كلها انو هالمنقبة بالأسود من فوق لتحت اكيد ما رح تكون نظرتها للبنت الغير محجبة انها كويسة و عين الله عليها بس رح قللك انو نسبتهن كتيييير قليلة عنا بس لما بتشوف تعليقاتهن عالنت و بتسمع افكارهن بتعرف تمام ليش لازم تنمنع هالمظاهر

اقتباس :

بعدين عن جد ضحكتني بآخر تعليق انو شو دخل اللحمة الوطنية بالموضوع وانو هلق النقاب هو اللي بدو يضرب الوحدة الوطنية ..؟؟؟؟

حبيب القلب من فترة عم نشوف كيف سيادة الرئيس عم يقوم بأشياء يشكر عليها من القلب لتدعيم الوحدة الوطنية منها مثلا السواري تبع الاعلام السورية و هالخطوة تبع النقاب فيك تعتبرها وحدة من هالاشياء يعني اول شي خلينا نطلع من بوتقة الدين و نشكل وحدة وطنية قوية ما بتهزها جبال و بعدين بس ننتصر امام الاعداء وقتها كل واحد يعمل اللي بدو ياه لانو وقتها منكون اجتزنا مرحلة كبيرة و صار حب الوطن و المواطن على اختلاف مذاهبو و اديانو هو المتأصل في قلوب الجميع

اقتباس :

لك أصلاً أنا ما فهمت عفواً يعني في تناقض بكلامك انو كيف ((خلي الكل بالأول يقتنعو بوجود الآخر و تعايش معو بدون الغاؤو و الحرب معو ))

اي لأنو هدول يلي عم نحكي عنهم تركلهم المجال يصولو و يجولو وشوف شو بيصير , رح تشوف كيف رح تصير مكاتب الدعوة و بث الافكار المسمومة و غيرا وغيراتا كتيييير وهادا اللي قصدتو من كلامي و بشرفي عرفت انو رح ينفهم ضدي و بعدين منع دخولهم بالنقاب ( البرقع ) لا يشكل اي مشكلة لا النا و لا الهم لانو بامكانهم بكل سهولة انو يلبسو حجاب عادي لانو ما حدا منعو لسا و ما بعرف انت ليش شادد كل هالقد عموضوع المنع يعني بالله فيك تقللي وين المشكلة اذا استبدل البرقع الذي يغطي كل شي بالحجاب العادي يلي منعرفو بحياتنا اليومية ؟؟؟؟؟؟؟؟

بعدين خلينا ننطلق من الاسلام, الله عز وجل خلق الانسان بأحلى صورة فهل برأيك شي صح انو نغطي هالصورة يعني الوجه الانساني ما في اجمل منو, بس بدي افهم اي شريعة نزلت و حرمت كشف وجه المرأة (ولا تقللي هلق انو معناها لازم يبين الجسم لانو ما بقصد هيك شي ابدا ) نحنا حديثنا عن الحجاب و البرقع و تغطية الوجه و انا بشوف متلي متل اي شخص انو الحجاب العادي افضل و انا مع قرار المنع للبرقع

و بالنسبة للحرية تبع هالاشخاص ما بعتقد انو منعهم من تغطية الوجه فيها مس بالحرية الشخصية متل ما قلتللك بامكانهم بسهولة بالغة لبس حجاب عادي و شكلو حلو و كلو وقار

تحياتي لالك اسماعيل بالتأكيد مهما اختلفت آراؤنا منضل اخوة بهالوطن الحبيب سوريا و قائدنا الاسد بشار

نطرت لتردو وشوف وجهات النظر كامله
وبحكم انا انسانه عايشه بالسعوديه
وهالشي عنا كتير
وما تنصدمو كمان انا منقبه
ومقتنعه بهالشي
لأن بنظري انا مو فرجه للرايح والجاي يشوف وجهي
وما بعتقد اني بهالشي عم ادعي للارهاب او عم ابني عقد
او اي شي
كل الموضوع
انا انسانه حبيت يكون هالوجه اللي خلقو الله
لعيلتي اللي بتعرفني
وللشخص اللي حرتبط فيه بيوم من الأيام
واكيد اختلاف وجهات النظر مابتعني انو نعادي بعض
كل شخص الو وجهة نظرو واكيد بحترمها
كـــل الشكر

سوسنة بالتأكيد شي بيعود الك بالحياة العادية و عنا انمنع بس بالحرم الجامعي بعدييين كنت بدي قول شغلة بانو ما حدا يجبلي مثال السعودية ودول الخليج لانو اسلوب الحياة و نمطها عندكن هيك و متعودين على هالاساس و ما في اي مشكلة

بس عنا بسوريا من وين اجا ما بعرف و بعدين عنا المنقبات اقليات و قليل نشوفهن بالجامعة

بتمنى كلامي ما ينفهم ابدا انو هجوم لا بالعكس انا بحترم كل انسان حتى ولو كان بعكسي بكل شي بس الموضوع عبارة عن طرح للآراء و الافكار

شكرا سوسنة

نضالو :
ما بدي العي كتير بس يا أخي ما فيني ما رد
أول شي ما حدا طلب انو ينترك مجال لحدا كائناً من كان انو اخد رياختو ويعمل دعوة وما بعرف شو ... يعني الصبايا بدن يتعلموا متلن متل غيرن وبس ...
تانيأ ما في شي اسمو خلينا ننتصر عالأعداء وبعدين كل واحد بيعمل اللي بدو
لأنو حربنا مع الأعداء مالها نهاية وكل يوم في عدو جديد
وحب الوطن ما بدو وقت ليصير متمكن بقلب المواطن يعني يا بكون مزروع فيه من البداية يا اما لا , وانا بعتبر كل الناس بتحب الوطن حتى يثبت غير ذلك ...
وليك والله بالآخر هي وجهات نظر يعني حتى الاعتدال كل واحد بشوفو شكل وحتى التعصب الو درجات وكل واحد بشوفو من منظار مختلف ...
لهيك نحنا هلق اتفقنا على محبة سوريا الغالية ومحبة كل فرد من أفراد شعبها
والباقي ما مشكلة منحكي فيه لبكرا الصبح ولبعد سنة اذا بدك
وصدقني اللي نحنا عم نعمله هلق من نقاش وتوافق وحتى اختلاف هو قمة الحضارة وقمة محبة الوطن والخوف عليه ...