موضوع للنقاش (لجميع الأعضاء)

إلى جميع الأخوة أعضاء المنتدى الكريم ..
السلام عليكم ورحمة الله
هاد الموضوع مطروح للنقاش من قبل الجميع ...
وهو خاص بالمنتدى والاقتراح مقبول من الجميع
ولكن بداية للتوضيح:
1- هاد المنتدى هدفه الأول ثقافي وتعليمي وهاد الشي واضح من اسمه.
2- الهدف الثاني هو أن يكون نقطة للتواصل بين شريحة كبيرة من الشباب
يعني فيك تطرح أفكارك وتناقشها مع شباب من نفس الجيل.
3- هاد المنتدى هو باب مفتوح للجميع لتكوين صداقات حقيقية .. تلتغي فيها القيود
فأنت ضمن منتدانا شخص محترم على قدر احترامك للآخرين .. فيك تعبر عن نفسك
وتوجد نفسك بين ناس بيحترموك وبيقدروا الصداقة وجاهزين لتقديم المساعدة على قدر
المستطاع.

4- طبعا الشخص يلي بشوف كم المواضيع يلي بتنطرح ضمن المنتدى
بحس بالمستوى الثقافي عند الأعضاء ودرجة الوعي لدى شبابنا وهاد شي مطمئن.

هي النقاط للتوضيح فقط ..... أما الهدف من طرح الموضوع:

1- السبب يلي دفعك للتسجيل بالمنتدى؟
2- أكتر شي ممكن يشدك ضمن المنتدى؟؟
3- ما هي اقتراحاتك لتطوير المنتدى؟؟

الباب مفتوح للنقاش أمام الجميع للرقي بالمنتدى للأفضل
ويلي عنده مشكلة خارجه عن موضوعنا فيه يراجع الإدارة.

يعطيك الف عافية علاء انت لخصت كتير اشيا كنا عم نحاول نوصلها لكل الأعضاء
برجع بقول ما حدا يقول ما رح اقترح ما رح استفاد شي
متل ما قلت هالمنتدى لكل واحد فيكن و عم نشتغل لحتى نطورو ومافي كل واحد يشتغل لحالو كلنا لازم نشتغل مع بعض
أحلى علاء

اقتباس :

- السبب يلي دفعك للتسجيل بالمنتدى؟

قبل ما سجل هلكت الجوجل معي انا ودور ع شي منتدى لكليتنا بس عبس

شفتو بمحاضرة من المحاضرات وركض سجلت طبعاً اول شي مشان نتائج الامتحان والمواد

بس هلا صار اهم مكان بالنسبة لألي وبقضي فيه وقت اكتر من اي محل تاني

اقتباس :

2- أكتر شي ممكن يشدك ضمن المنتدى؟؟

مواضيع المناقشات وكتابات الاعضاء الشخصية

اقتباس :

3- ما هي اقتراحاتك لتطوير المنتدى؟؟

اقراحاتي صارو عند نضال

1- السبب يلي دفعك للتسجيل بالمنتدى؟
كنت عم دور على النتائج
2- أكتر شي ممكن يشدك ضمن المنتدى؟؟
بصراحة اول شي شدني احترام الاعضاء وروح الاخوة بين الجميع والتشجيع المستمر
بيشدني المواضيع ((معلومات ومناقشات )) وتعليقات ووجهات النظر وكمان معلومات المتخصصة باقسامنا
((عربي))

3- ما هي اقتراحاتك لتطوير المنتدى؟؟

منتدانا ناجح كتير
بس بتمنى اي عضو حابب يغير شي او عندو اي فكرة عن المنتدى يطرح الموضوع عالإدارة ويناقشوها بين بعض هيك الفكرة بتطلع احلى والمنتدى بيكون منظم اكتر
وهيك بيكون فينا نناقش كل الاقتراحات بروح حلوة والمنتدى رح يتطور بشكل احلى واكتر

بشكرك خيي علاء على الطرح الهام
موضوعك اجا بوقتو

- السبب يلي دفعك للتسجيل بالمنتدى

كنت عم دور عمنتدى لكليتنا ودورت كتيييير وخصوصا مشان نتائج الامتحان
وبالآخر لقيت هالمنتدى أثناء بحثي بجوجل


2- أكتر شي ممكن يشدك ضمن المنتدى؟

أول شي كتييير عجبتني روح الأخوة والصداقة بين الأعضاء ومستوى الوعي والثقافة
والمواضيع اللي بتنطرح وتعب الأعضاء ليقدموا المساعدة والعون بين بعض
والنقاشات اللي عم تنطرح

- ما هي اقتراحاتك لتطوير المنتدى؟

أنا كعضوة ما كتير بقدم مواضيع ويمكن مشاركاتي مو كتير كتيرة لأني بحب المتابعة والاستفادة من المواضيع المطروحة
أكتر من المشاركة
ما عندي اقتراحات أبدا

شكرا علاء كتييييييير وشكرا للادارة وكافة الأعضاء
أ

السبب هو أني سمعت بالمنتدى وقررت سجل فيه وضل موجودة دائما خاصة أنو لساتني سنة أولى
كمان مشان أستفاد من المواضيع المتعلقة بقسمي(الفرنسي)

أكتر شي حبيتو بالمنتدى هو العلاقة اللطيفة بين الأعضاء وكمان المواضيع المقترحة والنقاشات اللي بتنطرح على طاولة الحوار -متل ما بيقولوا عادة-

اقتراحاتي: يعني انا ما عندي اقتراحات وبعتقد انو المنتدى وصل لمرحلة مميزة ما صعب انو توصل إلها غير منتديات بيكفي انو الأعضاء بيتعاملوا مع بعض متل الأخوة
مشكور صديقي علاء عالموضوع المميز

1- السبب يلي دفعك للتسجيل بالمنتدى؟ روميو
كنت شوفو وقررت اني شارك
2- أكتر شي ممكن يشدك ضمن المنتدى؟؟ اكيد المواضيع الغير معتاد نقاشها
3- ما هي اقتراحاتك لتطوير المنتدى؟؟
اما بالنسبة للأقتراحات انا بشوف الحب بين الاعضاء مهم وعدم الغيرة اهم
بالاضافة لازم نعمل مواضيع قوية كلنا وكلنا نشارك
انا بعتقد منتدانا قياسا بالمنتديات التانية ناجحة بس هاد مابيمنع انو نكون قوى واقوى والله ولي التوفيق

1- السبب يلي دفعك للتسجيل بالمنتدى؟
ما في سبب محدد .. كنت بالغوغل عم دور على شي يخص كليتنا و لفتتني صورة لحتى كبرها كان لازم سجل بالمنتدى و سجلت و حبيت فكرة المنتدى و حبيت الروح الحلوة اللي كانت و لازالت موجودة

2- أكتر شي ممكن يشدك ضمن المنتدى؟؟
اكيد المواضيع اللي بتخص قسمنا " الانكليزي " و مواضيع النقاش و كمان المواضيع اللي بكونوا الاعضاء كاتبينها هنن و كمان مواضيع قسم النكت و الالغاز و اي موضوع غريب.. اما المواضيع اللي ما بتلفتني مثلا هي المواضيع اللي فيها تنظير و فلسفة عالحياة و مفهوم الحياة و ما بعرف شو ... و الشعر ... طبعا هاد الو علاقة بميولي انا ..

3- ما هي اقتراحاتك لتطوير المنتدى؟؟
اقتراحاتي .. ما في اقتراحات كتير .. بس اذا بصير تنظيم بفكرة " منتدى تعليمي " يعني مثلا متابعة المحاضرات او عالاقل الفكرة الرئيسية بالمحاضرات .. شرح افكار معينة ... يعني الصراحة ما في شي محدد ببالي هلق .. بس انو نشتغل على فكرة تعليمي اكتر .. و بس هيك ..

و شكرا علاء .. فعلا الموضوع اجا بوقتو ..و شكر لكل الاعضاء اللي عم يسعوا دائما لتحسين و تطوير المنتدى .. وبتمنى دائما نكون هيك ايد وحدة ..

اول شي شكرا كتير الك علاء

1:اللي خلاني سجل بالمنتدى اني دورت كتير على شي بخص كليتنا على الشبكة وللاسف ما لقيت
واستغربت هالشي وكنت ناوي انا اعمل منتدى للكلية بالاخر اقدرت لاقي منتدانا عجبني كتير وسجلت في

2:اللي شدني للمنتدى قبل المساعدات اللي عم يقدمها الاعضاء اللي في قليل كتير لتلاقي منتدى معظم روادو مثقفين وبدرجة عالية من الوعي عداك عن الادب والاحترام بيناتن بزكر لما سجلت نزلت موضوع بمنتدى الترحيب بطلب في يقبلوني عضو بينهن ولاقيت ترحيب كتير كبير مع انو انا سجلت في بدايات المنتدى وما كان في كتير اعضاء متل هلا

3:الاقتراحات

1: انا براي منتدى عام وشامل متل منتدانا بدو شغل اكبر لينجح لانو لو في تخصص بشي معين كان اهون بكتير
التخصص شي اساسي بنجاح المنتدى بس منتدانا عام
2: اداريا براي في اشياء بتشد الاعضاء الجدد حتى الزوار
مثلا في هاكات كتير رائعة ممكن تساعد لتحسين شكل المنتدى واللي بيدخل علي بحس انو في شغل
مثلا هاك مختارت وهاك الاهداءات كتير حلو هاك الاوسمة براي انو لازم تتوزع اوسمة على الاعضاء النشطين واللي بيشتغلو هو صحي شي رمزي بس بحفز العضو على الشغل
كمان في هاكات شخصيات الاسبوع هاك افضل كزا وكزا مثلا افضل موضوع
3:بالنسبة للمواضيع انا ضد اي تهاون بالمواضيع يعني اي موضوع اسمحولي بهالكلمة ولو انها ظالمة شوي
اي موضوع بايخ لازم ينحزف فورا
مثلا بيجي شخص بيشارك مرة وحدة شو بكون بدو نتائج الامتحانات طيب شارك اول بعدين منساعدك
او مثلا حدا بنزلك موضوع مافي منو لا فائدة ولا متعة ولا اي شي مجرد حكي انا برايي ينحزف فورا
كمان برايي الخدمات اللي عم يقدمها المنتدى متل النتائج يكون في حد ادنى للمشاركات للعضو لحتى يقدر يشوف الروابط لانو مو معقول واحد من الاعضاء يروح يتعزب ويصور النتائج ويحملن ويضل يتعزب فيهن مدة منيحة وبالاخر بيجيلك واحد بسجل بشوف علامتو وبروح ما منعود منشوف وشو لنتائج الفصل البعدو وبكون نسي اسمو بسجل باسم جديد كمان ليدخل مرة وحدة ليعرف النتائج فقط

بعتزر على الاطالة بس اهمية منتدانا عنا كبيرة ومنتمنى النجاح الو وما منرضى استغلالو بدون مقابل

والشكر الجزيل خير ختام

1- السبب يلي دفعك للتسجيل بالمنتدى؟
اي صلة بجامعة تشرين
2- أكتر شي ممكن يشدك ضمن المنتدى؟؟
راي الجيل بالمواضيع الهادفة
3- ما هي اقتراحاتك لتطوير المنتدى؟؟
يصير بروفيشنال اكتر ويكون لدكاترتنا عين عالشي اللي عم ينكتب بباب بقترح يكون اسمو وجع الاداب مثلا
ويصير مع الايام في باب اسمو الباب الاخضرمثلا
هلا كتير بكير عليه بس شو المانع من وجود اشخاص اختصاصيين بفروعنا نسالن ويجاوبونا بلا حدود ولا حواجز والاسئلة طبعا
ضمن اختصاص ودراسة كل عضو حتى لو الخدمة مدفوعة وطبعا هي خطوة بتمنى يقدر يلبيها المنتدى لما يصير الو قاعدة مادية قوية
وكتير امور تانية بيجي وقتا انشالله

مي
كلامك كتير حلو

بظن هالموضوع انحكى فيه كتير وبجد كل مره بيتحسن المنتدى فيه

وأكيد هلق بموضوعك رح يتحسن أكتر فشكرا مسبقا علاء

أنا متلكم كلكم كنت عم شوف شو في شي بخص كليتنا

فطلعلي المنتدى وسجلت لما شفت قسم خاص بالتاريخ

الشي اللي شدني انو الاشخاص المشاركين كلهم من الجامعه

وبيعرفوا الكلية ومو اشخاص تقريبا وهميين

وبيفهموني اذا حكيت بمشكلة

وممكن اطلب مساعدتهم كونوا كلنا من نفس الجامعه

وأكيد روح الصداقه اللي جمعتني فيهم بعدين وحتى اني التقيت ببعضهم وهيدا كلو حلو

ولحتى نتقدم أكتر فاقتراحاتي هي :

ربط المنتدى ببعض الدكاتره ودفعهم للدخول ومشاهدته

القيام بمقابلات مع الدكاتره والو نقدر يكون النا شي صفه تقريبا رسميه بتسهل الموضوع

فكره هلق خطرتلي ليش ما منعمل عننا بطاقات تعريف بتذكر اسمائنا وعضويتنا وفيها منقدر نخلي الدكتور

أو الشخص اللي بدنا نقابله يحس انو ما عم يحكي مع مجرد طالب حابب ينعي ويشكي

زيادة لقاءات الأعضاء مع بعض

زيادة الاهتمام بنوعية الموضوعات

دعم المشاركين الجدد

احترام الرأي الاخر

فصل خلافات الرأي عن الخلافات الشخصيه

يعني اذا خالفت موضوعك مو يعني أنك تزاعلني وما تحاكيني وما تشارك بموضوعاتي

احترامي لكم

و الله اقتراحات حلوة يا وردة ...