مكونات العائلة السورية

في كل عيلة بتلاقي اشخاص بيتكرروا

-1الشخص الخفيف الدم::

اللي بيسلي القعدة و عادة بيكون لسانه زفر شوي ومسموحله يحكي شو ما بدو طول ما هوقاعد عم بيضحك بالبشر و هوه اللي عمار لما يخطب لميا بيحكيلها عنه لو بتشوفي ابن عمي زياد نهفه بموتك من الضحك و بيجي زياد عالقعده نافخ ريشه لانه بيعرف شو بينحكى من وراه،و شو ما حكى زياد الكل بيضحك حتى لو قال "صباح الخير".

-2كاتب العيلة او شاعر القعدة::

بيكون عادة زلمة شوي كبير بالعمر من اللي بيعرفوا شو يعني كتب وقراءة، الزغار بيشوفوه ممل لأنهم ما فهمانين شو عم بيحكي والكبار بيقعدوا حواليه متظاهرين انهم مهتمين و مبسوطين

-3نمامة العيلة::

وهاي عادة بتكون زوجة احد الاعمام او الأخوال هاي اللي عندها الاخبار دايما و اخبارها لازم تشيل نصها وتصدق نص اللي ما شلته مشان توصل للحقيقة بتبهر وبتفلفل على كيفها وبتضيف من عندها حريمات العيلة بيحبوها وبيكرهوها وبنفس الوقت بيخافوا منها بتحس هيه باهميتها لما حدا يسألها شو الاخبار و بتفرد حالها وبتبلش تذيع وبالاخر بتقول "بالله ما تجيبي سيره اني قلت لك انا شو خصني بتعرفيني بمشي الحيط الحيط وبقول يا رب السترة"

-4غنية العيلة::

كل عيلة فيها واحد بيكون اغنى من الكل و بكل عيلة بتكون مرته مركز نظر النساوين شو لبست ووين راحو شو عملت....و بتكون نمامة العيلة متل الدنب الها مشان تجيبلهم الخبر اليقين بتحكي من طرف مناخيرها و بتقعد ع طرف الكرسي كانها قرفانة و اذا بتضيفها شي اما بترفضه او بتاخده بس ما بتاكله ع اساس انها شبعانة ببيتها كلامها واحاديثها لا تتعدى شو عملت الفلبينية و كيف تخانقت مع السيرلانكية و اديش الشوفير منشف دمها.

-5مصرف العيلة::

كل عيلة متل الحمام الها مصرف (مو بنك قصدي بلوعة) و مصرف العيلة هو الشخص اللي بيجيب العار للعيلة بعمايله السودا بيستعروا منه بس كمان بيخافو من العلقة معو لانو بايعها ومو فارقة معه بيكون عادة صحبه مع زياد اللي بيشوف فيه مصدر هام وأساسي للتنكيت

-6كبير العيلة::

و هادا اللي بدك تسد بوزك وتسمعو وهو بيعيد القصة مرة ورا مرة وبيحكيلك قصص ايام الحصيدة والتلجة الكبيرة ولما كان بالجيش نص قصصه كذب بكذب ومتل ما بيقولو ما اكذب من شب تغرب الا ختيار ماتت اجياله؟ وعكلامو كان رح يشتري نص الشام

-7متغرب العيلة::

كل عيلة فيها على الاقل واحد بالخليج بيجي بالصيف والكل بيكون عم يستنى الهدايا لما بيوصل بيلاقي الكل متجمع والكل بيسلم عليه و بتكون امه عاملتلو ورق عنب وكوسا و شباب العيلة بينلموا واشتقنالك يا ابو الزوز و شفلنا شغل معاك والله اخوك مو لاقي يحلق.... كأنه المسكين صاحب شركة هونيك طبعا اخونا ما بيقصر وبيصير كمان يحكيلهم عن سيارتو البورش وبيته وهو بيكون عايش مع ثلاثة بغرفة وحدة بعد يومين من وصلته بتلاقيه قاعد عالبلكونة بالشيال لحالو عم يشرب شاي ولا حدا سائل فيه و امه بالمطبخ عم تعمل مجدرة

-8عزابي العيلة::

او الدون جوان النسونجي بيكون حليوه (نسبيا طبعا و بس يزور حدا من القرايب عندهم بنات بينضبوا و بيصيروا يبصبصوا عليه من بعيد وبتشتغل المسجات هادا بيكون عنده شوية غرور على شوية عجرفة وبيقعد وبيحط اجر على اجر و عادة بيصير عمره فوق الاربعين وما تجوز و بضل يشتري سيارات بي ام على امل انها تحبك معو....وبكل قعدة بيحكي عن غرامياته وبيتجمعوا حواليه شباب العيلة و بيصير يورجيهم صور ومسجات بموبايلو وكمان بيكون صحبه مع زياد ومصرف العيلة وبيسهروا سوى

-9شقفة العيلة::

احلى بنت بالعيله بتكون محط انظار اولاد العم والخال بس هيه نظرها بعيد شوي بتمشي يا ارض اشتدي ما عليكي قدي و بتقعد مع نساوين العيلة مشان يصيروا يمدحوا جمالها ومتل دون جوان العيلة ما بيعجبها العجب وبتطول لتتجوز هاد اذا تجوزت اصلا وما بتكون كتير صحبة مع بنات العيلة وبتلاقيها دايما في الاعراس عم تتصيد عريس من بعيد لبعيد من مبدأ "نفسي فيه وتفو عليه "

-10دكتور العيلة::

وهاد المسكين اللي ما بيتهنى بقعدة بس يوصل لمحل بيلتمو عليه وبيصيروا خواصري عم توجعني و شوف ياابني مبارح لما.... ( وبيصير يوشوشه)، واللي بتنادي ابنها تعال ورجي الدكتور بلعومك هاتي معلقة يا عبير خليه الدكتور يشوف بلعوم اخوكي واللي بيعرض عليه روشتات دكاترة تانيه و اللي بيجيبله صور اشعة واللي بيقوله شفلي ضغطي وطبعا كل القاعدين بيفحصوا ضغطهم بعدو و كل حياته بتكون هيك بغض النظر ان كانت زيارة او عرس او حفلة طبعا هو كمان ما بيقصر يمكن يصير يقلك مين الحمار اللي عطاك هادا الدوا، ارميه وأنا بكتبلك غيره.

-11كمبيوترجي العيلة::

هذا طبعا بعد طفرة الكمبيوتر صار إله اهمية كبيرة ومن قبل كان الفاشل التافه اللي ما بيعرف شي وضعه متل دكتور العيلة وبتقول امه بس ييجي علاء بيزبطلك الكومبيوتر و الله ما في اشطر منه مبارح خلانا نشوف عمر دياب و بييجي علاء المسكين وبتقلو أمه شوف كمبيوتر ابن خالتك ريم اللعبه ما عم تشتغل و بيجي حمودة ابن ريم وبيقعد يتفرج على علاء "مثله الاعلى" بالحياة وهو عم يشغّل الكومبيوتر و بينبهر حموده و بيفهمو علاء انو مشان تقدر تلعب اللعبه يا حمار لازم بالاول تشغّل الكومبيوتر.

-12طفل العيلة الموهوب::

هادا اللي بكل لمة بينادوه يغني تعال عبود غني لعمو غنية اليسا ولو بتشوفو كيف بغنيها وطبعا في نوعين من عبود:
1. عبود اللي مابيستحي و بتلاقيي قرفك وهوه بيعيد بالغنية وامو فرحانة فيه وكل شوي بتقول ماشاالله كأنه ما حدا خلّف غيرها 2.عبود اللي بتطلع روحك وامه بتقنعه يغني ولك يلا ورجي العمو اديش انت شاطر و بتصير انت بدك تخلص من هالبلوة وبتقلله غني حبيبي بعطيك شوكولا و بيكون بجيبتك فيه شوكولا مفعصه من عرس قديم بتورجيه اياها كنوع من الاغراء و في حالة كان دكتورالعيلة موجود بيجي التهديد المباشر إذا ما بتغني الدكتور بضربك ابرة بتلاقيه صار يغني ونص اصابيعه بتمه و بتصير امو تعطي اعذار وبتعصب عليه بالبيت طول نهارك تغني روح انَقلع من وجهي
/ملطووووش/

أنا رقم 1 & 11 بيذكروني بحالي كتير

حلوين يسلمن سيرج

أهلا ب لول أهلا

لطشه موفقه

أكيد تعبت بين نسخ ولصق مشكووووووور

اي تعبت كتير

هلأ شو بدنا بالحكي اكتر بسلي نمامة العيلة

اي دارك وهي متوفرة بكثرة يعني أقل شي في منها تنين تلاتة بكل عيلة

مشكور سيرجيو موضوع حلو وكل عيلة مابتكتمل إلا بوجود هل عناصر
أنا برأي أحلى واحد فيهن هو كبير العيلة لأنه بعيد القصة مليون مرة وكل مرة
بعدل فيها شوي وبعد كم تعديله بتصر قصة جديدة

شكرا لمرورك علاء الغالي

مشكور سيرجيو موضوع حلو كتير

شكرا الك حبيب القلب