قيثارة الليل

على رمل الشاطئ رسمت باصبعها صورة قلب اخترقه سهم ..فسألها:
- الى ماذا ترمزين بالقلب؟
- الى الحب
- و بالسهم ؟
- الى عذاب الحب
- الحب يعذبك ؟
- بقدر ما يحييني
- لم العذاب؟
- من الخوف
- مم تخافين ؟
- من يوم الفراق
- لماذا تتشائمين ؟
- لأن لكل كأس ثمالة و لكل بداية نهاية
- بعض الحب لا ينتهي
- في الأساطير وحدها لا ينتهي
- أعرف عشاقا منذ سنين ..
- أين هم دلني عليهم لأنحت لهم تمثالا
- أنت وأنا
- نحن لا نستحق التمثال ...نحن نستحق منه حتى الآن قدميه
- أنا سعيد بهاتين القدمين لأنهما قاعدة التمثال
- هل سنصل يوما الى راس التمثال؟
- سنصل إذا أصررت أنت على الوصول
- أنا؟
- أنت المرأة ..فالمرأة وحدها تضمن للحب بقاءه
- و أنت ؟
- أنا قد أغادر الشاطئ و أسبح في البحر و أغوص في الأعماق و أبحث عن اللآلئ و يجرفني التيار و لكني سأعود إالى الشاطئ... فإذا وجدتك ارتفع بنيان التمثال و إذا لم اجدك تفتت و صار رملا ...

الله يا رورو على هالكلام الرائع عند هالمسا

بتشكرك من كل قلبي

u r welcome nedalo

فعلاً الرجل أحياناً بروح وبلف وبدور وبمر بنزوات وطلعات ونزلات ... يمكن
بس بالآخر لابد ما يرجع لبيته ولزوجته وأولاده
لذلك لما المرأة بتصبر ع زوجها ما بتكون المخدوعة اللي عم ينضحك عليها
بالعكس تماماً بتكون الواعية صاحبة الرشد اللي بتحافظ ع بيتها وحياتها
واذا رجع ولقاها صانت العشرة وحافظت ع بيته وعيلته وما تخلت عنه
بتوب وما بقى بيرجع للغلط واذا ما كان بيعرف قيمة الجوهرة اللي عنده
بصير بيعرف منيح وبحافظ عليها وبداريها ....

مشكووووورة رورو

الشكر الك اسماعيل .. بس و الله يا اسماعيل احيانا بيطفح الكيل.. والصبر بيصير فوق طاقة المرأة ...
و لما بتتخلى عن الرجل ..بيندم ..بس بيكون وقتها لات ساعة مندم ...لأنو بيكون خلص طلع من قلبها و صغر بعينها..يعني مقصد حديثي في شي بينصبر عليه وشي لا..

مشكور عمرورك الحلو متل العادة

نحنا الرجال دائماً عنا طمع
بحنية المرأة وعفوها و سماحتها
بس أنا معك انو ما لازم نلحس حبيبنا العسل كله

مشكورة كتير رورو

اهلا و سهلا

والله كنت عم دور على هالموضوع لرد عليه لأني نسيت اسمو وما قدرت رد قبل

بدي وقف شوي ضد الشباب
نحنا دايما منرمي المسؤولية عالمرأة
حتى بأبشع خياناتنا منخترع ابشع أعذار
وليس هناك أصعب من الخيانة إلا المسامحة بعد الخيانة
انا بشوف المرأة مظلومة شوي قال يروح عالأعماق ويرجع
ههههههه
الله جعلا بلا رجعة
شكرا رورو عالموضوع الرائع اثر فيني

أبو السوس الغالي
بدك تسمحلي بمداخلة : انو أنا شخصياً ما برمي المسؤولية عالمرأة
بس حقيقة منطمع بكرمها وسماحة نفسها وصبرها
وانا أكيد ما بأيد هادا اللي بروح ما بعرف لوين
بس انا بأيد المرأة اللي بتسامح في سبيل الحفاظ على بيتها
وخاصة اذا كان زوجها غلط غلطة ومانو نسونجي ...
وصدقني هي شغلات بتصير ...
بشكركم رورو وسومر وبتمنى تتقبلوا مروري

لك هلا بسومر مناصر المرأة
كلامك رائع ..شكرا

كمان اسماعيل :شكرا لآرائك المميزة دائما

يعني اسماعيل بدك تقنعني المرا لما تخون زوجا بدو يسامحا مشان يحافظ على بيتو

هاها رد لشوف ..استاذ اسماعيل ..

لك شو صرلي ساعة عم احكي
أولاً انا ماني مع المساواة الكاملة بين الرجل و المرأة . يعني ما فيك تساوي بين غلطة المرأة وغلطة الرجل .وأكيد لما بتغلط المراة زوجها ما بسامحها .
تانياً انا قلت انو نحنا الرجال ما منقبل نشوف المرأة اللي بتعنينا الا بصورة الطاهرة الشريفة اللي ما بتغلط , يعني منطلب منها أكتر ما منطلب من الرجل .
وبعطي مثال الأم والأب بحياتنا :
يعني الاثنين ما مقبول يغلطوا بس اذا الأب غلط ولحق شي وحدة ممكن نسامحه وننسى أما اذا الأم عملت شي أبسط من هيك ما منقبله منها لأنه نحنا منشوفها ملاك ومنطلب منها أكتر ما نطلب من الأب .
هلق الموضوع يطول شرحه واذا استفزيتوني رح نزل موضوع خاص عن القصة

كنت بدي رد ..بس الصراحة نعسانة شوي و ما جاية على بالي خوض بمواضيع جدية هلق ..لذلك هي انا عم استفزك ..نزل موضوع و خلينا نتناقش...اوكي؟؟

طيب ماشي أنا بفرجيكم

هههه ...طول بالك القصة مو حرب ..القصة نقاش هادئ ..ما هيك ؟؟

هادئ جدا جداً
بعدين هالتلاتة اللي عم يضحكوا ليش حاططن انا

ما مشان تعرفي أني عم امزح
ومشان تصدقي هه لشوف

طيب يعني هال "هههه" اللي حاطتها بالبداية لشو ؟؟؟

فهمت مزح .. وانا كمان عم امزح ..

طيب معناتو اتفقنا انو اليوم القعدة كلها مزح بمزح
وخلي الجد لبعدين

اوكي منيح هيك؟