عن الخوف و العزلة

الغرب متفوق علينا بشغلات كتيرة , بس دائماً كنت قول لحالي إنو نحنا متفوقين عليه بوجود حس الأسرة و العيلة المترابطة اللي بتلم كل أفرادها تحت جناحها. بس بالعشر سنوات الأخيرة , ومع انتشار مفاهيم متل العولمة والإنترنت وغزو الثقافات الأخرى ضاعت الطاسة وبلش مفهوم العيلة يتغير وبلشت الأسرة تتفكك بشكل أو بآخر. أحد أهم أسباب التفكّك بمجتمعنا وبعائلاتنا هو العزلة , إي العزلة !!
يعني كل واحد فينا عايش بعالمه الخاص مع تجاربه و قصصه و مغامراته الخاصة , و حتى ع مستوى الغداء أو العشاء , ما عاد اجتمعنا متل العالم ولا عاد أكلنا سوا ولا دردشنا وتسايرنا سوا . ما عاد حدا منا فضفض بهمومه ومشاكله لأبوه أو لأمه أو لأخوه أو لأخته ...
وين الأب الصديق اللي بيحكي مع ابنه عن أيام شبابه وعن تجاربه وأخطاؤه اللي وقع فيها ؟ لعله هالشب ما بيوقع فيها مرة تانية . وين الأم اللي بتخاف على بنتها وبتسألها وين رايحة و منين جاية و مع مين عم تمشي؟
لك حتى الأخوة اللي عايشين ببيت واحد , أحيانا ما بشوفوا بعض غير ع درج البناية ؟؟؟
هل مشكلتنا بالأب اللي بيرجع كل يوم من شغله هلكان ومالو نفس يحكي, ولا المشكلة بالأم اللي كل نهارها بالطبخ والنفخ والغسيل وما عم تلحق, ولا بالشب اللي قاعد 5 أو 6 ساعات عالنت وبدو كل شي لعندو؟ ولا بالبنت اللي ما فاضية هلق لأنو معزومة على عرس رفيقتها و بكرا على عيد ميلاد بنت خالتها وما بعرف شو كمان ؟؟؟ ولا المشكلة بمغريات الحياة اللي عم تلهينا عن بعض وعم تبعدنا بالنتيجة عن بعض ؟
يعني ليش ما عاد في جو من الصحبة ببيوتنا وشو سبب كل هالعزلة ؟
معقول يكون الخوف ؟؟؟؟ خوف البنت إنو تحكي مشاكلها و أخطائها لأنو بتحس انو رح يطلع الحق عليها بكل الأحوال مع انو أهلها وأخوتها بيعرفوا انو كل الناس بيغلطوا بس لما يوصل الموضوع لعندها الغلط لو مهما كان صغير فهو ممنوع وغير مقبول ....
معقول يكون الخجل ؟؟؟ خجل الشب من أبوه أو أخوه الكبير أو أخته ( اذا كان أصلاً بيحكيلها) وانو ما بيتجرأ يقلن شو بصير معو من مشاكل و أخطاء وبفضّل يواجها لحالو ولو كانت رح تزيد , وبلا ما يوجع راسه !!!

أصدقائي الغاليين ....أكيد الشكر والثناء شي حلو و بنبسط فيه , بس اللي بيسعدني أكتر هو مشاركاتكم بالتعبير عن آرائكم و وجهات نظركم ... وأنا أجّلت هالمواضيع الدسمة لبعد الامتحان مشان تكونوا مرتاحين ....

ليك بصراحة اسماعيلو انا عم شوف شي مهم كتير

صحيح انو العلاقة الاسرية ما بقا متل قبل بس برأيي هالشي بغض النظر عن تأثيرو السلبي فيه اشياء ايجابية و منها انو كل شخص صار الو جو خاص فيه يعني ما بيسمح لحدا يتدخل بأي شكل كان و هالشي بيعمل نوع من الاستقلالية عند اي شخص و بيساعدو ليكون جرئ باتخاذ القرارات المناسبة و حتى غير المناسبة بس المهم اتخاذها

والعائلة بمفهوم مجتمعنا هي انو كل شخص يتدخل بكل شيء بخص الاخر و هالشي بنظري خطأ

و خطأ كبير كمان الغاء علاقتنا الاسرية يعني صار فينا انو اخدنا من الغرب المظهر و تركنا الجوهر

من فترة كنت عم تابع فيلم اميركي كلو زنوج والقصة كانت عن جو عيد الميلاد و كيف العائلة اجتمعت و كان جو ولا اروع بس الفكرة الرائعة هي حب افراد العائلة لبعض بدون تدخل اي شخص بشؤون الاخر

و مجتمعنا مو متعود عهيك شي يعني يا بيطخو يا بيكسر مخو

يعني يا اما بتسمح للاخرين بالتدخل او بتقطع العلاقة عالاخر و انا عم احكي نتيجة تجربة شخصية

و طبعا متل ما في نماذج عن علاقات عائلية متوترة و متفككة كمان في نماذج عن علاقات عائلية مترابطة و رائعة

و بالنسبة الي الشغلة بتعود لكبير العيلة و للاشخاص بحد ذاتهن

و تحياتي اسماعيلوووو

مشكوووور نضالو وبحترم رأيك وتجربتك الخاصة
بس أنا حابب هيك نحاول نتخيل حل معين أو خطوة أولى لتغيير هالوضع . يعني برأيك ما فينا نوصل للحل الوسط وللحل السليم يعني مثلاً لمة العيلة والأخوة بوقت واحد على غداء أو عشاء شغلة مطلوبة وحلوة ومنقدر بهيك جلسات ما نفوت بالخصوصيات بس عالأقل منحكي بمواضيع بتخص العيلة ولك يا سيدي منطق حنك ع شغلات فاضية بس المهم ما نبعد كتير عن بعض وما نخلي المسافة بعيدة بيننا كأشخاص عايشين ببيت واحد.

معك حق اسماعيلو

بس المشكلة بشعبنا انو الانا عندو كتييير تأثيرها قوي
فإذا حكا واحد شغلة التاني بيغار و بيحاول اظهار الشخص الاخر على انو لا شيء
و متل ما قلت الحل انو الواحد يعود نفسو عهيك قعدات بس حتى لو انو كل واحد فينا بلش من حالو ما رح يسلم من غيرو و بقللك انو هالفكر يلي عم نطرحو انا و انت يمكن اللي بيلتزموه و بأيدوه هم نسبة لا تتجاوز 20 % من مجتمعنا بس طبعا البداية بهيك طرح يعتبر نشر لهالفكر السامي و الرائع و انا من جهتي هيك متعود بس العتب عالآخرين

و تحياتي احلى اسماعيل

بتعرف نضالو انا معك انو الناس اللي رح تطبق وتوعى لهالكلام يمكن تكون قليلة , بس نحنا انشالله رح نصير آباء وبعدين أجداد يعني اذا اللي حوالينا اليوم ما استفاد منن غير 20% فهي نسبة مرضية حالياً على أمل انها رح تكون أكبر لقدام يعني ع جيل ولادنا اللي نحنا مسؤولين عنه بطريقة أو بأخرى . وعن جد أحيانا الواحد وقد ما غرّب وشرّق بيرجع بلحظة ضعف بحس بحنين لأجواء العيلة و دفئها.
مشكور نضالو الغالي على رأيك الصريح

والله موضوع حلو كتير ودسم على قولة اسماعيل
وتعقيد الموضوع ببساطتو
انا وابي الصراحة ما كتير علاقتنا فيها انو نحكي لعبض وهالتقارب الفظيع
يمكن ما بجتمع معو غير بالمباريات
واحلى شي واكيد انتو سمعانين هالجملة
انو ابوك انسان عظيم و رائع و بيمزح عنجد غريبة فيك ليش مانكن اصدقاء هيك بتعمل معو
انا من راي نضال هالشغلة هي بأيد كبير العيلة
يمكن لأني الشب الكبير عطوني استقلالية فظيعة لدرجة اني استغليتها لنفسي
وحتى عالغدا ما عاد اقعد معن
بس حسيت على حالي وبالغلط اللي عم يصير وحاولت صلح
ومن هالتصليحات انو اخي اللي اصغر مني هلق هو صف عاشر يعني خلص العاشر
بقا عم حاول نكون قراب من بعض رغم انو في اكتر من 6 سنين بيناتنا
عم حاول ادخل بحياتو
اقعد مع رفقاتو
العب معن فيفا
نتفرج على مبارياة سوى
عل وعسى ما بيمرق بالعزلة العائلية اللي مريت فيها انا
ااااخ يا اسماعيل انت الوحيد اللي بتعبني بالطباعة مع اني ياما طابع مشاريع تخرج
على كل حال
شكرا غالي موضوع مميز ونقاش مميز متل العادة

هلق اذا قلتلك اني بنبسط بردودك ع مواضيعي وخاصة الدسمة شو بتقول سومر ؟؟؟
بعدين عالقليلة هون ع قد ما بتكتبوا منيح ع قد ما بتاخدوا علامة عالية من الأعضاء
يعني ما متل الامتحانات بالجامعة ؟؟؟

أبو السوس بدي قلك برافو اللي عم تعملوا اليوم هو المطلوب وهو اللي بدي وصلوا للكل.
بلشوا بحالكن أولاً والمجتمع لحاله بينصلح من دون ما تتعبوا حالكن.
وبكرا أو بعدو انشالله بدي نزل قصة مؤثرة جدا (( لمن أراد أن يعتبر 5)) بتدعم هالموضوع .

سومر

اول شي شكرا اسماعيل عالموضوع الرائع ....

الصراحة انا ما بعرف كيف بدي ابدا ...هلق انا علاقتي باختي الوحيدة كتير منيحة ..و ماما علاقتي فيها اكتر من رائعة ..يعني انا بعتبر عيلتي الصغيرة المؤلفة من اخت و ام اغلى شي بحياتي ..
هلق انا الاب مانو موجود بحياتي(بحكم الانفصال) و لا بدي يكون موجود..لأسباب خاصة ..و الصراحة حتى قبل الانفصال كان ملغى من حياتي.. بس الحمد لله ربي معوضني باخت رائعة وام مثالية ...

هلق يمكن انا منعزلة عنون شوي ..لا مو منعزلة يعني هيك ..بحب اقعد لحالي اتفرج عالتلفزيون و مثلا اقعد عالكمبيوتر فترات اطول من قعدتي معون ..بس بنفس الوقت نحن عنا قعدات كتير حلوة مع بعض منقعد منحكي و منضحك .. ومنفضفض لبعض ..يعني ابدا باسرتنا ما في عزلة و الحمد لله و روابطنا الاسرية ممتازة ..
بدي ارجع اتشكرك اسماعيل عالموضوع .. وعنجد انا بحياتي ما كنت صريحة متل هلق

أول شي رورو بالنسبة لموضوع الأب بحب قول انو الله بياخد مننا أشياء
وبعوضنا بشي تاني أكيد والله يخليلك والدتك وأختك وتبقوا مجموعين ع قلب واحد .
تانياً وهادا الأهم بنبسط انو مواضيعي عم تخليكي تكوني صريحة لأنو هي أحلى صفة بتخلي الانسان يكون مرتاح ومتصالح مع حاله. وانا بحب تجاوبوا بصراحة.
وبتمنى اذا عندك أي تعليق عالموضوع , بعيداً عن أسرتك وتجربتك , كمان تقوليه .

مشكوووووووووووووورة كتيييييييييييييييييير

كما عودتنا دائما اسماعيل مواضيعك للتميز عنوان
فدمت ودام عطااائك

بالنسبه الي بحس اختلاف الاجيال وطريقة التربيه الاساس اللي تربو عليها اهالينا وكيف كان زمانن والزمن اللي نحنا فيه حاليا
كلها شغلات بتلعب دور كبير بإنو صعب تلاقي اسرة مثالية دائما مع بعضن وبيتفهمو بعض
انا مافيني احكي انو ماما ماحاولت تكون رفيقتي مره وتنين وتلاته ومازالت بتحاول
بس يمكن الغلط فيني اني اكتفيت بالمواقف اللي صارت وبخوفها الغير مبرر بس احكيلها كل شي بيسير
وحبيت اشتري راحة بالي
واعزل حياتي وكل شي بيسير فيها كليا عن البيت
التربيه اللي تربتها ماما كتير اثرت فيها كان كل شي ممنوع وعيب عندن
وماعم تستوعب فكرة جيلنا غير وان كتير شغلات عاديه مافي داعي نعمل قصه مشان شغلات كتير بسيطه وعاديه جدا
اما بالنسبه لعلاقتي باخواتي
من 10 سنين سرت اعتبر الكبيره
واختي اللي بعدي ع طول اصغر مني ب 4 سنين
علاقتي باخواتي معدومه نسبيا وهالشي ممكن بيرجع لان خسرت اختي اللي اكبر مني بسنه وانا عمري 7 سنين
وفرق السن اللي بيناتنا بنظري مانو قليل كتير ناس بيحكولي الفرق مو كبير
بس انا من صغري كنت اعتبر الناس اللي بعمري صغار وماكنت حب اقعد غير مع ناس اكبر مني كنت حسهم بيفهموني
بكرر شكري اسماعيل

اللي قلتيه سوسن كلام يؤخذ بعين الاعتبار وأنا بحترم تجربتك اللي الها وضع خاص.
بالنسبة لعلاقتك بوالدتك بقترح عليكي انو تريحي حالك وما تقوليلها عالتفاصيل اللي بتحسي انو صعب تتفهمها , بس حاولي ما تروحي مباشرة للحل الأسهل واللي هو عدم التحدث معها عموماً بأمورك , يعني بقولوا آخر دواء هو الكي ,
لذلك لا تروحي بتصرفك للأخير وتبالغي وخليكي عم تخبريها عن أشياء بتخصك
لو حسيتيها صغيرة ومالها طعمة , بس بتبقى بتعمل جو خاص بينكم.
وحتى أخوتك صدقيني اذا ما منشانك مشانهم , حاولي تكوني قريبة منن بشغلات بسيطة مثلاً : شو رأيكن نتعشى سوا ؟ شو رأيكن نلعب سوى ؟ أي شي بيوفي بالغرض.
وبالأيام بس يكبروا شوي بصيروا بيحكولك أسرارن وبياخدوا رأيك وهيك بتكوني عم تقومي بواجبك كأختهم الكبيرة وانت كمان رح تكوني مبسوطة أكتر بحياتك .

مشكوووووووووووورة ع مشاركتك الغنية
واذا عندك أي تعليق أنا كلي سمع

كل الشكر لشخصك الراقي
رح جرب نصيحتك
بكرر شكري

شكراً سوسن ع رحابة صدرك
وانشالله موفقة بكل حياتك

ولو الشكر الك اسماعيل .. والشكر لمواضيعك اللي بتخلي الواحد من دون ما يحس يقول كل شي عندو ....

اما بعيدا عن عائلتي ما في شي احكي غير انو بعرف كتير عالم ..بيفتقدوا لهالقعدة البسيطة عالغدا او العشا بحكم الاشغال ..او بسبب التلفزيون ..هلق غالبا الاسر صايرة بتجتمع عالتلفزيون ..فصار جل حديثون بدور عالمسلسل او الفلم ... و احيانا ما بكون في حديث من عين اصلو .. فالصراحة انا بشفق على هالعالم يعني مضيعين عليون احلى شي بحياتون و اللي هو لمة العيلة ..
و بدي ارجع اتشكرك اسماعيل

يا 100 welcome رورو
ومشكورة ع كلامك الحلو
ومشاركتك للمرة التانية

merci Isma3el

merci pour toi mon ami
هلق انا ما بعرف شو معناتها لأني سرقتها من حمشو
بس أكيد شغلة كويسة هههههههههههه