هام جدا جدا جدا لجميع رواد المنتدى

منتدانا هذا عبارة عن فكرة كانت حلم و تحققت بفضل كثيرين ممن ساهمو في اغناء و تحريك المنتدى من خلال نشاطهم و مشاركاتهم و مواضيعهم .

و نحن في ادارة المنتدى ننوه :

منتدانا هو منتدى تعليمي بالدرجة الأولى و تثقيفي بالدرجة الثانية و ترفيهي بالدرجة الثالثة , و جميعنا نرحب بالأعضاء الجدد الذين يبتغون الفائدة و الافادة و نفسح لهم مكانا في قلوبنا و عيوننا و نتشرف بانضمام الجميع سواء كانو من طلاب كلية الآداب او غير ذلك .

و هناك بعض ممن يسجلون في منتدانا , يظنون انه مكان للتسلية أو التعارف فقط و قد وردتنا العديد من الشكاوي عن ازعاجات عبر الرسائل الخاصة بقصد التعارف و اللقاء و غيرها من اشخاص ليس لديهم اي مشاركة او اي موضوع يعرِّف عنهم , و هذا يعني انهم اشخاص سجلوا لدينا بغرض ( التطبيق ) كما هو معروف باللهجة العامية .

نحن هنا لسنا ضد التعارف و لسنا ضد انشاء الصداقات عبر منتدانا , لا بل و نُسرُّ بأن نكون الجهة التي تجمع طلاب الكلية بطريقة حضارية قائمة على الأسس الأخلاقية الراقية التي تربينا عليها في منازلنا . ولكن امام ما يحصل من اهانة لمنتدانا بطريقة بعض الذين لا يرون منفعة من هذا المنتدى سوى ما تفهمه عقولهم المُضمَحِلَّة , يتحتم علينا الدفاع بقوة عن هدف هذا المنتدى و الذي هو الرقي بمستوانا العلمي و التثقيفي و الفكري و الاجتماعي و لنكون عبرة تعتبر في الاخوة و الصداقة و احترام الآخر مهما كان اختلافه و لنكون يدا واحدة لنتساعد في رقي كليتنا و جامعتنا و مجتمعنا بشكل عام .

بناء على ذلك قررنا :

1- حظر اي عضو يسجل في المنتدى بغية التعارف فقط ( التطبيق )
2- يمنع وضع ايميلات الأعضاء في المشاركات منعا باتاً

ولكم منا كل الاحترام و التقدير على مساهمتكم في تحقيق ما نبتغيه من خير و طمأنينة للجميع و احترام الآخر و تحصيل علمي عالي لنا بإذن الله

دمتم بخير

إدارة المنتدى

والله عم تحكي صحي لأنو الظاهر من الأعضاء الجدد ما حدا من البنات امعبلان بالجامعة لهيك قالو لنجرب بالمنتدى بجوز تظبط وهؤلاء تفكيرهم لا يتجاوز أنوفهم

انا خارج الملاحظة لاني ام وزوجة بس مشكوووورين عالاحترام والاهتمام

شكرا جزيلا نضال .. هي خطووة كتير حلوة .. لرقي المنتدى نحو الافضل ..

معك حق ابو النضل و اي اساءة للمنتدى هي اساءة النا كلياتنا

بعد الشكر الكبير

اسمحولي احكي شي

أنا من فتره كل مابدخل المنتدى وبشوف المواضيع الاخيره بشوف أغلبها نكت والعاب

أكيد أنا مو ضد هالشي

بس متل ماقلت بكلامك منتدانا بالاول ثقافي تعليمي

ولما بدخل وبشوف كل المواضيع الاخيره هيك مابحب شارك

أنا بعتذر منكم وموقصدي ازعاج اي حدا انا بدي نبقى الافضل

ومابظن خلصت الموةاضيع الهامه اللي بتخص الشباب ومشاكلهم

شكرا الكم

يا وردة صحيح ومعك حق بس لاتنسي المنتدى ترفيهي ايضا ..
وكل موضوع عم يوضع بقسمو .. وانتي بتاخدي من المنتدى الشغلات الي بتوافق اهتماماتك ..
ووئت اي حدا عم يشوف انو في مشكلة عم تواجهو شخصيا او عم تواجه الشباب اكيد
عم نطرحها ونتناقش فيا ..
وكل حدا الو اهتماماتو هون .. واكيد وئت انتي مابتشوفي فائدة بالموضوع حئك ماتردي
ليس عليكِ من حرج ..
هاد رايي ..
مودتي ..

أكيد نحنا جميعا ما منرضى بهاد الشي...وهدفنا الأول والأخير تعليمي
ونحنا كتير حريصين على التواصل والصداقة بس بطرق سليمة

شكرا لكم جميعا

وردة : انا معك بس كمان في شي مهم , انو نحنا ما منقدر ننزل المواضيع الهامة كلها فرد دفعة لان لازم نعطي فرصة للمواضيع الاقدم تاخد حقها و كمان نشان الناس تلحق متابعة كل جديد

و بعتقد نحنا هلق ماشيين بخطى جيدة و فيها توفيق بين التعليم و الثقافة و الترفيه و لكن متل ما قلتي بأيدك لازم نهتم اكتر بالأقسام تبع كليتنا

و لكم مني كل الاحترام

مع احترامي للادارة وكل الاعضاء المساهمين بحب قول
كلمة تطبيق مو كتير لايقة لطلاب وشباب اكاديمين هدول الي بالن يطبقو بيكونو
سفيهين بكلمة التطبيق
بس من ناحية تانية شغلة الايميلات بشوفا حرية شخصية مادام الطرف التاني رضيان
وغير هك انا بحب أكد انو كلامك منطقي نضال ولازم نحارب كل تافه غرضو تخريبي للمنتدا
وسمعتو لاني انا بعرف انو في دكاترة للجامعة عم يزورو المنتدا وأكيد رح يكون في شي بخجل
ازا شافو انو مستوى المنتدا متدني
وكل الشكر للاعضاء والادارة

شكرا أبو النضل وهي سمعة المنتدى بالدرجة الاولى

يعطيك العافية نضالو و الموضوع اللي طرحته كتير مهم
لأنو هيك شي ممكن يخلي ناس كتير عم يدخلو على المنتدى
بهدف الاستفادة و التواصل مع أخبار الجامعة يلغو دخولهن على المنتدى
و ياخدو انطباع سيء عنه فكان لا بد أنو تاخدو هالقرارات

اقتباس :

كلمة تطبيق مو كتير لايقة لطلاب وشباب اكاديمين هدول الي بالن يطبقو بيكونو
سفيهين بكلمة التطبيق

اكيد ريمون يلي بيفوت منتدى و من اول مشاركة بيبعت ليتعرف بطريقة مضحكة هيك عينك عينك هادا فايت ليطبق بكل معنى الكلمة و ليس مرحبا فيه بهذا المنتدى لأنو بيعطي فكرة غلط عن المنتدى

شغلة تانية بالنسبة للرسائل الخاصة :

صح هي شغلة حرية شخصية بس تنتهي حريتك عندما تبدأ حرية الآخرين و هالكلام عام و مانو موجه الك طبعا , و نحنا كإدارة لما بدها تجينا شكوى عن اي ازعاج سواء بالرسائل الخاصة او غيرو رح نتصرف بالطريقة الملائمة و هادا اللي صار , لما شخص بيبعت لعضوة من الاعضاء رسالة و تنتين و تلاتة نشان يتعرف مع العلم انو ليس له اي مشاركة بالمنتدى فهادا الشي اسمو تطبيق لأن ما في مصطلح ممكن يوصف هالشي غيرو , و اما اذا حب اي شخص يبعت عالخاص و ما صار بحقو اي شكوى و قتها نحنا ما النا كلام و لا النا علاقة اذا المرسل اليه مانو مزعوج .

شكرا لمرورك و رأيك

شكرا لمروركن سارة و سونا و نشالله رح نرقى بهالمنتدى للأفضل دائما

سما الشام

أنا قلت اني مو ضد بس بجد لما بدخل وبشوف انو كل المواضيع الجديده نكت والعاب بطلع

أو بحط موضوع للنقاش

شكر الك

وشكرا نضال عالتوضيح

يعطيك العافيه
نضال
وانا ماعندي شي ضيفه اكتر
من اللي انت كتبته
دمت ودام منتدانا راقيااا

بشكر الادارة على الاهتمام الكبير والمميز بالمنتدى

الله يعطيك العافية على هدا الكلام انا اول ما اشتركت المنتدى بلشت تجي رسائل امن بعض الاعضاء بلا زكر الاسماء على سبيل المثال بس انا ريحت راسي وحجبت تلقي رسائل خاصة من الاعضاء لانو اللي عندو تعليق او مشاركة يقول امام المنتدى ..ز

المنتدى هو بيت كل واحد فينا وأي حدا بيدخل وبسجل فيه فهو صار من أهل هادا البيت
وبالتالي كل واحد مننا لازم يكون عندو حب ومسؤولية بنفس الوقت بالتعامل مع هادا البيت
ومتل ما قال أحد الأصدقاء هالمنتدى بعبر عننا و كل شي بينزل فيه بعبر عن أفكار أعضاؤه
لهيك كل ما كان المحتوى والمضمون العلمي والثقافي والترفيهي على درجة عالية من الرقي
كل ما بتكون صورة المنتدى وبالتالي صورتنا حلوة و راقية و بترفع الراس
أحلى منتدى ... وأحلى أعضاء


شكرا نضال عالموضوع و على كل جهودك بالمنتدى

كل الشكر لمروركم و تفهمكم وردة و ربا وسوسن و جوانا و نجوى

اسماعيل الغالي دائما الك لمسة خاصة بإيصال الفكرة والف شكر

أنا صرلي فترة طويلة مبقا طليت ع المنتدى لان صار في كتير تسلاية ورسائل تعارف ..........
بس نضالو معك حق مليون بالمية ب يلي قلتو ومتأكدة انو رح يكون المنتدى من أحسن لأحسن طول مفي ناس بيهتمو بأدق التفاصيل ويحسنو المنتدى ومشكورررررررررررررر كتير ويعطيك العافية

اهلين ديمو

شكرا لمرورك

اي شي الو علاقة بسمعة المنتدى أنا معو
ما في احلى انو يكون منتدى كلية الآداب مميز عن كل المنتديات الشبابية
انا معكم بأي قرار وهي القرارات سليمة وصحيحة وبرافو كمان
مشكور نضالو صديقي