هل أنت مع أو ضد قرار وضع الطالبات للنقاب في الحرم الجامعي؟؟؟؟

يعطيك العافيه
أبو الريم
أنا بشوف انو هاي حرية شخصيه
يعني اللي بدها تحطو تحطو وماحدا الو فيها
واللي ما بدها تحطو لا تحطو واكيد برضو ما حدا الو فيها
كل وحده بتعمل اللي بيناسبها

تلبس نقاب تلبس مابتلبس لا تلبس ومش فارقة معاي ..مش فارقة معاي

انا ضد ابو الريم ارجو التوضيح للجميع انو النقاب غير الحجاب ( النقاب تغطية بالكااااامل ) و ما حدا يفهمني غلط يعني هو صحيح حرية شخصية بس ما بحبو للنقاب لأنو الحجاب أحلا

ااااااخ يا ابو الريم وينك من كم يوم و عينك تشوف شو عملو فيني مناصري النقاب بأحد المنتديات

أنا مع لأنو هي حرية شخصية ما بضر حدا

على فكرة ابو الريم

القرار كان منع المنقبات من الدخول للحرم الجامعي وليس وضع الطالبات للنقاب على حد علمي :!: :!:

أنا بعرف شو يعني نقاب وبكامل قواي العقلية أقر وأعترف
أنا ضد منع المنقبات من دخول الحرم الجامعي وبعتبر القرار في حال صدوره جائر.
لأني بعتبر الموضوع مس بالحريات العامة اللي بيضمنها الدستور لكل المواطنين
وخاصة اذا كانت المنقبة لا تؤذي ولا تعتدي ولا تتدخل بأحد.
وأنا أحترم رأي من يقول بأنه لا يحب النقاب وهادا كمان رأي وحرية شخصية .
ولكن ما منقدر نلغي كل شي ما منحبه من الجامعة أو من البلد لمجرد انو ما منحبه؟؟؟
بالإضافة انو هيك موضوع ممكن يعمل حساسية و شحن مالن طعمة ومالن داعي عند فئة كبيرة كتير من المجتمع السوري وليس فقط المنقبات أنفسهن .
وصدقوني اذا اليوم عددن 100 بكرا رح يصيروا 200
اصطفلوا أنا قلتلكن

مع اني الموضوع بوجع الراس
بس ما بقدر الا قلك شكرااااااا
أبوووووووووووو الرييييييييييم

اقتباس :

وقلي شو عملو فيك بأحد منتديات مناصري النقاب

لا لا المنتدى عام بس مناصري النقاب لسا ما عطيت رأيي بموضوعين و ما تشوفهن غير بلشو هجوم مسعوووور و بلشت المشكلة يا ابو الريم و ما عرفت الضرب من وين يجي بس محسوبك كان معو شنتيانة هالقد قدا و بالنهاية تم اغلاق الموضوعين بس شو يا معلم طلعتللك فيهن كلن

اسماعيل

انا ضد وضع النقاب لاني شخصيا و خاصة ببلدنا بعتبرو تشدد مبالغ فيه لأنو اساسو مو من عنا نحنا عنا الحجاب و هادا المفروض الالتزام فيه

و تنويه انا ماني ضد المنقبات ابدا يعني ما في شي شخصي ضدهن لانو هي حرية شخصية متل ما قلت بس الفكرة على بعضها ما بتعجبني لانو مانها من اساس مجتمعنا السوري

شفت أبو الريم لسه القرار ما طلع
والقصة صار فيها شنتيانات وعصي

بقى اسمعوا مني شو بدكن بهالشغلة
وحاج تعملولها دعاية من دون ما تحسوا

نضالو..والتالت تم اغلاقو مبارح بس أنت ماقصرت وكمّلت النقاش للنهاية وانا وجعني راسي عنك[b]

نضالو الغالي
أنا ما بدي فوت بالموضوع كتير وقلتلك انو راسي عم يوجعني من هالقصص
بس تعليقاً على انو ما من مجتمعنا السوري بدي اسأل سؤال
نسوان الحارة بباب الحارة كانوا من السعودية ولا من باكستان ؟؟؟؟؟
بس اذا قصدك انو ما ملابقين لمجتمعنا السوري اليوم إي ممكن
يعني مجتمع الهاي والباي وخليك كوووووووووووووووول

أنا مع الحرية الشخصية والنقاب حرية شخصية ومافيها إيذاء لأي حدا

اي صحي اب الريم اسأل يارا و اسماعيل عن المشكلة

yara
اي صحي والله هادا نسيتو قالولي قال انا ابقا مطول عندن لعما شو بيحبو كم الأفواه

لا ما بينحذف لأنو منتدانا غير المنتدى يلي حكينا عنو و هون مهما اختلفنا منضل أخوة

و اي حدا بأمكانو يعطي رأيو مهما اختلف عن الآخر و لكن بدون تجريح او غلط

و نحنا هون موجودين لنحل اي خلاف ينشأ و اللي ما بيلتزم باستيعاب الرأي الآخر بدون كلام قاسي بينحذف ردو بسهولة غالي ولا يهمك

طبعاً أبو الريم
يعني ما كل ما اختلفنا بالرأي بدنا نحذف الموضوع
لأنو هيك ما بضل فيه مواضيع من أصله
وأنا مع استمرار النقاش ولو ما اتفقنا وما رح نتفق

أنا ضد حذف الموضوووووع أبو الريم وبتمنى من الكل يعتبرو مجرد إبداء رأي ويحترم رأيي التاني وبالنسبة للفيس بوك أنا مابيفتح عندي شوووو الحل برأيك

أبو الريم الغالي ما بالضرورة تنحل المشكلة
وعالأغلب ما رح تنحل
بس المهم انو عم نعمل نقاش حضاري ومحترم
وعم نقبل اختلاف الآراء وتنوعها

ابو الريم (توضيح بسيط اذا سمحت )
اللي بدو يفهم غلط هي مشكلتو و طبعا اذا فهم غلط ما بيحقللو ابدا التهجم على احد , و بإمكان اي شخص يعطي رأيو مهما كان مختلف و غريب و لكن بدون اي استهزاء او تهجم للآراء الأخرى لانو بالنقاش الحاد يلي صار معي بالمنتدى يلي حكينا عنو صراحة بردت اعصابي كتير على ردود كتيرة هجومية و استفزازية و هالنوع من الردود غير مقبول عنا و بامكانك تشوف الموضوع من هالرابط لتاخد فكرة عن الردود الهجومية و المستفذة
http://forum.art-en.com/viewtopic.php?f=2&t=21485

تحياتي

له ما فشروووو هه انا لحمي مررررر