“أخلاقيات الحرم الجامعي” ولكن !!

تابعت كالكثيرين غيري قرار منع دخول المنقبات إلى الحرم الجامعي، كما تابعت العديد من ردود الأفعال والمقالات والتدوينات التي كتبت بهذا الخصوص، فمن الواضح أن المؤسسة التعليمية في سوريا تتجه نحو النهج العلماني في التربية والتعليم، ولا سيما إذا كان أصحاب المعالي هم من الدعاة إلى العلمانية والساعين إلى تطبيقها ولو بالإكراه .. أذكر في السنة الماضية عندما تزامن افتتاح المدارس مع اقتراب عيد الفطر، وكيف طالب بعضهم بتأخير افتتاح المدارس إسبوعاً واحداً حتى ينتهي شهر رمضان والعيد، فكان جواب المسؤول في التربية حينها : “وهل هناك أحد يصوم في الصيف” وتلتها ضحكة مستهزئة ..
يعني الحقيقة يا إخوان صار لازم نقدم طلبات لوزارة الأوقاف حتى تسمحلنا وتعطينا الموافقة لنصوم شهر رمضان القادم كي لا يتعارض صيامنا مع الخطط التنموية والتربوية في هذا البلد العظيم ..

أذكر أنني عندما قرأت القرار للمرة الأولى وقفت عنده متأملاً ومستغرباً مما ورد فيه ، ولاسيما الجملة التي تقول (… ويعلن رفضه لهذه الظاهرة التي تتعارض مع القيم والتقاليد الأكاديمية ومع أخلاقيات الحرم الجامعي) ، ها هه إذاً أصبح النقاب فقط هو الذي يتعارض مع “أخلاقيات الحرم الجامعي” أما عروض الأزياء في الكليات لا تتعارض ابداً مع تلك الأخلاقيات، بل على العكس ربما لاحقاً سيتم إدارج هذا اللباس ضمن “التقاليد الأكاديمية” ..

أتسائل هل “أخلاقيات الحرم الجامعي” تسمح للداكاترة مثلاً أن يضعوا العلامات والمعدلات على هواهم وبحسب حالتهم المزاجية ؟؟ .. هل “أخلاقيات الحرم الجامعي” تسمح بالتمييز العنصري بين الطلاب والطالبات في كثيييير من المواقف والأمئلة كثيرة .. هل “التقاليد الأكاديمية” تعني ألا تقدم منهاجاً مقنعاً لطالب أو مخبراً عملياً لباحث .. هل “التقاليد الأكاديمية” تعني ألا تقدم بناءً محترماً أو مقصفاً نظيفاً أو مكتبة راقية .. هل العملية التعليمية تعني أن تخرّج طلاباً لا يفقهون كلمة في التطبيق النظري وكأنك تمسك بيدهم إلى البطالة مباشرة ..

دوماً في سوريا عندما يتم معالجة أي قضية أو موضوع يتم استصدار الحلول والقرارات من أضيق الزوايا دون المرور على أية مشكلات مرتبطة بذلك الموضوع .. في قضية التعليم مثلاً هل أصبحنا نملك رفاهية الجامعات والهيئات الأكاديمية الفرنسية لكي نستصدر قراراً بمنع النقاب كما فعلت فرنسا .. نعم أنا أوافق “لو” أصبحت مدارسنا وجامعاتنا وكلياتنا مثل فرنسا وأصبحت جامعة دمشق توازي جامعة السوربون الفرنسية، حينها لا تمنعوا النقاب فحسب بل وأجبروا الطلاب أن يأتوا بالبيجاما والملابس الداخلية حتى .. ولكن كما تعلمون حرف “لو” في اللغة العربية تعريفه : حرف امتناع لامتناع ..

اذا اردت التكلم بصفتي الشخصيه فإني قد لا اتفق كثيرا مع موضوع النقاب.و لكن قد يكون علي احترام حريات الآخرين..و معتقداتهم و طرائق تفكيرهم.و ذلك حرصا بالدرجة الاولى على مجتمعنا السوري

ليس هكذا تعالج الأمور، وليس بهذا الشكل القبيح والفج يجب أن تصدر القوانين والتشريعات، قضية النقاب وخلفيتها ورمزيتها وكل ما يتعلق بها تحتاج إلى مناقشة على مستوى رجال الدين بين بعضهم أولاً، ومن ثم بين أوساط المجتمع وطبقاته المتنوعة ثانياً، تحتاج إلى تغيير في الفكر الذكوري وفي العادات والتقاليد والسلوكيات العامة ، ثم بعد ذلك يعالج الموضوع على مستوى وزاري وليس بالعكس كما حصل .

بتشكرك عصام الغاالي عطرح الموضوع الحساس فعلا

هلق بالنسبة لقرار من دخول المنقبات لم يعمم و لم يصدر اي قرار رسمي للجامعات الحكومية و الخاصة بهالصدد و في موضوع بمنتدانا على ما اذكر يشير لهالشي .

بس بالفكرة انا مع القرار لاني شخصيا اعتبر (في بلدنا و ليس في بلد آخر) ان النقاب يعني الخمار الاسود الذي يغطي حتى الوجه ليس من عادات و تقاليد مجتمعنا السوري و نحنا كلنا منعرف بانو الحجاب العادي هو السائد منذ قرون .

اكيد هادا مانو موضوعنا الاساسي , بس انا بأيدك بفكرة انو تركو كل شي مهم و كل شي ممكن يعملوه لتطوير التعليم و لحقو الحجاب و النقاب و ابعرف شووووو , يعني على الاقل المفروض تغيير المناهج الجامعية ولا لااااا المفروض وضع مناهج جامعية لانو ما عنا مناهج يعتمد عليها .

و الدكاترة الاعزاء كل واحد مفكر انو جايب براءة اختراع من اليابان مو شهادة.

طيب فهمنا ما بتسمحو بتنزيل المحاضرات بالمكتبات الخارجية طيب نزلوها بالمكتبة تبع الكلية وين المشكلة , بس هالشي بيدل على انو دكاترتنا بيعطو المحاضرة هات ايدك و الحقني و ما بيهمن ابدا لا مصلحة الطالب و لا من يحزنون .

الموضوع يطول عصامو و الي رجعة نشالله

الف شكر

معك حق عصام 100%
قال شو النقاب بيأثر على نفسية الطالب ومابعرف شو...
وكل هالموديلات لي خاربة الدنيا ونازعة عقل العالم تطور وديمقراطية
اي والله هالدكاترة وها الفشل اكبر نقاب على وجه المواطن
لا تعليم متل الخلق ولا تصحيح ولهلا ماوصلولنا النتائج
وبعد كل هالتعتير
تشرشح لتشوفلك وظيفة بأخر ضيعة
يازلمة شو بدك تصحح لتصحح
الله يصلح الجميع ويفرجها علينا من عندو
شكرا عصام موضوع مهم ومميز

بتشكرك عصام على هاد الموضوع بس خليني احكي بموضوعية ياريت يصير قرار المنقبات رسمي لأن في موديلات بالجامعة حرام تتدخل الجامعة يعني من فوق لتحت اسود عدم المؤاخذة يعني يمكن ابوها إذا شفاها ما يعرف ان هي بنته كمان الاعتدال والتوسط وخصوصا بهي الامور ضروري والدين يلي يعبيلبسوا أسود مشانه هو دين وسط

طايش

يا جماعة الخير طايش معك حق بس انا من ناحيتي بشوف الامر من زاوية تانية واللي هيي انو هاد النقاب للي بدو بيستعمل كوسائل غش امتحانية وصارت كتييييير ولا حدا يقلي عم يصير غش بنقاب وبلا نقاب

هلا البيغش بالامتحان حلال عليه بس مو عينك كنت عينك

تاني شي بالنسبة للعلمانية بتصور انو نحنا دولة علمانية

تالت شي بالنسبة للملابس الفاضحة هي حرية شخصية ومانا موجودين بعصور الظلمات لحتى نمنع الطلاب من اللبس على كيفن وبتضل حسب الجو العام بالبيت وكيفية التربية المنزلية

اخر شي بحب قول هالكم كلمة

نظام التعليم من الناحية التعليمية ومن الناحية النظرية والمشرع عليها ناجح وانا معو مليون بالمية

بس بدك اشخاص عندن ضمير ووجدان ليطبقو المطلوب منن

شكراً على طرحك لهاد الموضوع الحساس عصام

انا شخصيا مع القرار 100% لانو عنجد صار عم يستعمل لاغراض اللهم عافينا
وانا بذكر السيد الرئيس انو وباحد المقابلات المتلفزة صرح بانو نحنا بلد علماني...
والملابس هي حرية شخصية والمتل الفرنسي بيقول((وللناس فيما يعشقون مذاهب))
شكرا عالطرح

بصراحة موضوع النقاب فيها وجهة نظر
بس انا عم قول في اشيا كتير بدها ضبط وتنظيم
ياما سمعنا عن شباب لبسو نقاب ودخلو سكن البنات
بس بنفس الوقت في موديلات لازم يمنعوها
لانو مو شغل جامعة

و الله يا عصام حكيك مظبوط 100%
يعني انا رايي من رايكون .. بدل ما يلتفتوا عالنقاب ..يروحوا يشوفوا الدكاترة شو عم يعملوا ... يروحوا يشوفوا شو عم يصير ورا كلية الاداب " وكلكون بتعرفوا شو عم يصير " ..يروحوا يشوفوا المناظر اللي عم تجي عالجامعة كل وحدة وكأنها جاية من شي كباريه ...و الشباب اللي عم تلطش البنات بلا اي احترام للزمالة و لا هدول كلون بيتوافقوا مع اخلاقيات الحرم الجامعي ؟؟
بس الواحد شو بدو يحكي ؟؟ اذا بدي استرسل في كتير حكي ينحكى ..
بس كنت بدي علق على موضوع اللبس .. يعني انا معكون انو اللبس حرية شخصية .. بس بشرط مراعاة الاخلاق العامة ..يعني من ايمت كان لبس التياب الفاضحة بالجامعة حرية شخصية ؟؟ لهيك حتى هالحرية لازم يكون الها حدود ..
و شكرا عصام لطرحك هيك موضوع حساس بالاسلوب الحلو ..
وبتمنى ما يكون مروري تقيل عليكون او رايي ازعجكون .. بس حبيت احكي بصراحة و قول كل شي بقلبي ..

كسار يفخر بعضو..... قصدي فخار يكسر بعضو

أنا اللي مجنني إنو إذا جيت ببنتكور عالجامعة مابيخلوك تفوت

والبنات ماشاءالله عليهم كل وحدة نسيانة نص تيابها بالغسيل أو عحبل الغسيل وبيخلوها تفوت

دبدوب عميل متلي زحط خصر البنتكور قد ما فيك لحتى يبين بنطلون ولما توصل علباب دخل بسرعة متل الصاروخ ولما بتصير جوا رفع خصر البنتكور هي طريقة مجربة جربها ودعيلي

والله فكرة cool
بس المشكلة اني كنت عم فكر اجي عالجامعة بالشورت شي يوم ماعندك شي حل لهيك وضع دخيلك يامان

بس ماتقول زحط وادخول متل الصارخ مارح يمشي الحال هيك

طيب شو رأيك تلبس فيزون تحت الشورت

طيب شو رأيك تلبس فيزون تحت الشورت

بوكسر اي بس يازلمة شو فيزون ما فيزون

يا جماعة

في شغلة غريبة عم تناقشو فيها

طيب هادا اللبس الفاضح يلي عم تحكو عنو فيكن تقولولي شو هوي

لانو اللي بيشوف حكيكن بيقول في صبايا بينزلو عالجامعة بالبكيني و كمان الواحد بيفكر من حكيكن انو الجامعة صارت متل شواطئ العراة

رح قلكن فكرة : نتيجة الكبت يلي عم نعيشو صرنا عم نشوف اي منظر للفتاة مثير و اذا بين كوعها مننثار فعشو انتو عم تحكو انا كل شي الي بالجامعة ما شفت بنت نسيانة كنزتها بالبيت صح في كتير لبس ملفت للنظر و هادا الشي يلي عم تعملوه فحش

انا مبارح نزلت الموضوع
و هلق حتى فتحت
و لقيت الدنيا قايمه قاعده
طولو بالكو يا شباب و ياصبايا

أنا كل يللي قصدتو من هالطرح إنو فيه مليون عله بجامعاتنا لازم تتصلح و ملحه أكتر من شغلة النقاب يللي هوي ..برأيي...موضوع حساس شوي و كمان فينا نعتبرو حريه شخصيه متل اي نوع من أنواع اللباس و هاد ما بيأثر على مبدأ العلمانيه برأيي


و مشان موضوع البنتاكور و الشورت للشباب RTB و سيرجيو
القصه محلوله...جيب معك شو حابب تلبس
و مر لعندي عالغرفه بالوحده الأولى...عطريقك ..غير لبسك..و كمل طريقك




شكراً على مروركم العطر يا زملاء
منورين و الله

مدين
هون غير هونيك
هون لو اختلفنا ما حدا بيزعل او بيلغي التاني

لانو الجميع متفهمين و كويسين

عراسي مدين

بظن انو الزاويه اسمها نقاشات هادئه
و مو مطلوب ابدا ينطرح فيها مواضيع سخيفه
انو انا مع المطرب الفلاني انت ما بتحبوا
او المواضيع المكرره السطحيه
لازم نتعود بقا انو ما نهرب من المشاكل و نتخبا ورا اصبعنا

كل واحد يحكي رأيو بصراحه
و الاختلاف بالرأي لا يفسد للود قضيه
و بظن هاد النقاش شو ما كان احسن من الكبت

صح عصامو

بس مدين انا فهمت قصدو منيح لانو باحد المنتديات من فترة و هو ارتين تبع جامعة البعث تعرفت عمدين و صار في نقاش بموضوع النقاب و بامكانك تطلع عالروابط
http://forum.art-en.com/viewtopic.php?f=4&t=21451

http://forum.art-en.com/viewtopic.php?f=2&t=21485

و الرابط التاني صار فيه مجازر و هادا قصد مدين من الفكرة يعني هو حرصا ععلاقة الاعضاء ببعضهن و الحرص على المنتدى بشكل عام

بس اكيد نحنا هون غير الشباب الطيبة هونيك مهما اختلفنا ما رح نغلط ببعض او نجرح بعض لانو اي مشكلة من هالنوع رح تتعالج فورا و لهيك نحنا موجودين

عراسي نضالو اكيد انت المشرف العام يا عمي يعني الامور تحت السيطرة