مصرع كليوباترا - الجزء الاول

مرحبا شباب هلق أنا رح نزل هالموضوع مشان الطلاب الراسبين بمادة المسرح لحتى ساعدهم على فهم المسرحية ودراستها

أما بالنسبة للأعضاء من غير فروع فهاد مثال وعبرة الكم لحتى تشوفو نحنا طلاب الانكليزي قديش بيعذبونا بالدراسة والمسرحيات


شخصيات المسرحية:


كليوباتـــرا:: ملكة مصر
شارميــون:: جارية كليوباترا ووصيفتها
أنطونيــــو:: قائد روماني والبوي فريند تبع كليوباترا
اوكتافيوس:: قائد القوات الرومانية
اغريبــــا:: واحد من كبار زعران روما ومشكلجيتها


الفصل الاول:


كليوباترا تقف في بلكون قصرها المنيف بالاسكندرية
وتنظر نحو الأفق ثم تضع كباية الشاي والسيجارة في فمها وبتاخد سحبة من قلب محروق
وهي مستغرقة بالتفكير في امر مهم..

كليوباترا: وبعدين بهل الورطة اللي وقعت حالي فيها

شارميون: ورطة شو يا معلمتي صلي على النبي

كليوباترا: يعني قال ما بتعرفي ولك أنا شو كان بدي بوجعة هالراس والعلقة مع زعران روما كنا عايشين وما أحلانا

شارميــون: يا معلمتي الخواجة انطونيو بيحبك وبيبوس الأرض اللي تحت رجليكي

كليوباترا: ما انا بعرف انه الزفت بيحبني بس اذا كان بيحبني بيقوم بيعلقني مع بلطجية روما وعكيدهم اوكتافيوس
وبيتحداه مدري وين بهي المدينة مدري شو اسمها اكتيوم لك حتى اسمها ما بيبشر بالخير وقال شو متجوز اخت اكتافيوس "هيلانة" اللي شكلها متل القردة

شارميــون: مولاتي هدي نفسك انطونيو زلمة قبضاي والو طنة ورنة في روما ومسنود ومدعوم كتير كتير

كليوباترا: خلاص خلاص وجعني راسي هاتي الموبايل لاتصل فيه

(تحضر شارميون موبايل كليوباترا N95 )

تحاول كليوباترا الاتصال بأنطونيو بس طلع الموبايل مافي ولا سحتوت (السحتوت هو الاسم المتداول للوحدات في تلك الفترة)

كليوباترا: شارميون ذكريني بكرا قبل المعركة اشتري بطاقة , الله يتوب علينا من هالشركات كلن نصابين وحرامية لسه كل يوم والتاني بعبيي 400 سحتوت ووين بيطيروا ما بعرف, هاتي عطيني موبايللك لدق منو..

(تناولها شارميون موبايلها والامتعاض بادٍ على وجهها)

كليوباترا: الو,الو انطونيو

انطونيــو: كليوباترا !!واحبيبتاه واجميلتاه وا.............

كليوباترا: وضريب نشالله ألف مرة قلتلك ما تحكي معي بالفصحى يا أخي أنت بتعرف أني ما واصلة غير لصف التاسع وما بفهم شي بالعربي

انطونيــو: ايه يا كليو يا حبيبتي شبك معصبة,روقي روقي

كليوباترا: بسيطة خلص رقت وبكرا منشوف شو رح يطلع معك بالمعركة

انطونيــو: حبيبتي ... ممكن تعيريني كم سفينة من الاسطول تبعك ؟؟؟؟

كليوباترا: نعم يا عيوني خلفتك ونسيتك أنا,بعدين شو بدك تعمل بهل كم سفينة؟؟؟؟

انطونيــو: يا حبي مشان شوف حالي فيهن قدام هالبغل اوكتافيوس لما بيلاقي اسطولي متحد مع الاسطول المصري
رح يموت من رعبتو

(كليوباترا في سرها: الله يفجعني فيك شو أنك تشتوش و نعنوع)

انطونيــو: قلتي شي حبيبتي

كليوباترا: لاء

انطونيــو: يعني رح تعطيني السفن

كليوباترا: أوف كورس

انطونيــو: إذن لسوف نحتفل غدا بفوزنا سويةً, ونشرب خمرة الحب يا كليوباترا

كليوباترا: رجع يحكيلي فصحى, على العموم تسلم يا حبيبي ,بشوفك بكرا بالمعركة

-------------------------------------------------------------

وبعد ما سكر انطونيو الخط قعدت كليوباترا تلوم حالها لأنها رح تدخل مصر في حرب ما إلها لزوم وعرشها صار مهدد بالضياع
لذلك قررت اتخاذ اخطر قرار في حياتها


_______
اي شباب خلص الجزء الأول ناطر رأيكم واذا عجبتكم رح نزل الأجزاء التانية , بس أنتو دعولي شيل المادة بعلامات منيحة

الله يوفقك وتشيل المادة وتسعفنا بالاجزاء التانية والتالتة لانا عنجد مشوقة بس لا تعمل فينا متل باب الحارة هالباب اللي انفتح وما عاد تسكر بس بدي اعرفواحد متلك عندو هيك قدرة كيف رسب بالمسرح لك اكيد ما عم يعرفو قيمة مواهبك وموفق

اي شو هالمسرحية الحلوة قال شوي تانية بحسدكم عفرع الانكليزي لا ياعمي حاج دقنا الويل بالعربي .

شكرا كتير سيرجي وموفق بالمسرح انشالله .

تكرم عينك فافو شايفي شايفي لهل الدكاترة قال بيرسبوني أنا بالمسرح يللا شو بدنا نساوي

تسلم مدين الغالي شو رأيك تعيد البكالوريا وتسجل انكليزي وتقدمها عني لكليوباترا

Thank you sweety

بالتوفيق نشالله سيرجي الك و للكل

شكرا الك نضالو الغالي

U R always off da chain Sergio waitin' 4 other parts but don't make it a mexican series

شكرا الك دبدوب