الوداع .... وتحية مني لكم موقع كلية الآداب

السلم عليكم يا جماعة. حبيت سلّم عليكم لآخر مرة لأني عم حضّر حالي لخدمة العلم . بعد عذاب وانتظار ولهفة مدة 3 شهور كانت هالدورة الاستثنائية متل الكذبة علييّ . سهر ودراسة وارهاق وحفظ وكل وسائل النجاح خلال الدورة الاستثنائية الترسيبية _ تنذكر وما تنعاد_ وبتمنى من الكل ما يواخذني لأني عم نفّس عن اللي جواتي وما صار مطرح فش خلقي غير بالموقع .
بتمنى ما بقى تصدر هيك دورة حتى ما نعيش على أمل كاذب.

زملائي .... قصتي اني راسب مرتين بالسنة التالتة وكان عندي7 مواد وبدي 3 مواد كانوا كفيلات بترفعي للرابعة بس للاسف خلال الدورة التانية ما شلت غير مادة رغم التحضير والدراسة . وقتها عرفت اني استنفذت و رايح عالجيش. لحد ما اجا اليوم اللي طلع فيه السيد الرئيس قرار الدورة الاستثنائية , وقتها كان عندي ولو بصيص امل بالترفع وبالفعل زتيت كل شي ورا ضهري وضاعفت جهدي بالدراسة والسهر كله بسبيل النجاح. و رغم اللي صار معي باحدى المواد لمّا انسحبت مني الورقة قبل انتهاء الوقت. صار الكل يفائلني بأنو هي دورة استثنائية يعني ما رح يدققوا وفي تساهل بالتصحيح. اذا هيك تساهل ورسبنا كيف لو ما كان في تساهل؟؟؟
وضليت ناطر يوم بعد يوم شهر بعد شهر . رجل بالتالتة ورجل بالرابعة لحد ما طلعوا المواد وكانت النتيجة ناجح بس بمادة وحدة . انا رايح عالجيش مستنفذ بـ 5 مواد . صدق اللي قال : اللي ما اله حظ لا يتعب ويشقى.

بتمنى من كل واحد أسأت الو انو يسامحني واذا بدا مني اي تصرف غير لائق تسامحوني. انا حبيتكن متل اخواتي واعز ,من المدير العام لكل الأعضاء.

مبروك للي نجحوا وحظ اوفر للي ما نجحوا.

بدعي لربي انو يبليهن لاولاد دكاترتنا بتعسّر الامور ورسوبن بالكلية اللي رح يدرسوا فيها. أو انشالله شوفن بيوم من الايام متسرحين من عملن.
الله يورجيني فيهن يوم.

سلامي للكل.. هي كانت صرخة من قلب مقهور وواحد منحوس غلط لما فكر يسجل ادب انكليزي بيوم من الايام والظروف دائما معاكسته

زميلكم المغضوب عليه عاشق اسبانيا

دير بالك على حالك

الله معك حبيب وانشالله موفق

ما فيي قلك الا الله معك ودايما اشكر ربك على كل شي واتأكد انو رح تنفرج

ولا تتمنى لغيرك اللي ما بتتمناه لحالك

وخلي قلبك متسامح

أنا مقدره شعورك بجد ومدي غضبك وقديش صعب الظلم بس كلشي الو سبب

وصدقني طول ما انت وأحبابك بصحه وعافه كلشي بيتعوض

اسأل مجرب

بالتوفيق يااااااااارب

كمان رفيقي صار فيه متلك
و كان بدو ماده وحده بالدوره الاستثنائيه
و رغم التعب و الدرس ما نجح و لا بماده
و هلق هوي رايح

يبدو انها قصة حظ فعلا..
كللنا مندعي معم على سبب شقاءنا و همومنا و تعاستنا
نحن
المعذبون في الأرض
طلاب الادب الانكليزي في جامعة تشرين

دير بالك ع حالك يا خي
كللنا على هالطريق
تروح و ترجع بالسلامه
و ضل طل علينا

اي شو هالمبالغه

المعذبون في الارض طلاب الانكليزي

اي طولوا بالكم بدكم كلشي جاهز بسيطه بتتعوض

لا تحكوا عن الماضي ولا تندبوا حظكم حبوا فرعكم وامشوا بثقه لتحقيق اللي بتريدوه

مو تنظير بس بجد عم تبالغواااااااااااااا

قال يللي بيعرف بيعرف
و يللي ما بيعرف بيقول عم تبالغوا

القصص اللي عم تصيبر بهالفرع و الأفلام بينعمل عنها مسلسلات تركيه

و رفيقنا عاشق اسبانيا مثال حي قدامك
و متلو متااااااااااااااااايل
وينكو يا زملا.............احكولها

قال عم نبالغ................!!!!!!!!!

متل ما قال عصام اللي بيعرف بيعرف واللي ...

بعدين يا وردة نحنا منحب فرعنا بس حب من طرف واحد لأنو فرعنا ما بيحبنا

و رفيقي صار فيه نفس القصة بس هو وحيد وما عندو جيش وهلق عم يشتغل بمحل تركيب مكيفات

بس ما مشكلة شباب بكرا نحنا بيدخلونا عالجنة مباشرة على كتر ما صبرنا واتحملنا وعانينا بهل فرع

فعلا يا شريك

لازم الواح يشوف النص المليان من الكاسه

يا ويليييييي

معناها لو انتو بفلسطين من اول رصاصة بتهربوا لك شبكم شبكم

مابدي حدا يحكيلي المشكله مو بس بفرعكم كل فرع والو مشاكله

اي انا بفرعي ولاول مره بسمع بسؤال شرح الخطأ يذهب الصواب

وليكني لسه عايشه

هلق بالله شيلو المزح ما حاسين انكم كتير ماشيين بسرعه

اشحطوا فريم وبعدين لازم توقفوا مع عاشق وتدعموا مو تقعدوا معه وتندبوا معه

لك كيف لو عم تدرسوا ذره او فيزياء شو بصير فيكم

روقوا واتكلوا على الله وادرسوا ولا تحطوا كل الحق على الفرع واللي بصير فيه

يا عاشق إسبانيا أنا كتير حزين لأنك بدك تغادرنا وتروح عالجيش
بس على كل حال , نشاء الله بتروح وبترجع بالسلامة وخليها تكون إستراحة المحارب
بالنسبة للأخت وردة تشرين متل مابيقولوا : لبيعرف بيعرف ويلي ما بيعرف بقول كف عدس
أنا مين بيعرف معنى كلمة ظلم بلأدب الإنكليزي مشكلتنا تتلخص بعدم وجود سلم تصحيح
للمواد يعني كل دكتور بصلح على كيفه ومتل ما بده بكون قصد الكاتب
خلوها على ربكن

عاشق اسبانيا

الله يكون معك يا غالي

الله يكون معك وانشالله يكون حظك احلى ولا تزعل عشغلات فاضية
موفق يا رب

تأكدانو الخيرة فيما اختاره الله
وعسى ان تكرهو شيئا وهو خير لكم
اهم شي انك ما تكون فكرة سلبية عن حالك لانو عنجد صار معروف انو الانكليزي فرع بدو ((((((((حظ))))))))

توكل على الله وكلشي بيجي من الله يا ما احلاه

الله معك حبيبنا تروح وترجع بالسلامة.

اووووووووووووف متل مابدكم انتو المعذبين بالارض وانتو المظلومين بس

وغيركم عايش بالعدل منيح

وبرأيي اتركوا الفرع أحسن

شو هالاراده اللي عندكم

شو بدي اعرف ما كلنا بنفس الكليه ولا مفكرين الدكاتره عنا ملايكه بالله بس انا ما بحب الندب

انا بعيش وبتقبل اللي عايشته طالما من ايدي وبتحمل المسؤلية

حلوي حب من طرف واحد سيرجيو والله معك حق

وردة تشرين بصراحة الدكاترة زودوها بكليتنا والظلم واضح

سواء بطرح الاسئلة ولا بالتصحيح

بس سمعت انو في دورة هاي السنة كمان للمستنفزين

وإن شاء الله يطلع صح .

الله يفرجها عليك عاشق اسبانياوعلى كل الاعضاء والطلاب

ويارب تكون خاتمة الاحزان

تروح وترجع بالسلامة يارب

المهم تدوم الصحة والعافية

موفقين جميعا

أنتم السابقون ونحن اللاحقون
وكلنا عهالطريق
بس الله يبعتلك شي ضابط ابن حلال
بعدين ولو والله حلوة العسكرية وبترجع رجال
موفق خيو

انا بالنسبة الي تصالحت مع حالي وقررت بلش صفحة جديدة مع حالي وشكرا للكل واصلا انا بدي روح عالجيش حتى غير جو واطلع من قرف الجامعة شوية متل ما قلتRomantic Teddy Bear بس ما بعرف اذا رح يكون في دورة للمستنفذين على المدى القريب بعد ما صار في دورة امتحانية تالتة
اما رح انتظر او سجل تعليم مفتوح او غير الفرع كله
حتى والدتي كذبت عليها وقلتلها اني نجحت بالمادة بس حابب روح وما بعرف كيف اقنعتها حتى ما تصير مشكلة بيني وبينها لانو اذا خبرتا رح تحط الحق عليي بكل شي وصير انا السبب وانا المذنب وكل شي بالجامعة بريء

أنا سمعت في دورة للمستنفذين ويارب تنجح بكل موادك

بس شو تغير فرعك طول بالك ما انت وصلت لرابعة

وإذا رحت عالخدمة بتكون خلصت حالك ماهي وراكن وراكن

بتخلصا وبتكمل دراستك

والله ييسرلك ويعطيك خير الامور يارب

والخيرة فيما اختاره الله

تروح وترجع بالسلامة
يمكن حظك يمشي حالو ويكون أحسن بعد فترة
ويمكن يكون فيه خير الك وصلاح الك
(عسى أن تكرهو شيئا وهو خير لكم)
دوري اجا وصار لازم روح
لبّي ندا راي عم تنادي
أخد معي من الروح نص الروح
وحبك يا عمري احمل زوادي
اترك بلادي................ لأ
لازم رووووووح
ترك بلادي................ لأ
لازم رووووووح
تكرم عيوووووووووووووونك وتكرم بلادي
تكرم عيوووووووووووووونك وتكرم بلادي
أنا رايح بكرة عالجيش اتجند بين رفــــــــاقي
بعرف يا روحي قديش مافيكي اطيقي فراقـي
لكن أنا رايح اتـــــجند مهما دربك عني يبعد
قولي لقلبك يــــــــتأكد إني على حبك بـــاقي
أنا رااااااااااااااااااااايح أنا راااااااااااااااااااااااايح
يمكن بكرا رح اتغـــير قصة شعري متل العســكر
وبتزرع شمسات بلادي فوق زنودي اللون الأسمر
بكرة رح بتشوفـــــــيني ملون بالمجد جــــبــــــيني
وأول ما بتلاقيني بحكيلك عن أشواقـي
بكرا البارودي بيعطونـــي وبتسهر بالليل عيونــي
وبين البارودة والعـــــــين مع دقة قلبي بتكونـــي
منك شي صورة اعطيــني حتى اضل تــسلـيـنـــي
احكيها وتحاكيني وغــفــيـها بين وراقي
وائل كفوري
تحياتي الك وانشالله تكون مرتاح
تروح وترجع بالسلامة
حسين

تروح وترجع بالسلامة عاشق اسبانيا .. وطول بالك .. و الله الشغلة صعبة .. بس الله بعين ..
رح نشتقلك ..

كل ما نزلت اجازة رح طلطل عليكن من فترة للتانية بلكي لوقت ما اتسرح بيكونو تغيروا الدكاترة