ذكريات الزمن الجميل..

اذا كنت من الناس اللي حضرو بالمرحلة الابتدائية مسلسل ماوكلي وبرنامج بريد الأطفال اللي كانت تقدمو ماما فاتنة الله يخليلنا ياها و الكابتن ماجد , أما بمرحلة الإعدادي مسلسل الرجل الآلي و أبو الهنا و جميل و هناء


إذا تابعت كل الإعلانات الحلوة اللي كانت تطلع ع قناة البرنامج العام متل دعاية محارم ديمة و علكة منطاد و شراب سن كويك و بطاطا لوكس و شوكولا سوارين ومبيض اوريس الخ

مين فينا ما عاصر اشاعات من نوع انو اذا الرقم الوطني تبع هويتك او بطاقتك الانتخابية بينتهي بالرقم كذا فا بتربح جائزة نقدية

اذا بتتذكر منيح وقت اللي طلع اشاعة انو في هزة ارضية والناس صارت تطلع عالشوارع بالليل(شو كنت مبسوط لأني شفت جارتنا بالبيجامة)
ولا وقت كسوف الشمس وكيف صارت الناس تحط فوق البرادي بطانيات من برا ومن جوا وتسكر بخاويش الباب وتخزن آكل
الله يرحم البيجامات المقطعة ومربعة ابيض وازرق وكانت لكل العلية وكأنو شي فريق فوتبول

مين ما كان منا حلم حياتو انو يفوت عالسينما او يروح ع مدينة الملاهي بالعيد بعد ما يكون بوّس ديات حتى شبع بالعيد وكلو منشان العيدية
مين ما كان ينام ويحط جنبو الصباط الجديد والتياب الجديدة تبع العيد
ولا الجرابات اللي كان الها طابات


إذا لحقت الإشاعة اللي بتقول أنو ما تطلع بتكسي لانسر لأنو صريفة و العداد بيقلب هاد غير شوفيرياتا اللي نصن وخم


اللي بيطلعو بشاشة زرقا و فيا كتابة عم تطلع من تحت لفوق و كانو ع الأغلب يا مشان التطوع بالكلية الحربية يا لترشيد استخدام الكهرباء و الماء يا مشان تنبيه الأخوة المواطنين ع ضرورة التبرع بالدم... إذا لحقت الدعايات اللي كانو يطلعو بعد نشرة أخبار الساعة 8:30


إذا لحقت مقدمي الأخبار القديمة , و اللي كان يقدما مهران يوسف و ميساء سلوم و رائدة وقّاف و علاء الدين الأيوبي


إذا لحقت ولادة الإذاعة اللي كسرت الدنيا و بعد طول انتظار و اللي صرت تتباها فيا بوصول وطنك للتطور بأن صار عندو وقت طلعت إذاعة صوت الشباب بسنة ال 2000كما أذكر FM


بالكلام اللي كنت تسمعو كتير عن المشاكل اللي رح تصير الساعة 12.00 بالليل يوم31/12/1999 و أنو كل الأجهزة كهربائية و الكترونية عليها السلام


إذا كنت عاصرت غنية الحب الحقيقي لمحمد فؤاد ي و غنية علمتيني أحب الدنيا لراغب علامة و ما بقاش أنا لأصالة , و بالله يا سايق الهجن أمشي على هونك لشادي جميل و غنية ربا الجمال تبع أسأل روحك اللي كانت تطلع بحفلة ع القناة الأولى و غنية ديانا حداد (ساكن) و عودوني لعمر دياب و مصطفى قمر و غنيته الليله دوووب و إذا كنت شهدت ولادة نجم عالمي جديد اسمو علي الحجار و أليوم روح روحي لنجوى كرم و النجاح اللي حققتو من ورا هالألبوم وخاصةً بين أواسط شوفيرية السرافيس و التكاسي و اشتريت كاسيتات عمرو دياب و لبست نفس البلوزة اللي لبسا بفيديو كليب تملي معاك و حطيت 2كغ جيل ع شعرك و رديتو لورا حتى صار يزحلط ع قد مو زفر مشان تساوي متلو بكليب عودوني, و أيام ما تسجل على ورقة المنوعات اللي بدك تسجلا ع شريط كاسيت ماكسل حصرا و تروح لعند المحل و تطلب تطبيق هالأغاني ع شريط


إذا وقفت العصريات بالصيف ع البلكون بعد ما تكبلك سطلين مي مشان الرطوبة و شعلت شريط كاظم الساهر تبع مدرسة الحب و وقفت بالفانيلا الصيفية و بأيدك سلسال عم تلولح فيه و حاطط راسك تحت المي و عم بتنفض بشعراتك و أنت عم تنوضر ع ببت الجيران


إذا كنت عم تتابع برنامج ما يطلبه الجمهور و عم تقول لحالك عسى و لعلى يطلعك شي غنية عليها القيمة , بس وقت شفت الشريط اللي بيحطوا فيه الأغاني الموجودة لحلقة اليوم , انصدمت و حشكت و قلبت التلفزيون ع القناة التانية و كان طالع فلم أجنبي لليافعين موضوعه عن الأحصنة و تربيتون , أجباري رح تقبل فيه مو بكيفك
إذا شعرت بقرحة مزمنة الساعة 4 بعد مارجعت من المدرسة و كان دوامك الضهر وخلصوا برامج الأطفال الله يجعلون برامج أطفال و بلشنا ئرح بئاااااااااااا , ع برامج القناة الأولى مع العمال , مع الحرفيين , مع الطلبة , مع المقاتلين , مجلة الأمل , مجلة الأسرة , أبناؤنا بالجولان.....


إذا قضيت يوم عيد الأم ربعو مع أم عمار(ماريا ديب وبرنامج ما يطلبه المشاهدون حلقة خاصة) و ربعه مع جهاد سعد برنامج خبرني يا طير


إذا كنت من هواة بسكويت السحب اللي كان يربح هدايا حدث و لا حرج و اذا كنت من هواة الستيكرزو جمع ألبوات صور كبتن ماجد وماكولي والبوكيمون مين فينا ما راح صرف خرجيتو و لطش خرجية حدا من أخوتو مشان يشتري علبة مسكة كاملة عسى و لعلى بتطلعو بألبا صورة , أصلاً ما اغتنت شركة خيري و كلاس إلا من ورا طشمنتنا مختومة


إذا شفت التيشرتات اللي كانو يحطوا عليها صور نجوى كرم و نوال الزغبي و جورج وسوف و اللي إذا نزلت ع الشارع بهداك الوقت كنت تشوف الحبيبة و العساكر لابسين منون.


مين فينا ما طرقو عين لرفيقو بالمدرسة اللي أجا عم يقلو أنو ركبنا ديش قطروا 9 متار و بيطالع قناة و أخد عنو فكرة أنو رفيقوا كذاب كيف لا و أنو كان الديش يكلف أكتر من000 60 ل س ألف.


مين فينا ما انعمت عيونو و هو عم يلعب أتاري سيغا أبو الجويستيك اللي قد الجحش و اللي لازم تكبس زر ال سي شي اربع خمس مرات حتى تضرب الخصم اوحتى ينط ماريو.


مين فينا ما كان مفكر أنو عندو ثروة ثقافية أو مجموعة بمجرد احتفاظو بشي 20أو 25 لغز من الألغاز تبع هدول المغامرين الخمسة


مين فينا مالعب الميكانو لعبة مهندسي المستقبل ,وحلم يشتري طابة أوفيشال تبعيت مونديال ال 98 الأصلية


مين فينا ما انحر ع نادي الاتحاد وئت خسر مع الحرية 4-0 أيام العفش قبل ما يفجر قنبلة بالأوساط الرياضية بأنو أجا عرض ليحترف بأوربا( نادي قبرصي درجة ألف) هو و سيد بيازيد



مين فينا ما كان تيجي الرجفة وئت شي حدا من زملاء الدراسة الذين يمتهنون الكدب يكدب علينا و يقلنا أنو خال أمو عقيد مدري عميد بالمخابرات الجوية و شرطك يكون عم يحكي بصوت واطي


مين فينا كان يحب مسلسل بطوط (بطوط الشهير)


- مين فينا ماكان يحلم ببسكليت 24 أبو العيارات , و يحلم بال والك مان تبع الشريط ؟؟


من الوحوش والعفاريت مين فينا أيام ما كان صغير وكانو يخوفوا أهلو من العتمة و

مين فينا ما سمع الديو بين وائل كفوري و نوال الزغبي (مين حبيبي أنا ) و بين راغب علامة و أليسا (بتغيب بتروح).


مين فينا ما شاف رأفت الهجان و ما كان يفهم منو شي بس عم تابعو لأنو أبو و أمو عم يشوفو بس صار حجة مشان يسهر شوي زيادة


مين فينا ما تابع المسلسلات اللي كانت تطلع ع القناة الأولى الساعة 9.30 بعد الأخبار و كان ينحر و يقتل من حرتو وقت يكون في عيد قومي أو وطني بشي دولة موقعين معا معاهدة صداقة فكانو يلغو المسلسل و يطالعو برنامج وثائقي عن هي الدولة


مين فينا أيام الابتدائي ما كان يغلط بشي 500 كلمة و يئولا غلط بالنشيد السوري من أصل 503 كلمات


مين فينا ما كاااااااااااااااان معلائو تئيل و غليظ أيام الاعدادي ., وقت كنا نفكر حالنا صرنا رجاااااااال صوتا تخين و خطوا شواربنا و خود ع بياخة


مين فينا ما كانو رفقاتو يصرخولو بكنيتو و هو يصرخ لرفقاتو كمان بالكنية أيام الاعدادي , وخصوصاً وكنت كنا نلعب طابة


مين فينا ما راح ع هاد الإجتماع الطليعي اللي كان يصير يوم الجمعة الساعة 9 الصبح هلق أنا ساويت مناحة بالبيت لحتى خلتني أمي أروح و ياريتني ما رحت


مين فينا ما لبس السبدرينة أم الضو اللي كنا نروح فيا ع المدرسة و نتبروظ فيا , و البروظة كانت تكمل إذا كان عريف الصف أو انضباط أو حتى عريف طليعة سادسة

مين فينا ما كانت قمة احلامو انو يلبس خفافة رياضية صينة ماركة الباخرة او بدلة كورية تهريب

مين فينا أيام الأعدادي ما كان يشيل الكتافيات و يقلب كمام البدلة بعدما يطلع من المدرسة , هاد إذا ماكان شاري نضارات شمس أم ال 25


مين فينا ما اتئلع و اتسكر الخط بوشو مليون مرة وئت كان يتصل برفيقو مشان يسألو من وين لوين داخل معنا بالمذاكرة و هو بيعرفشو داخل بس اتصل قصد مشان يضيع وقت و يستعمل التليفون الجديد اللي مع عم يرن يا حسرتي


مين فينا ماكان يموت من الرعبة قبل ما يدخل ع البيت الساعة 9 المسا لأنو أبو و أموه بدون ينفضوه قتلةلأنو اتأخر ع البيت و موصينو أنو بعد الساعة 7 مافي دخلة ع البيت بس الله يلعن رفاق السوء



مين فينا كان يحب المسلسلات المصرية اللي كانت تطلع ع التلفزيون الساعة 11.30 و اللي كانو المصاروة هنن ذاتون كابين هالمسلسلات الصعيدية اللي ضعيفة ع كل المستويات (لا قصة متل الخلق لا سيناريو لا حوار لا إخراج لا تمثيل لا حبكة لا تصوير لا إضاءة , لا تأثيرات ) و لك يا جماعة حتى وش حلو يوحد ربو ما كان فيه


- مين فينا ما تابع كسندرا و حب راندو و اتأثر بالحب الكبيراللي كان يربطون و مين فينا صدق أنو معقول تكون المكسيك كل هاد صغيرة لحتى طلع راندو آخر الشي أخوا لكسندار و دورنديا أما و الجد الكبير طلع اخوا , المهم أنو كان هالمسلسل كان فيو صدف فعلاً شي ........ غير شكل


*- مين فينا ما تابع مسلسل عيلة 5 نجوم , 6 نجوم , 7 نجوم , و ما بعرف إذا كان فيه 8 نجوم أبوك يالدسك و الواوية و الدست , و أبو كيروز ,,, يلعن أخت هالألفاظ شو حفظناها , ليش كان فيه مسلسل لأندريه سكاف و حسام عيد و نحن بزمناتو كتير كنا نضحك عليه مع أنو كان سخيف جداً , و لسه عائلتي و أنا و المحكوم اللي مثل فيه جمال سليمان , و جريمة بالذاكرة اللي مثلت فيه سمر سامي و مابعرف مين كمان هلق أنا بصراحة كان أخوي كتير يخوفني من هالمسلسل بس ليش كنت خاف ما بتذكر , و مسلسل الأخوة (زهير عبد الكريم و سلوم حداد و بسام كوسا و أمون منى واصف) و مسلسل هجرة القلوب إلى القلوب (عدنان بركات المرحوم و ما بتذكر مين كمان) , مسلسل يوميات مدير عام غني عن التعريف أكتر الشي بتذكر أنو ضحكت ع شخصية نبيه الحدق اللي لعبا أيمن زيدان
مين فينا ما تابع مساسل الجوارح والكواسر والبواسل وصار يقلد الابطال (جرد حسامك يا شفلحة) ,


مين فينا كان بيعرف شو هي حصة الطلائع اللي كانو يحطولنا ياه يوم الثلاثاء سادس حصة و كانت الآنسة تطلع لبرا تحكي مع الآنسات و نحن عم نعفرت جوا , أنا لهلق ما عرفت شو معناتا هالحصة و ليش كانو حاطينا


مين فينا ماكان يكيّف وقت يطلع بباص النقل الداخلي الأخضر(التايتانيك) يلعن أخت هالطلعةشو مكربة ’ بس كنا نحبا ليش ؟؟ العلم عند الله


مين منا ما جمع صور مطربين و رياضين و مشاهير و لزقا هون وهون


مين منا ما اشترا نضارة شمسية ملونة

- مين كان يلبس بنطلون ضيق من تحت , هلق أنا ما كنت أتصور حالي لابس هيك بنطلون حتى أيام الابتدائي كان اللي يلبس بنطلون ضيق شوي من تحت كانو يتمسخرو عليه , بس هلق سبحان مغيّر الأحوال


مين فينا ما كان يحلم يروح ع الحلاق لحالو بدون أبوه مشان ما يحلقلو ع كيفو , لأنو هو بدو يخلي الحلاق يحطلوا جيل و يوقف شعر بس أبوه كان يضبعو


مين فينا ما كان يجعر و يبكي ما بدو ياخد دوا السعلة لأنو مر ;بس كانت أمو أول الشي يالله حبيبي يا الله هاد دوا ما بيصير لازم تاخدو مشان تطيب و تضل عم تجي معنا بالأسلوب اللين و نحن نتمنع بعدين أنما للصبر حدود ,,,,,, فتاح تمك ولاااك , و هون أنت متل الحباب رح تفتح تمك و تشربو فيا العافية .

ولا كنزات الصوف اللي كانت تشتغلن أمنا ويطلعو نص ولاد الحارة لابسين نفس الشي واذا ضللو شي كبتين صوف بتعملك شال فيهن طبعا والتياب بيضلو يتوارثو وينلبسو لحتى يفرجا الرب

- مين فينا بيقدر ينسا البيجامات النفخ اللي كانوا يلبسوا الأكير مننا هدول اللي أيدهون و أجريهون بيجو زم و ألوانون ياسلااااااااام , شي تريكواز شي زهري مأنشح شي أصفر مخنق

ولّا حصة الأشبال أو التربية العسكرية أو الفتوة وكان لازم يكون الأستاذ تبعها نفسية حامضة منشان يدعوسنا و يذلنا ويحضرنا للمعركة المصيرية

مين فينا ما كان يشوف حالو بالشرايط تبع عريف الصف ونائبو وتبع لجنة النظافة والانضباط وكان يحس حالو شي مسؤول كبير

مين فينا ما بيذكر بطاطا زقزوق و ميلان و طبوش وعلكة سندباد والآيس
- طيب كازوز جلول و سينالكو و خزنة وكراش؟؟؟


مين فينا مابيحب هالشغلات الحلوة كلا فعلاً أنت محظوظ فعلاً لأنو حضرت هالقصص مين بيقدر ينكر أنو ماكان مبسوط وقت كان صغير

اقتباس :

مين فينا ما شاف رأفت الهجان و ما كان يفهم منو شي بس عم تابعو لأنو أبو و أمو عم يشوفو بس صار حجة مشان يسهر شوي زيادة

والله العظيم حضرتو شي 5او4 مرات وكل الاجزاء ولهلأ مابعرف الا انو رأفت الهجان جاسوس مصري باسرائيل

موضوع نهفة والله

ما بتقول عمرنا شي 70 سنة وعم نتذكر كل هالشي

مشكورررررررررررررررررررررررررر

له يا ام اللووووووول لساتك ع العرش والعمر كلو انشا الله بس شو بدنا اياااااام

اييي والله ايااااااااااااام

الله يعودا

لا شو يعودا يا زلمي مشتاق للماما فاتن يعني!!!!!!!!!!!!

ههههههه مو ل ه الدرجة

عم امزح

يتموني

فعلا يا حمشو كانت أيام رائعة وكنا مبسوطين بسذاجتنا ورضيانين مو متل ولاد هالجيل ما بيعجبن العجب ومو رضيانين بشي مشكور جدا

مشكككككككككككككوووووورة ع المرررررور

يعطيك العاافيه
حمشووو
بجد موضوووع تحـــــــــــــفه
انا ماعشت بسوريا صح بس علكة كلاس كنت وصي عليها توصاي مشان الطبعات اللي فيها
ولا اغنية عمرو دياب هاي قصه تاااااااااانيه كنت استنى تجي بس مشان وقف وقلد حركاتن
هههههههههههههههههه
ولا الكواسر
بجد يعطيييييييك العاافيه
زكرتني بكل ايام الابتدائي

وانشا الله ما بيجي ع بالك غير الذكريات الحلوة

وبلا تعليق _بس نسيتو أهم شغلة أفلام كرتون بسيط وسلحفايتو سريعة أماشو سريعة شي فخامة ياهيك السلحوفات يابلا _ قاعدوعم أتضحك ع حالنا

اي والله ليك ع ه النسوة

كانت أيام حلوة راحت وما عاد ترجع

بس أكيد فينا نحن نعمل أيام أحلى منها

الله يديم عليكون السعادة والفرح والصحة والعافية

وبتمنى تكون الأيام الجاية خير وبركة عالدنيا كلها بشكل عام

وعلى كل الأعضاء الغالين بشكل خاص

وتقبلو مروري

كانت أيام حلوة راحت وما عاد ترجع

بس أكيد فينا نحن نعمل أيام أحلى منها

الله يديم عليكون السعادة والفرح والصحة والعافية

وبتمنى تكون الأيام الجاية خير وبركة عالدنيا كلها بشكل عام

وعلى كل الأعضاء الغالين بشكل خاص

وتقبلو مروري

شكرا ع المرور وانشا الله ما بتنحرمي من السعادة

حمشو شو باك شو انشالله ما بتنحرمي من السعادة ميمو شب

اييييييييييييييييييييييييييييييه لو ترجع هالايام على الأقل أرحم من ايام الادب الانكليزي

جوى اسف بس والله عندي رفيقتي هيك اسما....عاشق بيعينك الله

عادي HMSHO ولا يهمك هي الألقاب صار أغلبها مشترك

وشكراً جوى عالتدقيق إن شا الله ما بننحرم من مرورك اللافت

ع راسييي