وينك ياأيام زمان

أيام زمان مرت مع الأزمان..

شو رأيكم نسترجع أيام زمان مع عصرنا الحالي ,,,

يعني مابعيده أيام زمان بس قبل شي 30 سنة تقريباً...

(( الشهادة والتعليم ))

زمان ... كانت الشهادة تنفع و حسب الشهادة بتلاقي شغل منيح ومنصب أحسن..

هالوقت ... الشهادة الجامعية لوحدها ما بتكفي أبداً وكتير مادارسين جامعة صايرين مدراء ومحتلين مناصب عالية,,,

(( النقود ))

زمان .. الليرة كان إلها قيمة حتى القرش بيستفيدوا منو,,

هالوقت ,, الليرة صارت ما بتجيب علكة,,,

(( الزواج ))

زمان .. كانت أمور الزواج ميسرة وقليلة العنوسة...

هالوقت ... العنوسة عم تزيد كل سنة والزواج تكاليفو بتهد الحيل ,,,

(( الأغاني ))

أغاني زمان كلها شعر وكلماتها بتفوت عالقلب والعقل ... وما بتنتهي صلاحيتها ...

أما

أغاني هالوقت حكي كتير مالو طعمة وتكرار والمياعة عمتكون الأساس والموسيقى عمتكون مصطنعة والأصوات تركيب ومزبطة!!!
والأغاني أكترها:
البرتقاااالة.. ترا ترا.. عذبتي حاله ويا الرمانة ويالتفاحة و و و >> فواكه
وبعدين رح نصير : يالكوسه ويالبيتنجانه >>>
و هيفا أنا مين غيري أنا ,,لا والمصيبة منكيف عليها :S
وليك الواوا بوس الواوا خلي الواوا يصح <<< بس بدنا أي شي نرقص عليه

(( الفيديو كليب ))

زمان .. الفيديو كليب بيوقف الفنان وبيغني لحد ما تحفظ أشباهه وما بتجي إلا لقطات بسيطة عن عيون بنت أو وجهها من بعيد ...

هالوقت .. الفيديو كليب بتنحول عيونك من كتر لقطات هالبنات اللي ترقص على الدقه وما بتعرف مين هو الي عم بيغني

((( المسلسلات )) >>> التمثيليااااات

زمان ... بتستنى حلقة بكرا على أحر من الجمر وبتدايأ إذا إجت الحلقة الأخيرة لأنو وراها هدف اجتماعي ...

هالوقت ... مسلسلاتنا من أول حلقه بتقول يلا إمتى رح تخلص وتجي الحلقة الاخيرة,,ما فيه وقت نتابع ..
ومسلسلات هالزمن اغلبها بيمطمطوا فيهم <<< بالعافية وبالموت بدهم يوصلوها لتلاتين حلقة!!!

(( الحب ))

حب أيام زمان آخره زواج أو بيكون بنية الزواج وبيكونوا عميتحدوا الكل ويخاطروا لما يحبوا لأنو كان وقتها ما عادي متل هلأ.. كان الحب صادق من القلب فيه تضحية واخلاص . .

هالوقت .. فيه حب بس نادر ما تلقاه صادق ...
الأكثريه بيحبوا إما تمضية وقت أو إنو يلاقي حدا مهتم فيه أو إنو إدام الآخرين هو حابب أو مشان يحس حالو متل البشر أو يعني هيك أسباب ما من القلب وما عم يكون فيه القوة والإخلاص اللي كانوا من زمان :(

(( الجيران ))

زمان .. الجار للجار حتى بيروحوا معك للمناسبات وبيشاركوك أفراحك وأحزانك ... وتحس اللي جنبك أهلك ما جبرانك...

هالوقت .. الجار ما بيعرف عن التاني
و إذا دق عليك حدا قلت شو بدو هاد ؟؟؟ >> والله جيران مزعجين ...

(( الأكل ))

زمان ... كان صنف واحد بيشبعك وطعمه ما ينتسى وكل وحدة أشطر من التانية بالطبخ... حتى الخضرة كان إلها فايدة غير شكل ,,

هالوقت .. بينحط عالسفرة أكتر من صنف وبتتملى كلها أصناف أكل ما كإننا بشر و منحتار شو جاي عبالنا ناكل وبنمل من الأكلات بسرعة والأكل أكتره إزا ما كلو عم يكون جاهز , ونص الخضرة والفواكه بالبراد بتتاكل والباقي بالزبالة!!

(( الوصل والأقارب ))

زمان .. كان بالبيت فيه أكتر من 10أشخاص الأم والأب وولادهم ونسوانهم وأطفالهم>>> وعايشين مرتاحين ..

هالوقت .. كل واحد بدو غرفة لحالو,,, وإذا تزوج بيطلع بيعيش لحالو...
ما بيزور أهله إلا بالمناسبات على حسب أشغاله ...

((( العيد )))

زمان ... العيد بيفرح فيه الكبير والصغير ويومه ما بينتسى ...

هالوقت .. العيد ما بيفرح فيه إلا قلة من الأطفال وصار للكبار يوم عادي فيه تسليم وتأدية واجب عائلي ...

* * * * * * * * * * * * * * * * * * * *

هاي بعض من مقتطفات الحياة المختلفة... بس .. لو خيّرت تعيش بأيام زمان أو هالوقت الحالي ؟؟ شو بتختار !!!؟؟؟

أنا ما عشت فيها ومع إني بحب التطور كتير بس في أمور بأيام زمان كانت نعمة وماعادت موجودة هلأ لهيك بتمنى نقدر ناخذ منها ونضيفها على أيامنا يمكن حالنا بيتحسن...

وعلى قولة أهل الشام:
رزق الله على أيام زمان

وبالفلسطيني: يرحم أيامك يا ستي

وأهم شي.. أيام زمان كانو العرب متوحدين وكلهم مع بعض مو متل هلأ بيكون في حرب بالبلد اللي جنبنا ونحن ما منعرف كل واحد ماشي على مقولة
اللهم نفسي :(

اي والله معك حق بيرل موضوع حلو كتير شكرا لك

للاسف هيك صرنا شكرا

معك حق وعلى قولة المثل (( زمن أول تحول ))

هديك الأيام ما عاد ترجع

وشكرة عاللفتة الحلوة

والله يزيدك بريق ولمعان يا مستر Pearl

تقبل مروري حبيب

مدين كتب:: اي والله معك حق بيرل موضوع حلو كتير شكرا لك

وشكراً لمرورك

HMSHO كتب:: للاسف هيك صرنا

إي عنجد للأسف , شكراً لمرورك

Memo كتب:: معك حق وعلى قولة المثل (( زمن أول تحول ))

هديك الأيام ما عاد ترجع

وشكرة عاللفتة الحلوة

والله يزيدك بريق ولمعان يا مستر Pearl

تقبل مروري حبيب

شكراً لمرورك بس شو هاي مستر؟؟!! أنا بنت :S

للأسف شو بدنا نعمل
هيك الواقع وينك ياأيام زمان 263858

كل شي قلتيه صح للأسف بس بلكي مع الأيام بترجع هديك الأيام_تفاءلو بالخير تجدوه _مشكورة يالؤلؤةالمنتدى ¤pearl¤ وينك ياأيام زمان 885329

انا رأيي حتى هالايام يلي عم نتمسخر عليها هلق

بكرا رح يجي يوم والجيل اللي بعدنا يقول ياعيني ع هالايام

ميرسي بيرل وماتسودولنا ياها كتير

انا اليوم مبسوطة ومتفائلة

» وينك احمد
» بس وينك الحكي بيناتنا
» وينك...شو صاير ماحدا عم يدخل؟؟؟؟؟؟؟؟؟
» وينك...شو صاير ماحدا عم يدخل؟؟؟؟؟؟؟؟؟