قاموس المفردات السورية

· شعضومة


تعبير مؤنث لا مذكر له يفيد كون المرأة غير مرتبة وليست من الأكابر وتحب الكلام غير المنمق وكثرته


· شرنه


(إنظر الشرح في تفسير مصطلح شعضومة )


· ملحو على ديلو


يعني لا يقيم وزناً للعشرة والخبز والملح


· يلي ببلي بالك


كناية عن أمر يتعذر ذكره


· معصمص


نحيل بارز العظام صغيرها


· يا إيدكم!


تعبير عن الهرب من شيء ما بسرعة


· زمق


أي هرب ببراعة وحذق، وزمط شرحو


· سرّي مرّي


أي جيئة وذهاباً بشكل متكرر إلى حد الغلاظة وتتبعها أحياناً أو تنوب عنها (خدني جيتك) و(كيلي ميلي)


· حط بالخرج


أي لا تعبأ بما يقال


· على قفا مين يشيل


كناية عن كثرة الشيء وشيوعه


· مأنّف


يعني لا يعجبه العجب ولا الصيام برجب


· فش نيعو


يعني انتقم منه شر انتقام وهي بالحلبي: يفشر حنكو


· أزّت نفسو


أي نفر من الشيء نفوراً كأنه رأى صرصوراً


· جفص


صفة للجلف غليظ الروح


· حنتر


أي "تيّس" و"بوزم" في الوقت نفسه


· طلع من عيونو عامص


يعني دفع ثمناً غالياً وندم على ما نال




· على كراريت حلقو


يعني مصاب بغثيان شديد وإقياء لا يستطيع كبحه لا بحلال ولا بحرام



· لا تكرّك عليه


يعني لا تلح عليه إصراراً


· قلبه عميقول حق بق (القاف تقرأ ء)


يعني أنه يريد أمراً بشدّة لكنه يضمره إضماراً ولا يظهره إظهاراً


· يلي بيجي منمدلّه فرشة ويلي ما بيجي منرتاح من وشه


مثل نسائي بحت يفيد عدم الترحيب بأشخاص معينين ما عم يجوا أصلاً


· شو هالتجرة


يعني الأفندي ما عجبته هالحكاية كلها وحاسس إنو تعبو ذهب سدى أو أدراج الرياح


· وحياة خالقك ماني مفارقك


تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس بدي دايئك


· العين الطرّاءة


عبارة عن التمسخر على المتكلم عنه وأن لا شيء فيه بينحسد عليه


· بيقطش وبيلحش


يعني المهذار كثير الهفوات ومن يهرف بما لا يعرف ولسانه يسبق عقله


· ولي على كسرتو


تعبير يفيد التحسّر على شخص ما مع لومه على ما فعل (في تناقض، مهيك؟)


· كـــــــن


بكسر الكاف وتسكين النون يعني اهدأ أحسنلك


· كروج


يعني درمل، وبتعبير أفصح افرنقع من هنا


· فــز


كمان بكسر الفاء يعني قوم (أوقف وانت بتكلمني)


· مصطهج


يعني مسلطن، مكيّف، مبسوط أو كما قال سيبويه: منتشي


· أفّعت معو


يعني حمل القشة التي قصمت ظهر البعير وبلغ السيل الزبى


· مو نفعان لا للخل ولا للخردل


يعني بلا فائدة تذكر


· لاطيلو


يعني كمن له منتظراً ومنها المتل القائل: "قلّو لاطيلك قلّو صاحيلك" يعني هدول تنين ناويين عالشر لبعض وكل واحد منتبه للتاني بس بدون كبريته ليشعلو


· ادفشو وشوف ما أجحشو


يعني بالإنكليزي: Fools rush in where angels fear to tread


· ما فيه الوتكة


يعني صاغ سليم خالي من العيوب وأحياناً يعني فاضي


· ما معو نكله


مفلّس وحالو عدم


· أول باشتان.....ثاني باشتان


طريقة النسوان في تعداد الأمور والأوامر والأسباب والمسببات


· بظّت عيونو


يعني جحظت العينان حتى كادت المقلتان تخرجان من محجريهما (على طريقة الجاحظ)


· خسكار


كمية من العمل المقرر ليوم واحد أو بضاعة معدّة للبيع ضمن اليوم


· من دهنو سئّيلو


تعبير يفيد الكحتنة والجرب وصرف النقود على الشخص أو الشيء بعد أخذها منه دون التكلف عليه بقرش


· ما صرلو بالقصر إلا من مبارح العصر


يعني أنه جديد على أمر ما وغرّ فيه وأحياناً تكون إشارة للنفاريش أي باللاتينية nouveau riche


· ولاد آدو


يعني المشكلجية والعونطجية والزعران وولادين الحرام (يالطيف الله يبعدون عنا وعنكن قولو آمين)



· قراضة


يعني نخب عاشر، شي تعبان بنوب


· متمسح


يعني واحد متبلد المشاعر والأحاسيس متل التمساح بفرد شكل (وبمعنى آخر: لا الحر بحرّو ولا البرد بضرّو)


· كل ما حدو بيت السلطان خيلهن بتمد الخنفسة رجلها


مثل شعبي يقال كناية لمن يحب الاشتراك دوماً في أمور لا ناقة له فيها ولا جمل، ولا فهم ولا علم له بها وهو يعتقد أن له ما للآخرين


· اندفس


أي: نام أحسنلك، انقبر


· تكورت


متل تدولق، فعل يفيد تناول الطعام، وتزهرم مثله أيضاً


· من بيت شقاع لبيت رقاع (وهي تقرأ كالعادة: من بيت شآع لبيت رآع)

تعبير نسواني عن المرأة الشطاطة النطاطة التي تنتقل من بيت لآخر ولو بالشحاطة


· يلي ببالك منو


كناية عن أمر يتعذّر ذكره لأسباب عديدة


· انطمز


أي انزعج وبوزم وقلب خلقتو وما عاد يتحاكا


· مطهمز


أي مطأطئ الرأس


· طمبرو


أي خورفو وهي بالمعنى الحرفي ركبلو طمبر وفهمكم كفاية (وتستعمل بكثرة في الكونتر سترايك)


· خود منّي


إنهاء للنقاش ودعوة الطرف الآخر للثقة بما يقول المتكلم دون نقاش.


· دواليب الجنة


مصطلح جديد للفلافل ومحاولة لرفع شأن هذه الأكلة الشعبية


· عليّي ما عليّي


قسم يريد به المتكلم أن يحلف بالطلاق ولكن سمع أنو هذا لا يجوز فبطلها واستعاض عنها بهذه العبارة.


· سم الكرّاتي


تقال عندما يكثر الطرف الآخر من الأكل.


· فجعان


أي الحالوش أو الشره


· مكولك


أي اللقلوق الذي يحب تمسيح الجوخ.


· كعي في


يعني ألح وأصر عليه ولكن الطرف الآخر رفض


جميع حقوق الغسيل والنشر غير محفوظة ---- ملطووووش ©

والله في مصطلحات جديدة

بدن قاموس عنجد :D

يا الله زكرتني برفقاتي وكتير مصطلحات ما كنت افهمها منن
يعطيك العافيه
سيرجيو
موضوع انا شخصيا بحتاجه

ههه.. شكرا سيرجيو ..و الله في كتير منون ما بعرف شو معناهون ..

موضوع رائع أبو السيرج
بنصحك تألف قاموس تسميه Syrian slangs
وتهدي نسخة للدكتور (ج-ر) يمكن ينجحك بالمادة ها

حلوين كتير سيرجيو حسيت حالي عم اقرأ نص باب الحارة
شكرا موضوع كتير حلو

حلوين كتير

شكرا سيرجيو

لكن حمشو هاد متل قاموس الأوكسفورد كل سنة بيضيفولوا كلمات جديدة

شكرا لمرورك لؤلؤة

سوسن الله يعافيكي ونحنا بالخدمة

اهلين رورو

THANK YOU RTB

أهلين رايا مو بس باب الحارة كمان الدبور و أهل الراية وغيرن....

شكرا الك اية

شكرا الك مدمنة نجوى كللك ذوق

أهلين بالحبيب