للأسف الوضع من سيئ الى أسوأ بكليتنا الموقرة

1- موظفين الجامعة ما الهن علاقة بشي بيخص الجامعة و ما بيعرفوا شي حتى على مستوى علامات حلقة البحث ما حدى بيعرف شي و كل واحد بيقدفها عالتاني و هالشي عن تجربة شخصية
2 - وضع الحضور بالقاعة 5 آثار ما بقى عم ينطاق و انا بنصح مريضين الربو ما يروحوا لان رح يتوفو عالاكيد لان نحنا يا دوب عم نتنفس و السيد يوسف شاهين قال رح يبقى الوضع على ما هو عليه
3 - هالدورة الاستثنائية بحد ذاتا كانت متل قلتها و ما حسينا انو صار مساعدة للطلاب و لا باي سنة بالعكس انا شفت النتائج عادية كتير و متل كل دورة
4 - الطلاب اللي دفعوا مصاري للتكميلية ما رجعولهن شي مع انو رجعولن بباقي الجامعات
5 - بتمنى كل واحد يحط رأيو بصراحة بغض النظر عن وضعو حتى لو كان شايل كل موادو

الموظفين مفكرين حالهم افضل من الطلاب و ما بيعرفو الله وين شالحهن

و بيفتقرو لادنى درجات الدقة في العمل و ضاربين الدولة منية انو موظفين فيها

قلناها الف مرة يلي مانو قادر يضبط الامور بما فيه مصلحة الطلاب يترك الكرسي لحدا افضل منو

بالنسبة للاستثنائية رح احكي بصراحة :

دكاترة الفرنسي منهم ساعد الطلاب و منهن لا

الدكتورة سوسن الضرف مشكورة على اسئلتها الراااائعة و يا هيك الدكاترة يا بلا
الدكتور نسيب شحادة مثال للدكتور يلي بيحب طلابو و بيحترمهم و بيقدر تعبهم و الله يجزيه كل خير
الدكتور محمد الأحمد : شكرا يا دكتور على نسبة النجاح الضئيلة و المتدنية و التي لا تقبل بها اسوأ جامعات العالم , مادتين لسانيات فصل اول و تاني العالم راسبة بدرجة صفر , و الحجة تبع الدكتور , قال شو معطوه ورقة اذا موافق عالدورة الاستثنائية او لا , بالاضافة الى انو ما بيقدر يصحح بالصيفية قال هي وقت اجازتو

فتخيلو يرعاكم الله حالنا , هناك العديد من الطلاب الذين توقف تخرجهم على مادة اللسانيات و عندما اتت دورة السيد الرئيس كفرصة لتدارك الوضع , كان لنا الدكتور محمد الاحمد بالمرصاد .

فهل هناك من يقدرعلى ايقاف هذه المهزلة ؟؟؟؟؟؟؟؟؟؟؟؟؟

و في دكاترة تصحيحهم حق يعني لا بيظلمو و لا بيتساهلو و لهم كل الاحترام .

تشكرات دكتور فوستس

فعلا دكتور فوستس .. والله معك حق ..يعني فعلا صاير وضع الجامعة مزري .. وماحدا بيعرف شي .. و الموظفين غير متعاونين بالمرة ..
و بالنسبة للوضع القاعة .. يعني فعلا شي ما بينطاق ..لا وفوق منها كل دكتور بفوت ..بيقعد بسمعنا حكي عالعدد انو كتار و هو ما عاد عندو حرية بالحركة او انو غط على قلبو من منظرنا .. يعني شو بدنا نعمل ..ما نحن وضعنا اسوأ من وضعون ..و ااااخ الواحد شو بدو يحكي... شي بجنن ..

شكرا على طرح الموضوع المهم للنقاش
أولا: بالنسبه للحضور بقاعة الآثار بعتقد أنه مهزله اليوم نزلت مشان أحضر لغة وكنت موجود قبل المحاضرت بساعة ومع هيك ما شفت ولا مقعد فاضي وحبيت أنتطر حتى يجي الدكتور ناصر وفعلا لما حاول يدخل القاعة ,أستطاع الدخول إليها بعد عبور الحواجز المؤلفة من كراسي الطلاب وتأهل للمحاضرة القادمة , بس أحلى شي بالموضوع لما طلب من الطلاب يسكروا الباب
هو صحيح سكر ولكن لو وضع في طريق الباب أبرة صغيرة لما أنغلق على المساجين الضعفاء
كنت عم فكر صور الحالة وأعمل دعاية للأدارة الكريمة .. يعني معقول مادة مهمة متل اللغة نصف الطلاب يبقوا خارج المحاضرة ومادة متل الإنشاء للسنة الثالثة يلي ما بيحضرها عشر طلاب تكون بالمدرج
ثانيا : يخصوص الدورة الإضافية أنا قدمت أربع مواد وهم :
الترجمة 62
اللغة ف1 55
المسرح ف2 28
المنهجية 23
وبعتقد إني نظلمت وبستاهل أفضل من هيك ويعني المسرح والمنهجية مادتين سهلتين بس
الدكاترة معقدين ما بيعرفوا شو بدهن ولازم يا شباب نطالب بحقنا أنو يكون فيه سلم تصحيح
للمواد ينشر قبل أو بعد صدور النتائج حتى نعرف وين مصدر الخطاء ولحتى تتوقف هل مهذلة
تبع المواد وسلسلة الرسوب المتلاحقة
آسف لأني طولت بس هاد رأي بصراحة تامة

Alaa m كتب:

شكرا على طرح الموضوع المهم للنقاش
أولا: بالنسبه للحضور بقاعة الآثار بعتقد أنه مهزله اليوم نزلت مشان أحضر لغة وكنت موجود قبل المحاضرت بساعة ومع هيك ما شفت ولا مقعد فاضي وحبيت أنتطر حتى يجي الدكتور ناصر وفعلا لما حاول يدخل القاعة ,أستطاع الدخول إليها بعد عبور الحواجز المؤلفة من كراسي الطلاب وتأهل للمحاضرة القادمة , بس أحلى شي بالموضوع لما طلب من الطلاب يسكروا الباب
هو صحيح سكر ولكن لو وضع في طريق الباب أبرة صغيرة لما أنغلق على المساجين الضعفاء
كنت عم فكر صور الحالة وأعمل دعاية للأدارة الكريمة .. يعني معقول مادة مهمة متل اللغة نصف الطلاب يبقوا خارج المحاضرة ومادة متل الإنشاء للسنة الثالثة يلي ما بيحضرها عشر طلاب تكون بالمدرج

والله مظبوط انا مبارح صار فيني نفس الشي .. يعني عنجد مو طبيعي يعني المحاضرة 11 .. كنت بالجامعة الساعة عشرة و عشرة .. و ما لقيت ولا محل فاضي .. ولو ما رفيقتي حاجزة محلين ما كنت قدرت احضر .. يعني عنجد مو طبيعي ايمت لازم نجي عالجامعة يعني من الستة الصبح ...
بعدين اللي عم يعمل الازمة هنن حلقات البحث .. يعني اليوم اللي بكون في حلقات بحث لأي فئة من الفئات بكون انا عارفة سلفا انو القاعة كلها انحجزت ..مو معقول يعني واحد بيحجز لعشرة .. ما بصير هالحكي .. لازم كل واحد يحجز لحالو و بس .. اما واحد يجي قبل بساعة ما يلاقي محل و واحد يدخل بعد الدكتور بساعة يلاقي محلو عم ينتظرو ..هيك ما بيصير
لا ومتل ما بقولوا فوق الموتة عصة قبر .. كل دكتور بفوت بيتافف .. ليش هيك عاملين .. ليش هيك مسوايين .. ليش جايبين كراسي .. شو بيعملو يعني ؟؟ اقترحوا حلول بدل ما تتاففوا بوجه الطلاب اللي حالتون مزرية فعلا .. و الله العظيم عيب .. ما في ولا جامعة بالعالم هيك ..


ولازم يا شباب نطالب بحقنا أنو يكون فيه سلم تصحيح
للمواد ينشر قبل أو بعد صدور النتائج حتى نعرف وين مصدر الخطاء ولحتى تتوقف هل مهذلة
تبع المواد وسلسلة الرسوب المتلاحقة

بشكر الجميع عالتفاعل و انشالله يلاقو حلول لهالمشاكل بسرعة لأن بصراحة تحولت لزريبة مو جامعة و فوق كل هادا نسيت قول انو الاخ ناصر عم يشرح الدرس من براة منافسو و قال هوي بيعتقد ان 80 بالمية من الطلاب رح يحضروا السنة الجاية المادة

شو كان خسر جلال لو حطلي 6 علامات كافية لاترفع عالرابعة بدال ما روح عالجيش وانتظر دورة مستنفذين

التناقض ميزة كلية الاداب
طالما القائمين على الجامعة عنا بيشكوا من الاعداد الهائلة للطلاب بالتالتة والرابعة كانوا تكرموا على هالطلاب ونجحوا اكبر عدد مكن حتى يخففوا ضغط بدال ما يرسبوا عالاربعين و خمسة واربعين علامة

شكرا ruru
على التأيد وأكيد لازم نطالب بحقوقنا
والله يا دكتور فاوستس إذا كان السيد ناصر هيك مفكر
أوهيك بيعتقد
أأأأكيد ما بنتخرج السنة

مشكورين يا جماعة عالبث المباشر من المحاضرات

أنا كنت عم فكر احضر شي محاضرة هالأسبوع بس بعد اللي كتبتوا أعوذ بالله

طيب يا طلاب الانكليزي
الموضوع صار مطروح أكتر من مره
و كللنا عم نعاني بالأخص طلاب الرابعه

و بعرف انو كل طالب فيه يكتب معلقات عن معاناتو و الافلام يللي عم تصير معو
طيب خللونا نفكر بشي نعملو أحسن من النق يللي ما منو نتيجه


عالأقل يعطونا ابسط حقوقنا بإنو نحضر محاضره متل العالم و الخلق

شو رأيكو يطلع منا وفد لعند رئيس الجامعه
طالماهون بالكليه ما حدا عم يرد علينا

هاد رأيي....
بتمنى اسمع رأيكو

انا بالنسبة الي ما عندي اي مانع بس لازم نجمع عدد منيح و نروح اللي موافق يحط رد هون و بس يصير العدد منيح منتفق ايمات بدنا نروح و بيكون اللقاء عند كافتيريا الآداب و انا رح اجي اول واحد

و الله انا كمان ما عندي مانع .. بس الصراحة انتو قوم تقولون ما لا تفعلون .. هديك المرة على اساس اتفقتوا تروحوا تقدمو تظلم عند العميد و ضليتو تحكوا فيها اسبوعين .. وما طلع معكون شي .. ولا رحتوا ولا جيتوا..
بس اذا صارت القصة جد انا معكون ..

هلا الموظفين نفسياتن بتخليك تقرف الجامعة ويلي فيا واحدن امعو بكلوريا وبيعملو حالو دكتور ومن المواقف يلي صارت معي..
فتت ع امتحانات قسم التاريخ عم اسال عن وثائق التخرج وكانت الانسة عم تلعي ع التلفون وما رضت ترد لانا عم تحكي بامور الكون مع العلم انو اغلب الطلاب يلي تخرجو من الجامعة الموقرة ما قدرو يكفو دبلوم لانو جامعة تشرين الوحيدة بالقطر ما عطت وثائق او حتى اشعار بالتخرج......وحث ولا حرج وبلاخير عنجد هزلـــــــــــــــــــــــــــــت

سلام ممكن شارك ولو برأي صغير

الموضفين ارفعوا عليهم العشره بتفوت لتطالب بحق الك بتطلع والحق عليك وبحملوك مسؤلية واذا واحد زعجهم وبالجكر بقلولك استنى ساعه

عدا اللي بكونوا عم يفطروا او بشي حديث ومو فاضيين

مع التأكيد على بعض الموظفين اللي قليلين كتير اللي بكونوا فعلا مافي منهم بالاحترام والزوق

وانا مع رأي عصام انو يعني حاج كلام واتجهوا للأفعال

طالبوا باللي الكم مشان تعملوا الي عليكم

وموفقن جميعا وبدعيلكم بالاحوال الفضل يارب

هلق اكيد اي كلية لها سلبيات وايجابيات ما تتصور مشكلة الموظفين مشكلة كبيرة لكون الموظفين احتكاكنا معن قليل ومن السنة للسنة وحكيك مزبوط بالنسبة للموظفين اما قاعات الاثار فبتصور ان هاد وضع مؤقت مو اكتر و طبعا بالنسبة للدورة الاستثنائية كان الوضع صعب بالنسبة للطلاب ويلي استفد منها كان حامل مادة مادتين ونادرا ما تشوف يلي مادتين تلتت اربع مواد استفد من هالدورة وبالنسبة للمصاري هي المشكلة بتصير بكا محل يعني رفيقي مثلا انتقل على حلب ولما انتقل كان هو بالسكن الجامعي ولما انتقل طالب ذاتية السكن بالتأمين للسكن يلي هو دفع وقت سكن وعلى اساس بيرجع وطبعا ما رجع عادي بتمنى تتقبل رأيي بكل صدر واسع مع الشكر

انا بالنسبة الي بكرا رايح عند يوسف شاهين الساعة عشرة الصبح اللي بدو يروح معي يلاقيني فوق جنب مكتب يوسف

ههههههههههههههههه
اذا لقيتو بالمكتب ابقى سلملي عليه

بالفعل ما لقيتوا و لا مرة رحت فيها ما بعرف ليش بس الا ما القطوا شي يوم مع اني مقتنع انو ما رح يطلع منها شي بس رح حاول

والله ياأخي كل موظفين الجامعه معظمهم ليس معهم شهادات عليمة يادوب معهم بكالوريا كا تعيينهم هو واسطه بواسطه أنا درست في كلية الأداب قسم اللغة الإنكليزية ولي خبرة كبيرة مع هؤلاء الموظفين الله يعين ويساعد

موظفين الجامعة معاملتهم للطلاب سيئة جدا .. وكلهم نفسية وما بعرف على شو طول الوقت معصبين ..

اما القاعة 5 اثار كل المقاعد محجوزة والطالب اللي ما بيوصل من الساعة 7 لا يحلم يحضر المحاضرة .. بتمنى لو المسؤولين عن توزيع القاعات يتعاطفوا شوي مع الطلاب .. نحنا سنة رابعة وطبعا الحضور مهم جدا بس بما انو الحالة هيك فاغلب الطلاب مش عم يحضروا ..
_ فعلا توقعت بالدورة الاستثنائية تكون العلامات أعلى
أنا شخصيا مرعوبة من السنة الرابعة ..... بتمنى التوفيق للجميع
ميرسي dr.faustus